LG、聯想千元新機大舖開賣!邊部性價比較高呢?
字太多,網友未必會愛看,所以版主盡量簡短地講。先由新機說起,講嘅係 LG Stylus 3 以及 Lenovo Phab 2 Plus,LG Stylus 3 之前版主 Keith 已經同大家做過評測,最大賣點係可以平價玩手寫筆,建議零售價為 $1998,而出面大舖則做緊「即減 $200」,最新賣價為 $1798。呢個價其實係抵,不過有人一聽到 MTK U 就鬧,其實我覺得 MTK U 都不是問題,最主要問題應該係得 16GB ROM,但叫做有得插 microSD 可以補救。至於 Lenovo Phab 2 Plus,上個月尾正式開賣,建議零售價為 $2199,不過大舖減多 $300,賣 $1899。雖然比 LG Stylus 3 貴一百,不過勝在有 32GB ROM、6.4 吋 1080p 大芒 (Stylus 3 得 720p)、4050mAh 大電,呢個價錢,你又覺得會唔會比 LG Stylus 3 更抵玩呢?
▲ 版主 Keith 之前都介紹過,有筆、有真三卡,賣 $1798,除左 16GB ROM 之外,其他嘢都諗得過吧?
▲ Lenovo Phab 2 Plus 靜靜雞在大舖出現,建議零售價為 $2199,大舖最平賣價為 $1899,呢個價,合理?
HTC 中階機種減價清貨,$1800 唔使好抵玩?
講緊嘅係好耐無提過的 HTC One X9,以為二月跌到 $1998 已經係底線?原來仲有得再平,今個月起百老匯做緊渣打信用卡優惠,只要你有渣打信用卡,就可以平多 $200,用 $1798 的價錢入手 One X9。回顧返 One X9 的規格: 5.5 吋 1080p 芒、MTK Helio X10 處理器、3GB RAM、32GB ROM、3000mAh 電,又會唔會值得入手過 LG、聯想果兩部新機呢?呢三部機如果要你揀,你會揀邊部?LG Stylus 3 在文章發表時,大舖賣價為 $1798,按這裡有詳細規格及最新賣價。
Lenovo Phab 2 Plus 在文章發表時,大舖賣價為 $1899,按這裡有詳細規格及最新賣價。
HTC One X9 在文章發表時,大舖賣價為 $1798,按這裡有詳細規格及最新賣價。