2K 大芒＋3GB RAM＋ S801＋3000mAh 可換電！ Find 7 千元價
如果大家熟悉版主標題黨的屬性，應該一下子就會估到，今次減價的手機又係來自 Oppo ，主角又係 Find 7 系列！無錯，近日網上又有網友提到， Oppo 大減價又又又出現了！但大家唔好爆粗住，因為不論係價錢還是性價比方面， Oppo 個減價都係有睇頭的！首先係版主上次提過的 Find 7a 大減價再度回歸，單買一部只係 127 美金，計返港幣都只係 $986 ，最平可以去到 110 美金，即係 $854 港幣！不過，因為呢部機只有 US Version，所以並不支援香港的 FDD-LTE 。如果只有美版可選，其實 Find 7a 減到一千有找都唔著數。不過，今次 Oppo Flash Sale 勝在有 Find 7a 的親生兄弟 Find 7 減價！以規格而言， Find 7 當然更好， 5.5 吋芒有 2K 解像度，有 S801 處理器同時仲有 3GB RAM 以及 32GB 內置容量。更加重要係，同 Find 7a 不同。不論係黑色還是白色版本， Find 7 都是國際版，所以香港是用的 4G 的。價錢方面，單買一部價錢係 149 美金，即係港幣 $1115 ，如果買 3 部就可以去到 129 美金，剛剛好一千蚊！
▲ 今次 Flash Sale 裡面同樣有 Find 7a ，價錢係平但性價比就唔夠 Find 7 高啦！
▲ 如果 Find 7 係 US Version ，版主都唔會諗住寫，但 Find 7 係國際版，成件事就唔同晒！
▲Oppo 話明買三部會平到 129 美金，當中並不限於 Find 7 ，買其他型號都可以。
唔想要 Oppo 又想要平價 S801 手機？都有唔少選擇
對於 Oppo 手機，喜歡的網友會覺得好抵好值得入手，但都有網友會覺得係「垃圾廠」出品。如果都想入手千元樓下 S801 手機，又有咩選擇呢？之前版主提過的小米 4 而家係深水埗福仁場內只係 $980，一樣係千元有找。如果國產機不作考慮的話，看來就只有 HTC 的 E8 以及 Butterfly 2 可以考慮，但價錢都同上述「國產機」有段距離。唔知大家又點睇呢？留言講講吧！
▲小米 4 之前有細鋪引入左聯通版，但當時價錢仲要一千樓上，近日新一批就不用了。
▲ 如果係 HTC E8 ，大家都知衛訊仲有，但 Butterfly 2 就只有部份豐澤有了，如果係深水埗細鋪的話，價錢就會平多 $100 ，不過有無貨都係個問題。
連結：OppoStyle
在文章發佈的時侯， Oppo Find 7a （美版）優惠價 $986 ，按此看詳細規格和最新賣價。
在文章發佈的時侯， Oppo Find 7 優惠價 $1115 ，按此看詳細規格和最新賣價。
在文章發佈時，小米 4 不會在香港開賣，按此看手機詳細規格。