小米 4c 開箱試玩！延續小米 4i 支援中港 4G 但不能換電、插卡的風格
今次試玩的小米 4c 係標準版，係網絡的支援上都係用到香港 4G 的。係規格上就有 5 吋 FHD 解像度屏幕，而處理器就用左 Qualcomm S808 以及 2GB RAM 同埋 16GB 內置容量。相機方面就有 f2.0 光圈以及支援 0.1 秒相位對焦的 1300 萬像素相機，前鏡頭就係 500 萬像素 f2.0 光圈同埋 85 度廣角。電池就係 3000 內建式。坦白講，從規格以及外觀來講，小米 4c 同小米 4i 有好多方面都比版主一樣的感覺，除左包裝盒今次用左相當搶眼的橙色，令人一見就知係小米手機⋯⋯
▲ 今次的盒子用左橙色做主色，質地也不同了。
▲ 但隨機附送的東西跟以前也是差不多，充電器、 USB type c 線、 SIM 卡針都有。
▲ 盒背的資料往往是重點，但今次小米未有列明手機支援的頻段。
機身質感跟小米 4i 近乎一樣，屏幕質素跟旗艦機有分別
上面提到小米 4c 手感同小米 4i 一樣，相信當中原因在於，對於小米來講小米 4i 係用於打入國際市場的中階規格入門價錢手機，而在大陸市場方面因為面對的環境不同，所以在改用了 Qualcomm S808 處理器之後，在價錢維持係同小米 4i 差不多的情況下，亦改用了「小王子」、「旗艦新品」在大陸發佈，而且早前也有消息指小米 4c 未有計劃大陸以外地方上市。版主講左咁多無非係想指出，其實小米 4c 大家可視之後小米 4i 的高配版，但係在外型設計同埋質感方面實質上是沒有甚麼分別的。係外型上雖然未有明顯分別，但係要留意小米 4c 都改用左 USB Type C ，算係跟上左潮流。另外，在 Sim 卡方面，小米 4i 為左照顧不同地區的需要而用上左 Micro Sim ，來到小米 4c 上都係一樣，雙 sim 卡但兩個卡槽都只支援 Micro Sim 。講完外型就到左屏幕方面，作為而家市場上少有的 5 吋芒手機，小米 4c 係單手操控上當然會較其他大芒機好。另外因為屏幕唔大又有 FHD 解像度，所以小米 4c 都有 441 PPI ，係細緻度算係不錯。版主對於屏幕沒有好高的要求，再加上而家市面上手機閒閒地都有 FHD 解像度同埋不錯的可視角度，所以一向好少提到手機屏幕有大問題，但今次試用時就見到屏幕的邊框部份有輕微的漏光情況。所以一分錢一分貨呢個道理果然是對的，以入門機來講（雖然小米叫部機做「安卓小王子」又話「旗艦新品」啫，但大家不會真係以為一部千多元的手機會用旗艦質素的材料吧？），其實小米 4c 的屏幕都不算很差嘅！
▲ 今年仍然有出 5 吋芒手機的廠商唔多，而小米 4c 以 5 吋芒手機來講手感都 ok ，單手操控也容易做到。
▲ 相機鏡頭旁邊有雙色溫閃光燈，而機背要留意係不能打開蓋的。
▲ 前鏡方面，從規格來講小米 4c 同小米 4i 是不同的，前者係 500 萬像素 f2.0 光圈，後者是 500 萬像素 f1.8 大光圈。
▲ 小米 4i 仍然用左熱感式按鍵，而機底就有 USB Type C 插口。
▲ 兩個 Sim 卡槽都是支援 Micro Sim 卡。
▲ 小米強調手機用到全網通，係香港當然都用到 4G 。
▲ 係屏幕細緻度上，小米 4c 係不錯的。
▲ 係低角度之下，亮度有少少減弱左，但係未有反白情況。
▲ 但要挑剔的地方就係小米 4c 有少少漏光情況，在一般室內都睇到，其實都算幾明顯。
效能跟 LG G4 有無得比？改用最新版安兔兔少近八千分！
唔知點解，係最近兩次小米新機發佈會上，小米在提到自家效能時都好喜歡用上舊版本的跑分軟件去展示自家新機的優異成績。好似今次的小米 4c 發佈會上佢哋又用左安兔兔 5.6.0 ，而得出的成績就有成 57899 分，呢個分數簡直係 S810 旗艦機的表現啊！不過，今次版主改用最新版本的安兔兔 5.7.3 去跑分時，小米 4c 的分數當場又「合理」返。係 5.7.3 版本安兔兔上，小米 4c 得分為 49953 未到 LG G4 的五萬分水平。雖然話未有五萬分，但實際上小米 4c 表現算係相當不錯了，一來標準版只有 2GB RAM ，成績較 3GB RAM 的 LG G4 差都好平常，另外就係以千元價位機種換到同旗艦機種相若的效能，實在很難有更高的要求啦。
▲ 呢個就係小米在發佈會上提到小米 4c 的表現，但就用左舊版本的安兔兔，咁樣參考價值是否會較差？
▲ 來到安兔兔 5.7.3 小米 4c 得分為 49953 ，回到合理水平， 2GB RAM 版本同 LG G4 相比係差少少的。
▲ 係 Vellamo 方面，小米 4c 係 Chrome 瀏覽器方面得分不錯，但在單核同多核上的表現，其實比起紅米 Note 2 差少少呢！
▲ 在 Basemark 2.0 上有 59.97fps ，相當理想。
相機對焦速度快！成像表現令你滿意嗎？
在相機方面，小米 4c 同小米 4i 明顯不同的地方就係在 1300 萬像素的相機加入左號稱只需 0.1 秒的相位對焦，實際用起上來的時候又真係幾爽快，不會輸比一般大廠旗艦。另外小米 4c 相機光學組件能夠容許小米有不錯的最短對焦距離，版主即便係相距不足 10 厘米的情況下都能成功對焦，呢點都係抵讚的。
小結：「性價比」可能會比起 Nexus 5X 高，但與紅米 Note 2 同期出會否影響其吸引力？
來到最後做總結都係同一個問題了，就係小米 4c 的性價比如何呢？從價錢來看 Nexus 5X 港版最平是 16GB ，定價 $3398 ，而小米 4c 目前香港仍未有推出計劃，參考現時水貨價就係 $1780 （當然稍後時間會更平）。係價錢上小米 4c 係佔優的，始終平一千有多。但係各方面的質素上，小米 4c 同 Nexus 5X 看來仍然係有距離的，好像 Nexus 5X 支援指紋掃描，而且在相機規格亦都係更勝一籌，所以 Nexus 5X 又確係有定價更高的理由。另一個不能從價錢同硬件資料上看到的就是軟件方面，Nexus 手機可以有最快最新的 update 同完整 Android 體驗，呢樣都係小米 4c 所缺乏。所以講到尾小米 4c 係咪性價比高於 Nexus 5X 真係見仁見智了。比起 Nexus 5X ，反而小米 4c 要面對更嚴峻的問題就係「自己打自己」了。現時水貨市場來講，紅米 Note 2 可以話係最熱門的型號，因為一千蚊多少少就用到旗艦級處理器仲有 5.5 吋 FHD 大芒，性價比好難有對手。小米 4c 在屏幕較小，而且不支援插卡的情況下，實在幾難同紅米 Note 2 爭，唔知大家又點睇呢？留言講講吧！
小米 4c 售價 : 2GB RAM 標準版 HK$1780 高配版 HK$2080
鳴謝：Lucky Digital Store
小米 4c 在文章發佈時，香港上市時間及售價未定，按這裡有詳細介紹及最新賣價。