平價千元 Pure Android 手機！小米 x 谷歌推小米 A1，好抵玩！

左定坤 (Cho Ting Kwan) 2017-09-04 22:13 | 小米

老老實實，版主並不算特別抗拒大陸品牌手機，你話好多網友批評會將自己的私穩上傳中央，我會覺得：第一，我又無做虧心事，怕條毛咩？佢鍾意咪睇飽佢囉～第二，就算你用其他手機，咪又係一樣有洩露私隱的可能，只不過係洩露俾其他國家，而不是大陸。以中國手機品牌來說，版主一向推薦魅族／華為，反而對小米的感覺就屬一般，而我覺得最主要的原因是 UI 問題，用唔慣，唔知大家有無咁嘅感覺呢？不過，而家運行 Pure Android 的小米手機 - 小米 A1，終於都要來了！賣幾錢，網友又會否因此而投入小米懷抱呢？睇下文啦！



先講賣價，小米 A1 將於 9 月 7 日開賣，印度定價為 14999 盧比，折合港幣約 $1844，而香港建議零售價則為 $1799，仲平過印度價，呢個價錢聽落唔算貴，但可以換來甚麼樣的配置呢？如之前所說，小米 A1 是小米 5X 的變種版，但與此同時是小米首部同 Google 合作推出的 Android One 手機，採用了 5.5 吋 1080p 芒，配備了 Qualcomm Snapdragon 625 慳電 U，內置 4GB RAM 以及 64GB ROM，電池容量有 3080mAh，相機用上了雙鏡頭設計，兩個鏡頭分別為 1200 萬像素廣角 + 1200 萬像素長焦，而前置鏡頭則用上 500 萬像素。顏色方面有黑、金、玫瑰金三種選擇。

雖然整體上配置跟小米 5X 非常相似，但由於今次同 Google 合作，用原生 Android，比小米 5X 近乎一樣價 (小米 5X 32GB 和 64GB 賣價分別約 $1586 和 $1830），都尚算挺有吸引力吧？網友又點睇呢？對呢部小米 A1 有無興趣？留言討論下啦！



小米 A1 在文章發表時，建議零售價為 $1799，按這裡有詳細規格及最新賣價。