是初音未來定制版嗎？紅米 Note 4X 水貨抵港，千幾蚊真抵玩？
紅米 Note 4X 水貨近日終於抵港喇！不過就唔係初音未來定制版，而只係普通版。講緊嘅係深水埗福仁嘅舖頭仔，現時水貨價 $1380，呢個價確實一啲都唔貴，唔單止有 S625 處理器，仲有 4100mAh 大電池，集慳電與大電於一身，而且仲有 5.5 吋屏幕，似乎比 Galaxy C7、ZenFone 3 等 S625 手機更為吸引，網友又點睇呢？版主拎過上手，覺得金屬感都相當令人滿意，唔再係好似以前紅米 Note 3 咁膠，光是呢點，版主覺得千幾蚊，確係值嘅！
▲ 水貨紅米 Note 4X 終於正式抵港，$1380 呢個價錢，無投訴吧？
▲ 雖然從表面規格看來，紅米 Note 4X 同水貨價 $1180 的紅米 4 高配版唔係相差太遠，但佢有 5.5 吋屏幕，會唔會值番果 $200 呢？
三星 C7 Pro 開賣，舊代 C7 價有無再平？
果陣三星 C 系列一出嘅時候，C7 真係大出風頭，5.7 吋 + 4GB RAM + 64GB ROM，規格上來看真係唔錯嘅，而家出到 C7 Pro，改用 S626 處理器，咁舊有的 C7，又會唔會再跌價呢？版主就向大舖職員查詢過，表示目前C7 仲有賣，賣價依然係 $2998，但就已經開始清貨，不過可能仲有一水貨未返，如果最後一批貨都返埋，會唔會係 C7 減價的時候呢？
▲ 細舖已經陸續無貨，大舖亦都開始清貨，但價就暫時未有減。
抵過 Galaxy C7，華碩 ZenFone 3 又點睇？
都係果句，華碩 ZenFone 3 除左粒 S625 U 慳電，其實整體來說無乜特別。有 5.2 吋同 5.5 吋兩個選擇，兩個都係用 S625，不過細芒版就得 3GB + 32GB，而 5.5 吋版就有 4GB + 64GB，前者大舖價 $2299，後者賣 $2699，兩部都無 NFC，同埋有好多 bloatware，網友又點睇呢？
▲ ZenFone 3 用家有無投訴？
Samsung Galaxy C7 在文章發表時，大舖賣價為 $3198，按這裡有詳細規格及最新賣價。
ASUS ZenFone 3 (5.5 吋) 在文章發表時，大舖賣價為 $2699，按這裡有詳細規格及最新賣價。
紅米 4X 在文章發表時，香港上市日期未定，按這裡有詳細規格及最新賣價。