▲ 版主之前試玩的已經係香港將會開賣的版本，可以見到包裝盒係寫住 m2 note 的。
1. 偷步推出機會微，但 11 號會準時賣
係上一代 m1 note 行貨開賣時，曾經出現左提早一兩日開賣的情況，當時搶到的朋友實在係幸運，因為到 m1 note 正式開賣時已經一機難求，衛訊甚至要用到會員優先購買呢招。今次的 m2 note 係推出前就有網友提到 m2 note 可能會係 7 月 8 或者 9 號率先到貨，咁重要版主當然要去查詢下啦！問過好幾間衛訊後，版主收到的消息都係提早推出機會不大，不過都可以準時係 11 號推出。除左衛訊之外，魅族在旺角的客戶服務中心同埋 HKT 及 csl 專門店都可以買到 m2 note ，但一樣問唔到會提早推出的消息，所以係開賣日期方面大家可以放心嘅。
2. 想早買早享受？預訂有門路
如果怕左同人一齊搶機，想盡快玩到 m2 note 的話，預訂當然是不二法門啦！版主係衛訊查詢過，其實而家已經可以預訂 m2 note ，訂金係 $300 同埋一樣在 11 號有機拎。而魅族客戶服務中心方面，版主查詢過，雖然係可以買機，但暫時不設預訂服務，當然如果版主收到新消息會即時同大家講啦。3. 32GB 版會否推出？
另一個網友都好想知的問題就係 m2 note 會否有 32GB 版本了！因為係目前已公佈的資料之中首批在港開賣的 m2 note 只有 16GB 同埋白、灰色，而 32GB 版本就未有提到。如果大家想入手 32GB 版的話可能就要等多等了，因為版主問過魅族方面，佢哋都話暫時未有消息，主要都係視乎返 m2 note 在港的開賣反應而定。4. 大陸水貨版同港行會有甚麼不同？
魅族手機在福仁、黃金其實有不少細鋪都可以買到，要分辨到是港版還是大陸版其實唔難，只要睇包網盒所寫的是「 m2 note 」還是「魅藍 note 2」就可以分到了。暫時來講，陸水版 m2 note 的價錢都仲係 $1280 左右，未必係最化算的選擇，好在係支援頻段上魅藍 note 2 如果係通用版的話都用到香港 4G 。
5. 題外話： MX5 已到港，華為 Honor 7 水貨都快到！
好，最後呢樣消息同 m2 note 其實無乜關係，不過可能大家都想知。上星期華為、魅族同埋小米都發佈左新機，而當中 Honor 7 同 MX5 都有不少朋友留意。有關 MX5 行貨開賣的日期相信最快都要到 8 月，但如果大家想搶先玩的話版主就發現，水貨版本已經抵港，但因為大陸一機難求而價錢版炒起（ 首批出貨 20 萬但預訂人數 500 萬），所以第一批 32GB 版 MX5 都可能要接近三千蚊港紙。另一部相當有趣的華為 Honor 7 都預計水貨係今周到港，不過價錢同樣會比較貴。
▲ 到左港的 MX5 有 16 同埋 32GB 兩個版本，但因為第一水已經被炒高的關係， 32GB 都接近三千。
▲ 同上一代相比， m2 note 最大的升級個人覺得係可以插到 SD 卡而且支援中港 4G ，雖然效能係差過上一代但都仍然係千元機中算係不錯啊！
在文章發佈的時侯，魅族 m2 note 定價 $1,199 ，按此看詳細規格和最新賣價。