怕左 m2 note ?小米急散貨,最平七舊水你執唔執?

Lawrence 2015-06-27 04:11 | 小米
早前就同大家分享過有關魅族 m2 note 開賣的細節,以行貨來講呢部機的確是性價比不錯,有力同一眾手機競逐「性價比機皇」呢個寶座。但係講起魅族同性價比,相信大家都會不其然地想起另一個牌子小米!近排版主就發現有一批小米的手機居然平至 $699 就有交易!大家又會否有興趣呢?

//timgm.eprice.com.hk/hk/mobile/img/2015-06/27/202501/lawrencelaw_3_4568_dd3d2adcab24ed42a0e9d5abd0a3106f.jpg


「百元」紅米行貨機深水場黃金湧現!平三分一有無伏?

如果近來有到深水埗高登黃金行過的朋友,可能會留意到有不少聲稱係行貨的小米手機出現,機種都有唔少,由最舊的紅米 1S 以至小米 4i 都有,價錢方面就以紅米 1S 最為特別。相信大家都知道如果想入手小米手機行貨的話,透過小米官網買就最著數,一來不用擔心保養問題,而且比起街價多數會更平!但係今次版主就發現有部份細鋪所賣緊的紅米手機 1S 只係 $699 就有交易,而且店家標明係行貨,而版主向店員詢問時佢哋都回應是行貨版本,會有保養。


同樣係港行,點解會更平?

街外小米機售價比起官網平呢點,感覺上好似有點問題,好多朋友應該都會懷疑是甚麼一回事!所以版主都再查問過其他消息,後來就聽聞原來確實係有一批小米行貨手機引入場內散貨!當中紅米 1S 價錢能夠比起官網價平係因為呢部手機推出已經好一段時間,規格上吸引力不大,用正價 $999 散貨無疑係好困難,所以就唯有減價促銷。

講返紅米手機 1S ,呢部機係規格上雖然真係有點過時,除左沒有 4G 支援(但有 3G 雙卡)外, 4.7 吋屏幕都只有 720p 解像度,而且處理器只係 Qualcomm S400 1.6GHz ,儲存容量係 8GB ROM 以及 1GB RAM 。另有 800 萬像素主鏡頭同 160 萬像素前鏡同埋 2000mAh 電池。

有關係深水埗場內所賣緊的小米手機(包括紅米手機 1S 、紅米 2 、紅米 Note 單卡 4G 版)相信大家都好擔心有關保養方面的問題。版主就向代理商冠恆集團查詢過,佢哋就透露確實係有一批小米手機(包括紅米手機 1S 、紅米 2 以及紅米 Note 單卡版)由冠恆集團代理的。而更重要就係一樣有小米官方保養,亦即係有問題可以拎去小米維修部整。係價錢方面,除左紅米手機 1S 之外,其他機款好像紅米 2 就係用官方定價出售,吸引力可能會差少少。

唔止深水埗!大鋪一樣為紅米 2 散貨

其實,紅米系列機種供過於求可以話有跡可尋,因為唔止深水埗,連大鋪都有賣紅米機!近來衛訊同蘇寧都引入左紅米 2 銷售,一般來講小米手機咁受歡迎,係官網都要用「輪米」的方式搞一大輪先買到機,又點會有貨可以比到其他銷售渠道呢?不過點都好,有更多渠道可以入手行貨版小米手機總算係一件好事,大家總算可以同以往係街鋪見到的貴價兼且唔知有無保養的小米手機講再見啦!

//timgm.eprice.com.hk/hk/mobile/img/2015-06/27/202501/lawrencelaw_3_4568_df779aa95ada8b6712cf5bb28a4a1eed.jpg
今次分享係場內賣的紅米有一批係由冠恆集團( Good Century )代理,以往佢地搞過開倉賣紅米 Note 都一樣跟返小米保養。

//timgm.eprice.com.hk/hk/mobile/img/2015-06/27/202501/lawrencelaw_3_4568_c4ddea14f655c19f9fb258c4a53c7556.jpg
係大鋪賣緊的紅米 2 同官網一樣定價係 $899 。

最新新聞