。今日小米除咗發表小米 MIX 2s 以及紅米 Note 5 兩部機，同時亦都宣佈咗另一個消息：新小米之家將於 5 月初開幕，並且在開幕當日，會有限時劈價優惠，當中的小米 MIX 2 限時劈價 $1000，網友又會唔會敗呢？想了解更多詳情，睇下文啦！
小米今日宣佈，全新旺角創興廣場的小米之家分店，將於 5 月 4 日正式開幕，到時亦會邀請傳媒到新店參觀。不過，間舖有幾大，都唔係重點，重點是為咗慶祝新店開幕，小米會推出限時優惠，在開幕當日將部份產品平價出售。優惠產品包括有小米 MIX 2 Unibody、米家 IH 電飯煲、小米空氣淨化器 2S 等等，當中的小米 MIX 2 Unibody 劈價 $1000，優惠價為 $4499，而電飯煲同空氣淨化器，則分別減 $100 以及 $150。另外，仲有多款產品提供贈品以及加價換購優惠。
▲ 要注意的是，米家行車記錄儀以及小米行動電源 (高配版)，是屬於加購優惠，米家行車記錄儀係買其他產品滿 $399 先可以優惠價加購，而小米行動電源則是買滿 $299 以 $99 加購。
不過，$4499 買小米 MIX 2 Unibody，係唔係真係抵玩呢？在未出小米 MIX 2s 之前，個人認為都仲勉強可以接受，但小米 MIX 2s 出咗之後，我就會覺得成件事變得不一樣了，畢竟 6GB / 128GB 的小米 MIX 2s 都不過是 $4399 啫嘛，仲平過小米 MIX 2 Unibody，又有 S845 處理器，你又點睇呢？