六吋巨芒 Sony 新機！Xperia XA1 Ultra 版主極速上手
在外型上版主覺得 Sony Xperia XA1 Ultra 挺美觀的，雖然唔係好似 XZ Premium 咁用上玻璃機面，但在造工上算是相當不錯。顏色上有粉、金、黑、白四種，也許版主是男人的關係，會比較喜歡黑色同白色，所以我今次上手的，都是白色的 XA1 Ultra。不過因為具有六吋巨芒，對於手細的版主來說，要單手操作實在是不容易，但我個人就幾滿意這部 XA1 Ultra 的設計。
▲ 版主今次上手試的，是白色的 Xperia XA1 Ultra，具有六吋 2.5D 屏幕，可以見到佢嘅超窄邊框設計，實在是做得不錯，當然我覺得，如果可以無埋上下白色位置，實現真正無邊框，咁就最好。果陣 Sony 設計師在日本講到話會朝着呢個方向進發，希望遲下真係會有吧！
▲ 從側面可以清楚見到 XA1 Ultra 的 2.5D 玻璃。
▲ 屏幕上方會見到有 1600 萬像素的前置鏡頭，在前置鏡頭同前置閃光燈之間，會見到 SONY 的字樣。
▲ 機背則用上塑膠材質，左上方會有 2300 萬像素的主鏡頭。
▲ 右側上方會見到音量鍵以及開關鍵，而下方則有實體快門鍵。
▲ 而左側會見到有 SIM 卡插槽。
▲ 機底部份為充電插槽以及喇叭位置。
▲ 版主成日話自己手細，講嘅係事實，拎住 XA1 Ultra 要單手操作，會感到吃力亦是事實。不過有咁大個芒，平時用黎睇片，感覺應該會很不錯。
▲ XA1 Ultra 一共有四種顏色，分別為黑、白、金、粉，你又鍾意邊隻色多啲呢？
Sony XA1 Ultra 用 MTK U 但 3D 效能好勁？
外型上唔差，今代又有 4GB RAM + 64GB ROM，配置上係挺不錯的。之不過對於大部分網友來說，呢部 XA1 Ultra 最大的敗筆，莫過於用上了 MTK U，而 MTK U 一直給人的印象是，多 bugs，而且圖像處理方面會比較差，玩 3D 遊戲會窒，就算同你講到呢粒 Helio P20 是高階處理器，但未必個個會相信。不過，版主試過用安兔兔同 Basemark es2.0 跑分軟件測試過呢部 XA1 Ultra 的效能，雖然係 MTK U，但在 3D 效能方面係幾勁的。
▲ 呢個係第二次進行安兔兔跑分的結果，第一次唔知出左乜嘢事，3D 方面顯示為「Unsupported」，但第二次跑分就正常番好多。配備 MTK Helio P20 處理器的 XA1 Ultra，安兔兔跑分為 62622，雖然唔算係特別高分，但算是中規中矩，屬正常水平。
▲ 再用 Basemark es2.0 Taiji free 進行測試。呢隻軟件是用來測試手機在進行 3D 遊戲時的流暢度，60 分為滿分，得出 60.59 分的成績，代表在玩 3D 遊戲時理論上會非常順暢。版主起初的不相信這個分數，於是乎再跑多次，都係破 60 分的水平，可見其實 P20 處理器在 3D 方面確實有好大的提升。
主打係相機！Sony Xperia XA1 Ultra 相機實拍！
Sony Xperia XA1 Ultra 又有大芒、4GB RAM、64GB ROM，玩 3D 遊戲性能方面又好似都唔差咁，但唔知你知唔知，其實呢部 XA1 Ultra 最大的賣點是影相，特別是自拍！不過版主近日狀態不太好，無謂自拍嚇怕大家，所以搵發佈會現場的 Model 姐姐幫手自拍幾張，而版主亦都在附近試拍一下。大家又評下，到底 XA1 Ultra 的相機合唔合格啦！前置相機
主相機
▲ 從左圖可以見到，如果你影啲比較細的東西，會好難 focus 到目標。版主試左好多次，最後放棄了～
小結
其實版主手頭上未有 XA1 Ultra 可以詳細測試，要到星期一先有機，所以只能在發佈會現場極速試玩。唔講外型，版主一向都覺得 Sony 手機外觀係唔差的，比較驚喜的是，雖然佢係用上 MTK U，但估唔到玩 3D 遊戲效能的成績會咁好。當然分數嘅嘢又未必可以盡信，玩遊戲性能好唔好，還是等版主有機的時候再試下。至於相機方面，版主覺得 XA1 Ultra 前置鏡頭同舊代一樣，成像相當細緻，就連臉上的粒粒、頭上的髮絲，都可以睇得清楚，咁係好定唔好，見仁見智啦，至於主相機方面，版主覺得以 $3298 嘅價位來說，都係合格嘅，如果遲下正式開賣再減番 $300，相信會更加搶手。你又點睇呢？Sony Xperia XA1 Ultra 在文章發表時，建議零售價為 $3298，按這裡有詳細規格及最新賣價。