圓形錶面設計，搭配可旋轉錶圈
Samsung Gear S2 系列包括左兩款智能手錶，分別為 Gear S2 以及 Gear S2 Classic，前者比較有運動風格，專為追求簡約時尚嘅人而設 ; 而後者就相對地比較經典啲，專為追求傳統設計嘅人而設。首先就個人黎講，版主比較中意 Gear S2 Classic 嘅造型，因為版主之前都提過，我係一個比較中意復古嘢嘅人，所以呢隻手錶真係啱我口味。
今次呢兩隻錶一改以往嘅風格，不再是 Gear S 的方形錶面設計，而是改用了圓形錶面設計，相比之下更具特色。另外，Apple Watch 有旋轉式按鈕，而 Gear S2 系列就參考了 Apple Watch 的設計，配備左獨特、可旋轉嘅金屬邊框，兩者喺功能上都有異曲同工之妙，都係用來滾動屏幕內容，但比起其他普通嘅智能手錶就更加方便實用。顏色方面，Gear S2 將會推出深灰色及銀色，而 Gear S2 Classic 則只有黑色。
▲ Gear S2 以及 Gear S2 Classic 的正面比較圖，左圖為 Gear S2，右圖則為 Gear S2 Classic。呢兩隻手錶在尺吋上都有所不同，Gear S2 的尺吋為 42.3 x 49.8 x 11.4 mm，而經典版的尺吋則為 39.9 x 43.6 x 11.4 mm。
▲ Gear S2 系列採用了 1.2 吋圓形 Super AMOLED 360 x 360 解像度嘅觸控屏，並設有可旋轉錶圈，用來滾動屏幕的內容。你可以見到右面有兩個實體按鍵，佢地分別為 HOME 鍵以及返回鍵，能夠令你更迅速同埋輕鬆咁接收各項通知及應用程式。
▲ Gear S2 採用了膠製錶帶，而 Gear S2 Classic 則採用了黑色的皮革錶帶。當然，你亦可以自行購買其他的錶帶，Gear S2 系列除左有紅色同暖灰色兩款錶帶之外，Samsung 亦同意大利著名設計師合作推出四款 Mendini 錶帶，增添獨特、時尚色彩。而 Gear S2 Classic 則提供左啡色同灰色真皮錶帶，讓你隨時可以更換。
▲ 底部你會看到有個心率感應器。
▲ 重量方面，Gear S2 重 42 g，而 Gear S2 Classic 則重 47g。但戴左上手之後，其實同普通手錶差不多，唔會話特別重。
Tizen 自家系統，不再局限於 Samsung 旗艦手機
而家市面上大部份嘅智能手錶，通常唔係 Android Wear，就係 Apple Watch，就好似版主啱啱今個月初喺 Huawei 發佈會上試玩果隻 Huawei Watch 咁，就係 Android Wear 嘅典型例子。Huawei Watch 同 Gear S2 系列一樣，都係採用圓形錶面。當初玩 Huawei Watch 個感覺係：正! 但同 Gear S2 相比，簡直就係小巫見大巫。Gear S2 除左多左個可旋轉錶圈之外，最大的不同在於 Gear S2 係運行 Samsung 自家的 Tizen 系統，而非 Huawei Watch 的 Android Wear。透過最新嘅 Tizen 作業系統，配合優化嘅 1 GHz 雙核心處理器、512MB RAM 以及 4GB ROM，能夠令 Gear S2 執行指令嘅時候更加容易同埋有效率。而電池方面，Gear S2 同埋 Gear S2 Classic 同樣採用了 250 mAh 電池，雖然電量上比 Huawei Watch 少，但都能夠用到 2 至 3 日，版主覺得都算合理。
咁首先介紹一下 Gear S2 嘅基本功能先:
基本功能 (1)：更換錶盤
▲ 講起上黎呢個真係非常基本嘅功能，只要你喺錶盤界面上長按，就會出現錶面選擇嘅畫面，用手指左右撥動或者扭動佢嘅金屬邊框，就可以按照你的風格更換喜歡的錶盤。
▲ 俾幾個唔同嘅錶面大家睇下啦!
▲ 比較值得一提嘅係呢個「活動氣泡」錶面，佢可以在錶盤上計算你坐喺度同埋運動嘅時間，灰色代表坐喺時間，而綠色代表你運動嘅時間。如果你坐得愈耐，咁灰色所佔的空間就愈大。所以如果你發覺灰色同綠色嘅比例太過唔平均，你就可以知道，自己係時候要做郁動了。
基本功能 (2)：音樂播放
▲ 咁你要播歌嘅話，咁當然你首先要開啟你嘅功能表先啦! 咁到底點去功能表呢? 首先你要喺錶面嘅界面向右撥，就會見到功能表。
▲ 按入「應用程式」，轉動金屬邊框，就可以滾動功能表到你想打開嘅 App，咁你要播歌就當然要開「音樂播放器」啦!
▲ 入到去你會見到，藍牙已中斷連接。咁因為初次使用都需要透過藍牙去將你手機入面嘅歌移到手錶上，轉移左之後，下次就唔需要再連藍牙都能夠一邊跑步，一邊聽歌。
基本功能 (3)：S Health
▲ S Health 亦可以幫助你去記低每日行嘅步數、運動時間以及心跳狀況，將資料同步到手機就可以幫你監察健康狀況。
▲ 按開始就會開始記錄你嘅健康狀況。
▲ 首先第一個畫面是偵測你整體嘅活動情況，就好似版主行左一段路，郁黎郁去，咁就會顯示「不錯」。
▲ 從右向左撥，你會見到步數計算器，呢個唔洗點解釋都知道，就係計算你行左幾多路。
▲ 再撥就有個心跳感應嘅功能，而家正在測量你的心跳情況。
▲ 最後得出結果是，每分鐘心跳 95 下。
基本功能 (4)：Find My Phone
▲ Gear S2 系列將會有 Find My Phone 嘅功能，咁當然大前提你都係要連左藍芽同你嘅手機同步左先啦! 咁如果你同步左之後，按 Find My Phone，咁你嘅手機就會響起，等你知道你嘅電話位置係邊。
Tizen 一直俾人嘅印象係一個封閉式嘅系統，因為以往 Tizen 只能夠與自家 Samsung 嘅旗艦電話連接。但而家唔同喇! 只要你嘅手機喺運行 Android 4.4 或以上，並且擁有不少於 1.5 GB RAM，就能夠同 Gear S2 連接。雖然過往 Tizen 系統做得唔係話特別出色，但經過 Samsung 重新設計之後，就會發覺 Tizen 系統比以前更加方便同美觀。你除左可以有不同的錶盤選擇，仲有嘅係只要你將你嘅 Gear S2 同你嘅 Android 手機同步，就能夠在手錶上見到你手機上所有的通知以及其他嘅資訊。對於唔中意用 Android Wear 或者 Apple Watch 嘅人黎講，Tizen 可以帶俾你與別不同嘅體驗，係你可以考慮嘅第三個選擇。
基本功能 (5)：收發 Whatsapp / Line
只要你將你嘅手錶同埋 Android 手機進行藍芽連接，咁你就可以收到來自手機的通知。
▲ 例如有人 Whatsapp 你，你只要在錶面界面上從左邊向右撥，你就可以看到 Whatsapp 的通知。從上圖可見，Gear S2 能夠完美支援繁體中文以及英文。
▲ 之後按入去，你可以按箭咀符號，回覆你嘅朋友。
▲ 至於回覆朋友，你都可以有三種方式：第一種是語音，第二種是 Emoji，而第三種就是文字輸入，你可以使用筆劃輸入法去輸入你嘅文字。
▲ 如果按中間果個 Emoji，就會出現呢個畫面。
▲ 轉換邊框可以讓你選擇適合的表情圖案。
▲ 而如果你使用文字輸入，咁就可以用筆劃輸入法去打字，中文又得，英文都得。
Gear S2 藍芽連接方法
▲ 首先最基本嘅係，你要喺手機上下載一個叫做 Gear Manager 嘅應用程式。不過由於 Gear Manager 目前尚未上架，所以可以使用 Samsung Gear 呢個應用程式代替，你可以利用呢個應用程式去管理你隻 Gear S2，亦可以將你嘅手機資料同步到 Gear S2 上。進入應用程式之後，你可以按「CONNECT TO GEAR」，然後搵番你隻手錶嘅型號。
▲ 然後按「配對」，就可以同步你嘅手機。不過佢可能會要你下載埋 Gear Plugin 呢個 App，以用到佢更多嘅功能。
▲ 之後你就可以利用 Samsung Gear App，控制你嘅手錶。例如你可以在手機上更改手錶的錶面，亦可以選擇性收到指定軟件的通知。「Send Media」可以讓你從手機上將相片、音樂轉移到手錶上，而 Samsung Gear Apps 就可以進入 Gear 版的 PlayStore，可以下載更多的軟件以及錶面圖案。
Gear S2 系列手錶規格
最後俾大家睇下呢兩款手錶嘅規格，讓大家參考一下:
介紹完 Gear S2 以及 Gear S2 Classic 的外型、基本功能以及簡單測試過藍芽連接，唔知大家對呢個系列嘅智能手錶有無興趣呢? 講有無興趣之前，相信大家最想知道嘅係佢地嘅價錢。售價方面，Gear S2 的建議零售價為 HK$2588，而 Gear S2 Classic 的建議零售價則為 HK$2888，睇完價錢之後，你仲有無興趣呢? 你覺得呢系列嘅手錶同 Huawei Watch 或者 Apple Watch 相比，邊隻手錶最好? 留言講下你嘅意見啦!