平過 Nokia 7 Plus、魅族 15!S660 手機大舖再減,邊部你會揀?
|
Vivo
今次版主想講的大舖,唔係一般平時講開「四大舖」(衛訊、豐澤、百老匯、蘇寧),而係講緊中原電器。話說最近經過旺角 MOKO 嘅中原,突然間發現原來佢哋都仲有賣 Vivo X20 Plus,而且賣價仲比起出面一般的大舖平好多,只係賣 $3080。睇返出面大舖,都係賣緊 $3698,而家中原平咗成 $600,會唔會更加吸引到網友入手呢?
(版主聽聞,蘇寧接收哂 X20 Plus 貨尾,口價可以做到 $2980 喎。但係唔係間間店舖都做到? 有興趣入手的網友可以親身去分店問下)
你可能會問,Vivo 而家都出到 X21 啦,何必仲要去買舊貨呢?說話就唔係咁講,其實 X20 Plus 同 X21,大家都係用上 S660 處理器,只係前者就只有 4GB / 64GB,而後者就有 6GB / 128GB。特別地方係唔係好多?最特別的賣點咪就係 X21 有屏下指紋囉。咁即係代表啲乜? 其實有屏下指紋,又真係唔代表到啲乜,Gimmick 黎架啫,又唔係用咗會識飛。再比較返,X20 Plus 又要無 M 字額,而且電量仲有 3905mAh,續航應該會比 X21 更強。如果唔係太過追求屏下指紋,我個人認為大家都係 S660,都係買 X20 Plus 好過啦。
至於 Nokia 7 Plus 以及魅族 15,現時依然維持着 $3188 以及 $3099。雖然其實三部機價錢都唔相差好遠,但都叫做係俾 Vivo X20 Plus 超越咗嘅。呢幾部價錢相若嘅 S660 手機之中,網友又會點樣去揀呢?
Vivo X20 Plus 在文章發表時,中原最平賣價為 $3080,按這裡有詳細規格及最新賣價。