Microsoft 推出全新網上 Trade-in 服務!足不出戶放機夠方便!
Microsoft 香港今日推出網上 Trade-in 服務,顧名思義就係網上就可放機,唔需要下下跑出旺角。流程好簡單,只要係網上選擇自己想賣既裝置型號同埋狀況,就會由系統自動報價,再可以約時間搵人上門收機,如果檢查過機身沒有問題,就會自動將 Microsoft 的電子優惠券存入帳號入面。而回收既機種入面,最舊包括到 iPad 第一代, HTC HD7 等超舊既手機/平板,比起只收 iPad 2 以後的 Apple 回收服務範圍更廣,甚至有些舊到先達都唔收既機,佢都包含在內(當然價錢唔會高…)。而大家都留意到回收的錢是換回 Microsoft 電子優惠券,換句話說就限定要在 Microsoft Online Store 消費先可以用到 Trade-in 的錢,版主見到比較吸引的就是 Surface 3 與 Surface 3 Pro ,雖然亦有些筆電與「國牌平板」賣,但在深水埗場內隨時可以用更平價錢入手,唔需要係網上訂啊。(不過可以用來買 XBOX One 就真)
▲ Trade-in 過程好簡單,首先係上網登記,然後係有人上門收機,可以足不出戶就完成整個程序,算係幾方便
Microsoft 出手價錢靚嗎?最抵玩竟然係賣 Surface 2 !
對於好多網黎講,在意既唔係 Trade-in 係咪方便,而係回收價抵唔抵,而 Microsoft 是以機身狀況去定回收價的。可以選擇的機身狀況包括完好、輕微損耗與損壞,以一般人的使用習慣來講,用一兩年應該都是輕微損耗的地步吧?就是不知道 Microsoft 的檢查有多嚴格,而版主參考過「完好」的價錢, iPad Mini 第一代的回收價仲有 $1,000 ,而 iPhone 5 (16GB) 的回收價亦只比先達低一點啊,價錢已經比起 Apple 回收計劃好得多(上次第二代 iPad Mini 回收價只有 $960…)版主都試玩過系統一陣,發現 Microsoft 自家的 Surface 2 算係「抵賣」既一部機,因為當年推出的 Surface 2 只係用 Windows RT 系統,說白一點就是功能有限,而原價 $3,488 的 Surface 2 (32GB) 而家仲可以用 $2,000 去回收,先達都收唔到呢個價啦,不過版主查過 64GB 同樣都係收 $2,000 ,其實當年大家覺得自己「中伏」買左部 Windows RT 平板,都可以趁呢個機會換新機啊!
▲左邊是 iPad Mini 1 (Wi-Fi + 4G) 的價錢,仲賣到 $970 算係唔錯啦;而 iPhone 5 16GB 收番 $1,100 比起先達的低 $200~$300 ,但留意要齊配件同埋冇花比較難。
▲紅米 Note 回收價仲有 $500 真係算係咁;而 iPhone 6 (16GB) 呢?回收價 $3,880 比起先達低唔少,究竟邊款機抵真係要自己上網查過再評估!
情況 | 完好 | 輕微損耗 | 損壞 |
條件 | -正常開機 -機身及屏幕沒有刮痕 -配件齊全(如電池等) -主要功能正常(如觸控屏幕、相機等) |
-可以開機 -機身及觸控屏幕有少量刮痕 -主要功能正常(如觸控屏幕等) -配件不齊全(如電池、充電器、耳機等) |
-不能開機 -LCD屏幕損毀或破裂 機身破裂或缺少零件(如按鈕、電池蓋等) -不能啟動服務 -不能使用主要功能(如觸控屏幕、相機等) |
Microsoft Online Trade-in 網址:
//microsoftstoretradein.litong.com/takeback/takeback/startSelectDevice