Pro 5 4GB RAM 頂配版場價平過定價!行貨都快來了
呢個小標題前半可以話係 old news 而後半方面先至係重點。早排 Pro 5 水貨已經抵港,但係賣價方面卻不算很便宜,當中 64GB 內置容量配 4GB RAM 的 Pro 5 頂配版「第一水」來到香港時,價錢就要 $4000 以上,比起 3099 人仔定價貴多了。隨住開賣至今已經過左好一段時間後, Pro 5 深水埗福仁場價已經回落左不少,近日價錢落到 $3580 ,估計過多幾日價錢更加會跌落 $3480 。以大陸定價 3099 人仔(約港幣 $3758 )來計,而家場價已經比起大陸便宜呢!分享完 Pro 5 水貨消息之後,就到左更重要的行貨開賣消息啦!是咁的,版主收到消息,大家等到頸都長的 Pro 5 已經確認係下星期到港,不過確切日子就唔多方便透露。另外唔少朋友擔心,到底魅族今次會唔會只係出一個版本,甚至係唔出 4GB RAM 64GB 容量呢個高階版。就已知消息來講,大家可以放心,香港係會有齊兩隻版本的。價錢方面,雖然實價都係唔方便講,不過版主睇過,兩個版本的賣價同大陸定價分別好細,而且 4GB RAM 高階版價錢並不會超過 $4000。
▲ Pro 5 作為魅族年度最高階機款,處理器都有 Exynos 7420 ,跟 Note 5 同級呢!
樂 1 Pro 「雙十一價」來到場內! 6.3 吋巨芒樂 Max 平左一千
今次話明係 4GB RAM 大戰,當然唔會只係得 Pro 5 一部機。如果講起 4GB RAM S810 旗艦,大家可能會記得早一排版主提過有部 S810 4GB RAM 手機係大陸做「真。跳樓價」,有 5.5 吋 2K 芒但只係賣 1499 人仔,呢部就係樂視的樂 1 Pro 啦!係樂視雙 11 促銷減動裡面,樂 1 Pro 最平的價錢只係 1499 ,折合返港紙就係 $1826 。近日版主再到福仁場內時,就發現已經有細鋪用接近「雙十一價」的價錢促銷,價錢係 $1980 ,如果在雙十一期間搶唔到但仍有意入手可以留意下。好多人選擇大陸水機,當中原因係芒夠大,雖然香港都有唔少 6 吋或以上大芒機可選,但係規格難以稱得上旗艦級。以 6 吋以上大芒機來計,樂 Max 規格可以話數一數二,屏幕有 6.3 吋 2K 解像度,處理器係 S801 配 4GB RAM 。相機更加係 Sony IMX230 2100 萬像素再加 OIS 光學防手震。在價錢方面,一開始樂 Max 到港時水貨價高達 $4480 ,但而家深水埗福仁場內樂 Max 價錢仲平過樂視大陸官網 3299 人仔(約 $4041 港幣)呢個賣價, 64GB 版本只係 $3480 。
不過水貨機價並唔係時時都有減的,同樣係呢排出新機, OnePlus 前排推出以 S810 同 4GB RAM 做主打的 OnePlus 2 係場內價錢基乎無郁過,仲係賣 $2900 左右。(最慘係行機仍然要邀請先買到⋯⋯)
唔知大家又覺得下星期行貨開賣的 Pro 5 吸引力又大唔大呢?大家不妨留言講講啊!
▲再講多一點點,早前都有風聲指出 Letv 樂視不止會在港推出 Le 1s ,其實樂 Max (香港會叫 Le Max )都有很大機會正式到港賣。(反而 OnePlus 2 都不知幾時先有得正式賣了⋯⋯)
在文章發佈時,樂視 Le 1 Pro 在港未有發售消息,按此看手機詳細規格及最新賣價。
在文章發佈時,樂 Max 在港未有發售消息,按此看手機詳細規格及最新賣價。
在文章發佈時,魅族 Pro 5 將於下周開賣,按此看手機詳細規格及最新賣價。