Sony S835 旗艦未有即減消息,預訂會有額外優惠?
首先補充一點旗艦 Sony Xperia XZ Premium 的價錢資料,昨晚經版主再向大舖職員查詢,得悉雖然 19 號就開始接受預訂,不過暫時似乎未有會即減的消息,但預訂會送原廠 Flip Cover、Sony 額外 1 年保養以及 6 個月屏幕意外保養,另外仲有大舖的禮品,包括 64GB microSD 卡、流動充電器、Type-C 線以及保護貼。不過,雖然暫時預訂未有即減,但版主始終會覺得,到正式開賣應該點都會有得減兩三百,你又點睇呢?▲ 版主個人比較鍾意銀色,因為可以當係鏡,照鏡好方便~不過有啲行家就比較鍾意黑色版本,你又鍾意乜嘢色呢?
爆六吋大芒 XA1 Ultra 預訂、賣價及上市資訊!
至於配備六吋大芒的 XA1 Ultra,原來而家都有得預訂,建議零售價為 $3298,同樣地會在 19 號接受預訂 (不過問過,似乎係衛訊先有得預訂,目前消息是,豐澤 / 百老匯應該沒有),2/6 正式開賣,目前未有大舖即減的消息,買機會送原廠保護套、保護貼、32GB microSD 卡以及流動充電器。XA1 Ultra 呢部新機,其實版主覺得係幾吸引的,雖然係用 MTK U,但同舊代相比,規格上有個明顯的升級,內置 4GB RAM + 64GB ROM,加上自拍表現出色,也許呢部 XA1 Ultra,將會成為版主下一部愛機吧?不過鍾意唔鍾意,都係要用落先能夠同大家詳談,但如果以呢個價錢來說,如果遲下減番 $300,確實係幾抵玩!你認同嗎?▲ 基本上 XA1 Ultra 可以話係放大版的 XA1,不過有 4GB RAM + 64GB ROM,$3298 呢個價錢、呢個規格,比起上代容易接受得多!你覺得呢?
Sony Xperia XZ Premium 在文章發表時,建議零售價為 $5998,按這裡有詳細規格及最新賣價。
Sony Xperia XA1 Ultra 在文章發表時,將於 6 月 2 日香港上市,按這裡有詳細規格及最新賣價。