其實網友報告既展覽係第一回合，我同大家分享既會係第二擊黎架！ 三個主要展區，分別係「樂高X星戰」、千年鷹號場景、真人原大模型區！ 點解我會話呢次展覽係星戰、樂高迷比到呢？ 因爲展覽有 6 米高 AT-AT 機械獸、X-Wing 戰機，以及大量 Lego 版星球大戰公仔！ 而全球首都曝光得 1：6 Jakku 星大型情景模型，更將星戰最新電影內的其中一幕完美展現！ 最吸引我的莫過於真人原大的模型區，近距離睇曬各大主角，真係正到爆炸！ 下面小弟將會分區形式，Post 大量圖比 ePriceHK 網友搶先睇，GOGOGO！
１）樂高® 星球大戰大型展覽
呢個大型展覽真係好大型既關係，時代廣場方面整左個「小型示意模型」比大家知道究竟發生緊咩事，下面大致分爲三個場景，第一個當然係左邊的 AT-AT 機械獸，中間係黑武士君臨的場景，再過少少就係 LEGO 人物角色，最右邊就係 X-Wing 戰鬥機喇！
模型就已經非常精緻，但放大版一樣吸引、造工毫不馬虎，仲可以比網友們近距離睇真 D！ 小弟我率先爲大家近距離潛入場地，拍攝大量實況圖！ 首先登場既係 AT-AT 機械獸，以及一衆負責送死的白兵和反抗軍士兵～
跟住就係黑武士君臨的場景，隔離有皇帝，以及兩個二打六護衛（其實佢兩個好打得）～
最得意應該係下面一排幾組的星球大戰角色 LEGO 版，縮到半個成年人咁既高度，岩嗮喜歡影相既小朋友啦～
心水清既網友可能會問我，咁部 X-Wing 戰機呢？ 主辦單位就話，X-Wing 的大型 LEGO 版要等到 12 月 3 日先正式起好，將會放置係時代廣場大電視下方位置。如果對大型星戰 LEGO 無興趣？ 唔使怕，展覽其實隱藏左小型 LEGO 既展區，裏面全部都有大師加持過既星戰 LEGO 作品，仲有 1：1 既激光劍！
２）<<星球大戰:原力覺醒>> Hot Toys 1:6千歲鷹巨型場景佈置
參觀完可以直上時代廣場二樓，就會見到令星戰迷（包括我）非常興奮既場面，噔噔登登！
３）《星球大戰:原力覺醒》獨家珍貴真人原大人像
其實就在隔離已經係呢個細展區，展出 1：1 大小的新角色，我名都未記得清除，只係記得個波波機械人，因爲個玩具遙控好正～ 呢批真人原大人像按照電影裏面的造型，還原翻係你我眼前，包括手上的武器和裝飾！
我都知道部分網友有家室，去呢個展覽又唔好意思撇低老婆仔女，所以都講埋同期舉行既活動：時代廣場工作坊。 送你老婆仔女去玩工作坊，你自己咪有時間慢慢睇展覽囉！工作坊內，有三款可愛的迷你樂高模型，包括雪人，聖誕鹿以及聖誕車。希望藉著迷你作品的小數顆粒啟發小朋友的大大創意，亦期望藉著工作坊為小朋友帶來自信心和創造力。詳細資料如下：
日期：11月21-22 日; 11月28 -29 日;12月 5-6 日 12月12 -13日; 12月19-20日; 12月25-27日
時間：12:00 -12:45pm / 1:00 -1: 45pm / 2:00 -2: 45pm / 3:00 -3: 45pm / 4:00 -4: 45pm / 5:00– 5: 45pm (工作坊每節參加者名額為8人)
地點：銅鑼灣 時代廣場13A/F Kids Square
參加辦法：
1.如欲參加，請於工作坊當日前往2/F客戶服務部領取學習券。
2.工作坊每節時段開始前30分鐘，2/F客戶服務部將開放排隊區以供參加者排隊領取學習券。
3.工作坊每節參加者名額為8人，每名排隊之客人最多可領取學習券1 張。排隊人數到達名額便會截龍。
更多展覽資料：
展覽名稱：《星球大戰》X 時代廣場大型展覽 第二擊
開放日期：11 月 25 日至 2016 年 1 月 1 日
開放時間：上午10時至晚上10時
展出地點：時代廣場 露天廣場 及 二樓大堂