魅族新機下周賣!千元手機平價鬥,邊部啱心水?

左定坤 (Cho Ting Kwan) 2017-02-23 21:10 | Meizu
一講到大陸機,唔少網友都走夾唔唞。但問題係,如果你要搵平價,兼高性價比的手機,又似乎真係得大陸機先至做到。總之,一分錢一分貨,千幾蚊貨仔,你無得要求咁多,而家呢個價位,可以有 3GB RAM 甚至有 64GB ROM,其實已經叫相當不錯。不過,通常講高性價比手機,好多人淨係識得小米,但版主個人就更喜歡魅族,雖然暫時喺香港未做得起,但版主覺得,佢遲早都會成為小米的一大威脅。收到消息,魅族新機下星期就開賣,呢個價錢你又點睇呢?同價位手機當中,你又覺得邊部啱你心水呢?即刻睇下啦!

場料(Facebook).jpg

魅族 M5 Note 下周開賣!版主收風: 建議零售價合理?
魅族新機,講緊嘅唔係魅藍 M5s,而係上年 12 月初在北京發佈果部 M5 Note,用上金屬機身 + 5.5 吋 FHD 2.5D 屏幕,規格中規中矩,MTK Helio P10 處理器 (即係 HTC Desire 10 Pro 同 U Play 用果粒~) 有 4000mAh 大電 + 18W 快充。可惜版主收到風,香港推出的並非最高配置的 4GB + 64GB 版本,而是 3GB + 32GB 版本,實在是有點可惜。顏色上會有金、銀、灰三種顏色,至於剩下的藍色,則未確定香港會否推出。價錢方面,記得發佈會果陣,3GB + 32GB 版本講緊嘅係 999 人仔,後來原來加了價,變左建議零售價係 1099 人仔。而版主行場時收到風,M5 Note 下星期一就會正式開賣,香港建議零售價應該會係 $1569,呢個價錢網友覺得可接受嗎?

(補充: M5 Note 建議零售價 + 開賣日期,後來得官方確認)

16911041_395213350837477_1515066176_o.jpg  16910781_395213354170810_487109000_o.jpg
▲ 建議零售價如無意外應該係 $1569,不過大舖有得賣,應該都有機會有一兩百蚊即減卦~XD

紅米 Note 4 建議零售價下調,平過水貨!
講到尾,魅族最直接的對手,都係小米,特別係佢旗下嘅紅米系列。而喺魅族 M5 Note 即將開賣之前,紅米 Note 4 就搶先減價食住個勢,由原來的 $1499 減至 $1399,形成一個局面,相比水貨價 $1450 還要便宜。雖然紅米 Note 4 都係用上 MTK U,定位同魅族 M5 Note 好似,但勝在佢有 64GB ROM,讓佢成為最平價 64GB 手機,而電量亦相比魅族 M5 Note 多 100mAh。不過,紅米 Note 4 快充極都只有 10W,充電速度比起魅族 M5 Note 慢得多,你又會點揀呢?可能版主自己用過好幾部紅米,都覺得唔係太襟用,如果紅米 Note 4 同魅族 M5 Note 俾我揀,雖然係略貴,但我還是會選擇 M5 Note,因為用過真心好用,到而家都無乜大問題。

16880772_395214487504030_2121476926_o copy.jpg
▲ 紅米 Note 4 水貨賣緊 $1450,但香港建議零售價早就下調至 $1399 了~

性價比最高,但前景不明,你又敢搏樂視手機嗎?
其實除左魅族同小米,樂視手機可以話係三個品牌中,性價比最高。就好似 Le 1s 咁,深水埗細舖行貨價,今個月已經跌穿一千,最新賣價 $980,成功躋身「百元機」的行列。而同魅族 M5 Note 一樣,有 3GB + 32GB 但用上 Qualcomm S652 的 Le 2,雖然呢幾日行貨價略有回升,但都不過係回到月初果陣嘅價位,最新賣價為 $1180。好似好抵玩係咪?但大家都知道,樂視而家最受人注目嘅唔係手機,而係佢嘅債務問題,幾時還清啲債,仲係未知之數,樂視前景係點,唔少人都好關心。你又會唔會考慮樂視手機呢?

16910826_395216207503858_503999943_o.jpg
▲ Le 2 無論係水貨還是行貨,都大約係 $1150 呢個價位,係抵嘅,但你又敢唔敢搏呢?

魅族 M5 Note 在文章發表時,建議零售價為 $1569,按這裡有詳細規格及最新賣價
紅米 Note 4 在文章發表時,官網賣價為 $1399,按這裡有詳細規格及最新賣價
樂視 Le 2 在文章發表時,官網最平賣價為 $1199,按這裡有詳細規格及最新賣價

最新新聞