早上六點五十分
小弟早上五點半起床,六點就出門坐巴士、地鐵到尖沙咀站,原來做果迷第一步已經咁辛苦!
▲ 小弟踏出尖沙咀站 A1 出口,走到海防道附近已經見到大量「保安」人員同鐵馬,唔講仲以為邊個團體遊行示威。( 模糊左係唔想出人地個樣~ )
▲ 轉入廣東道,一路已經架設好鐵馬迎接我,跟住就係排隊啦。
▲ 係我前面已經有成百人排緊,蘋果尋晚唔比人排隊,所以大家都話自己好早就到。為防有人插隊,蘋果出動黑手帶比排隊果迷戴住。
▲ 現場有工作人員同你做登記,登記咩? 因為蘋果方面要影相,怕之後商業使用你既相片會引起不必要既法律問題,所以會叫你簽翻個大名~
早上七點十五分
等又再等,我發現身邊既排隊人士,好多都係蘋果其他分店既「便衣藍精靈」,同現場既藍精靈有講有少打招呼,真係好溫馨~
▲ 背向鏡頭間條衫呢位係蘋果既香港高層黎架,藍精靈為在場既排隊人士擊掌打打氣!
▲ 聽聞排隊排左幾百人,警察叔叔當然要循例黎問下發生咩事。。。警察竟然會唔知蘋果開店?
▲ 眼見大家排隊好熱,蘋果方面都好似以前咁,派發樽裝水比大家解下渴,無咁辛苦! 真係一車車水咁出!
▲ 頭先講果位蘋果高層,當然少不了同熱情既果迷合,點解話佢熱情? 你望下佢件衫就知道啦!
早上八點十五分
小弟一路等,眼見都有幾位果迷唔夠忠誠,臨時走佬! 真係無堅持無恆心,睇黎唔係真果粉! 現場大家都係吹下水,睇下 Facebook,上下網打發時間。
▲ 但呢個時候天降甘露,好彩只係降左唔到十分鐘咋! 莫非貴人出門招風雨?
▲ 現場甚至有媽媽帶同小果迷到現場支持蘋果新店開幕!
▲ 現場記者越來越多,企曬係條隊既附近做採訪。有送報紙既姐姐懷疑不滿「此路不通」,更拆除現場既封鎖線! 咁霸氣? 係,不過走左就無事啦,我地繼續排隊!
▲ 隨著越來越近九點,附近食花生既人都越來越多,當然有部分係蘋果高層走去對面馬路做勢啦!
早上八點四十五分
仲有十五分鐘咋,我就可以入去新店朝聖啦!身邊唔少果迷又跳又叫,好似中左六合彩咁。。。
▲ 藍精靈開始企曬係門口附近,準備歡迎入場朝聖既果迷,包括身上無任何蘋果產品既我!
▲ 透過呢塊玻璃,大家可以見到藍精靈開始大舉進軍啦! 越來越多,多到數唔曬!
▲ 現場有人同我一樣咁大膽,竟然攞出唔係蘋果既產品,仲要高舉拍攝?
早上九點正
哇,終於開幕啦,果迷同藍精靈擁作一團,互相擊掌慶祝蘋果香港第四分店終於正式開張啦!
蘋果尖沙咀店開幕第一刻!
Posted by ePrice HK on 2015年7月29日
▲ 按照傳統,一班藍精靈同樣企曬係大門,大叫廣東道英文,跟住係咁拍手!
▲ 果迷同藍精靈都樂在其中,人人都面帶笑容,氣氛好鬼開心~
三層分店內部係點?
尖沙咀店同樣有三層,其中一層係地庫,我帶大家去睇睇一樓先,一樓係「天才巴」黎,姐係維修呀、解答你電腦問題之類既地方~
▲ 唔記得講,果迷早上排隊為咩? 其中一部分係為左件「紀念T」,姐係人人手中既白色盒!
▲ 感謝呢位果迷為大家展示一下件衫,全白色,心口正中間有個蘋果 Logo,就係咁多~
▲ 跟住帶大家落去地庫望下,小心梯級,因為我都絆倒了兩次。。。
▲ 呢層主力賣好多配件,包括原廠配件或者周邊產品,例如觸控筆之類都有。現場果迷都好興奮地話要買、買、買!
▲ 跟住上翻 G/F,姐係賣「i」產品既地方。小弟建議,女士們去蘋果店內行呢條樓梯時要小心走光,因為「可視角度」真係好大!
▲ 現場除左一地都係藍精靈外,其實日常營運時期,店內有齊全部既蘋果產品比大家試玩。
▲ BTW,今日明明係星期四,但好多果迷好似唔使返工咁 (暑假果迷唔使翻學~),到我走既時候係大排長龍,排到去地鐵站啦!
通常加映:「果 T」 開箱
都知道你班網友想知道件「果 T」係咩一回事,我就加入開箱分享啦! 每位入場既果迷都會獲發一盒限量「果 T」,上面你已經見到全相,係白色!
▲ 個盒全白,有波浪紋~
▲ 封口貼紙都有蘋果既 Logo!
▲ 終於出現啦,捲起來的「果 T」就在盒中!
▲ 好似無得選擇 Size。。。但就 Made In USA 美國製造~
▲ 正中間呢個蘋果 Logo 真係好唔明顯~
小弟既全記錄就分享到呢度,有咩問題歡迎係度一齊討論同分享啦!