F1.8 + F2.6 雙鏡頭,支持 2x 光學變焦挑機 iPhone 7 Plus!
首先講下相機,部手機外型設計幾靚都好,影相一直都是小米手機的缺點,今次小米 6 用上了 1200 萬 + 1200 萬像素雙主鏡頭,兩個鏡頭一個光圈有 F1.8,一個 F2.6,理論上在夜拍上表現應該會有所提升,但實際又係唔係呢?同時,小米 6 亦支持 2 倍光學雙攝變焦,操作跟 iPhone 7 Plus 相當類似,都係按一下「1x」,就會自動變成「2x」,同 iPhone 7 Plus 相比,小米 6 的表現又如何呢?▲ 小米 6 配備 2 倍光學雙攝變焦,同 iPhone 7 Plus 一樣,都係按一下「1x」,就會變成「2x」。
小米 6 試相
講明先,因為酒店附近沒有甚麼可以影靚相的地方,所以只能在酒店內影幾組相片,俾大家大概知道相機嘅質素。版主有時評測手機,可能會好直接講出,該手機的優缺點,希望讓網友能夠更加了解,呢部手機的質素。無錯外觀手感係唔差,但相機方面版主初步嘗試,似乎未有特別的驚喜,尤其是在夜拍方面,用「2x 光學變焦」係好難影到相,一來相機操作有點慢,二來當我按完快門鍵,佢會出現有點卡的情況,有時會以為佢影左,但其實仲未影,導致出來成像會有點手震的現象。版主試過好多次,情況都差不多,你可以睇下下面幾組圖片,自行判斷你能唔能夠接受到。不過亦有一個原因,就係因為版主手上的是工程機,或者到正式開賣時,情況就會有所改善。
第一組 【1: 普通拍攝 2: 2x 變焦拍攝 3: iPhone 7 Plus 普通拍攝 4: iPhone 7 Plus 2x 變焦拍攝】
▲ 在室內環境下,因為現場環境係比較偏黃,所以其實對比現場環境,iPhone 7 Plus 相對更能還原真實,但小米 6 影出黎成像就比較偏藍。
第二組【1: 普通拍攝 2: 2x 變焦拍攝 3: iPhone 7 Plus 普通拍攝 4: iPhone 7 Plus 2x 變焦拍攝】
▲ 在燈光控制方面,小米 6 表現其實算係合格水平。
第三組【1: 普通拍攝 2: 2x 變焦拍攝 3: iPhone 7 Plus 2x 變焦拍攝】
▲ 在夜拍上,當你用小米 6 的 2x 變焦拍攝,會好容易造成手震的現象。放大來看,iPhone 7 Plus 成像明顯清晰好多。
第四組【1: 普通拍攝 2: 2x 變焦拍攝 3: iPhone 7 Plus 2x 變焦拍攝】
第五組 【1: 普通拍攝 2: 人像模式】
▲ 小米 6 本身都內置有人像模式,其實即係在拍攝人像的時候,可以將背景模糊,以突出主體。從上圖可以發現,當你用上人像模式之後,相片的比例會唔同左。另外,從頭髮位置可以留意到,小米 6 在人像模式上的缺憾,明明係頭髮,但手機都將佢 blur 左。不過,呢個並不單是小米 6 的問題,有不少手機的人像模式,都有呢個問題,希望未來可以更進一步改善。
屏幕色準、可視角度、細緻度鬥 iPhone 7 Plus
講完相機,係時候同大家講下小米 6 的屏幕。小米表示,小米 6 可以做到 1nit 亮度,在黑暗環境下唔會咁刺眼。版主在黑暗環境下試過,確實一點也不會刺眼,呢點係值得一讚的。不過,在屏幕部份,大家還是會重視色準、可視角度、細緻度的表現,所以今次版主就將佢拍埋 iPhone 7 Plus 一齊,等大家可以比較一下。▲ 小米 6 最低亮度可以做到 1nit,在黑暗環境下使用手機,都唔會覺得好刺眼。(溫馨提示: 當然最好唔好在咁黑環境睇手機啦,始終都係會壞眼 )
▲ 左面是小米 6,而右面係 iPhone 7 Plus,可以見到在正上方望落去,小米 6 會比較偏藍一點。
▲ 頭先正上方睇,兩部機唔會話相差太遠,但側少少望,開始見到差別漸漸拉大。
▲ 再側啲望,就會見到小米 6 暗了下來,表示可視角度不及 iPhone 7 Plus,而且偏藍情況更明顯。當然,對比之下,iPhone 7 Plus 望落會比較偏黃。
▲ 版主在網上找了兩張一樣的美女圖,放在小米 6 跟 iPhone 7 Plus 做比較。放大來看,雖然小米 6 只有 1080p,但在鮮緻度方面並不比 iPhone 7 Plus 差,可以接受。