【新增 Surface Pro 3 、Qualcomm Quick Charge 3.0 快充、Sandisk 960GB SSD】
好多朋友一聽到係美國買野都會嫌搞送貨方式唔方便，所以今次介紹裡面，會分為無需代購/集運，以及折扣很吸引但需要透過代購/集運入手的：手機/平板/手錶/ Chromebook 。另外，因為距離 Black Friday 仲有兩日，但現時已經有不少「早鳥優惠」出左，大家不一定要等到星期五先郁手，同時呢篇文章亦會盡量不停更新。由於 Black Friday 的優惠實在太多，版主一人之力都好難網羅所有著數，所以大家有心水都可以留言分享啊！
Free Shipping ／不用代購類別：
好多時大家想到係美國地區的網購都係透過 Amazon 規模相當大但係不支持全球送貨，需要用家透過代購或者集運等方式取得貨品的平台。不過呢類方式應該不少朋友都會怕麻煩。其實不少品牌係搞 Black Friday 的優惠的同時亦免埋運費的，以下就係好例子。
6 吋大芒仲有 4100mAH 大電！ Oppo R7 Plus 減一百美金再送多支自神棍
首先講左多人留意的手機類別先。版主留意到好多網友都想知 Nexus 6P 以及 5X 會唔會有優惠，不過講到抵玩其實 Oppo Style 的優惠可能更吸引。係香港未有零售渠道的 Oppo 一向以 Oppo Style 呢個網站賣機，而版主都分享過之前 Oppo 的大優惠好似係 Find 7 劈價等等。今年來講， Oppo 暫時都只係得定位中階的 R7 以及 R7 Plus 打天下，係定價上都好難稱得上抵玩。不過，今次 Oppo 襯 Black Friday 推出左個買機優惠， 5 吋芒的 R7 以及 6 吋大芒的 R7 Plus 都有份，除左會減價 100 美金之外仲會送多支「自拍神棍」。減價之後， R7 Plus 價錢為 399 美金（約為 $3092 港幣)而 R7 價錢為 299 美金（約為 $2317 港幣）。老實講，本身 Oppo 對呢兩部機的定價明顯是天價，而家呢個價錢算係到返合理水平，但又未算好抵玩，不過香港係免運費的，都算係一個優勢。（留意，到 Oppo Style 記得買 International Version ， US 版本沒有 FDD LTE 的）參考網址： OppoStyle
優惠日期： 11 月 27 日（換算作香港時間 07:00am 開始，亦即是歐洲中部時間 00:00 CET 至 23:59:59 ）
▲ OPPO R7 Plus 之前 YK 都有試過，以續航力來計真係不錯。
最平五舊水的 Smart Watch！ Pebble Time 仲有 65 折
Pebble 係香港其實已經可以買到行貨，但係大家一樣可以係其官網上買錶同時係免運費的。以往 Pebble 都有搞 Black Friday 優惠活動，今年版主覺得可以留意的就有 Pebble Time 以及 Pebble Classic 兩款。價錢比較貴但有彩芒的 Pebble Time 係減價最勁果款，價錢由 200 美金一口氣劈 70 美金到 130 ，足足有 65 折！如果想要平的話就可以考慮下 Pebble Classic ，雖然只係得單色芒，但價錢就減到 70 美金，大約係 $534 蚊咋。另外，可以留意， Pebble 官網上等多一陣係會有 10% off 優惠比消費者，之後買 Pebble Time Round 就有九折了。
▲想用九折買 Pebble Time Round 的話，係輸入左 email 就即時可享用了。
▲ Pebble Time 一下子減 70 美金，係減價比較勁的一款。
參考網址：Pebble 官網
優惠日期：仲睇？而家開始左啦！
網友報料： NATIVE UNION 半價優惠，買滿 $1000 免運費
有熱心網友提到，原來 NATIVE UNION 係 27 號 Black Friday 期間亦有優惠，而且係買滿 $1000 可以免運費。當中有 iPhone 配件做緊半價呢！如果有興趣的朋友可以留意下。
▲ NATIVE UNION 產品係減價後，要滿足到消費滿一千免運費呢個要求都唔難呢。
參考網址：NATIVE UNION
優惠日期：11 月 27 日至 11 月 30 日
需要透過代購／集運，但同樣抵玩類別
有 Free Shipping 固然抵玩，但係好多時優惠都唔係垂手可得的。接下來版主會分享下有甚麼產品價錢相當吸引，但需要大家透過代購／集運等方式入手。代購／集運方式選擇相當多，版主都好難一次過介紹曬。不過，對於沒有相關經驗的朋友來說，呢篇 Chromebook 入手攻略都係一定參考價值的。
更多資料：美國代購方法參考
【更新】Microsoft 帶頭減價！Best Buy 減更多
剛推出的 Surface Pro 4 規格不錯但價錢就唔算好吸引，唔少人都諗緊入手舊代的 Surface Pro 3 會唔會更著數。 Microsoft 係美國就帶頭減價，係美國的 Microsoft 為響應 Black Friday ，將 Surface Pro 3 價錢最多減 200 美金，講緊嘅就係 Core i3 1.5Ghz 配 4GB RAM 以及 128GB 版本。但係要留意，係美國的 Microsoft Store 係不可以直接運來香港的。要平買 Surface 又唔一定要經美國嘅。 Microsoft store 香港區同時做緊「冬日狂賞」優惠， Surface Pro 3 最多都可以減 $1100 ，雖然減完後價錢都係會貴過特價的美國 Surface Pro 3 ，但運埋運費其實兩者都差不多。
【更新】
Best Buy 終於出招，如果未入手 Surface Pro 3 的朋友要留意了，因為 256GB 的 Core i5 以及 Core i7 版本都有減價，仲要直減 300 美金。 Surface Pro 3 Core i5 256GB 版而家係 Best Buy 做緊 999 美金（約為港紙 $7742 ）而 Core i7 512GB 版就係 1249 美金（約為港紙 $9680）。不過，要留意計左運費後都只係只係平港版少少⋯⋯
▲在美國 Microsoft Store 有 Core i3 版本的 Surface Pro3 可選，呢款係香港 Microsoft Store 所沒有的。
▲到左 Black Friday ，果然 Best Buy 都出招了。
參考網址：Best Buy
充電快到無朋友！ ANKER Qualcomm Quick Charge 3.0 做 65 折
好多朋友的手機可能基本上係支援 Qualcomm Quick Charge 技術，可惜跟機的充電器卻不支援快充，令手機明明好快可以充爆電，最後卻要慢慢等。剛剛有熱心網友提醒版主，原來係 Amazon 減價貨品中，連 ANKER 的快速充電器都有劈價！由 40 美金減到 26 美金（約為 $201HKD），足足有 35% 。但要留意，係美國買的充電器，當然是兩腳插啦！
參考網址：Amazon
SanDisk Ultra II 960GB SSD 半價！
再講下電腦硬件價錢，有網友提到係 Amazon 有 SanDisk 的 960GB SSD 做緊半價！只係 199 美金（約為 $1542 港紙），有興趣的朋友要快手！
參考網址：Amazon
11.6 吋 Lenovo Chromebook 一千有找， Samsung 都有 6 折
首先講左 Chromebook 類別先，好多人對於 Chromebook 印象係局限性大，功能難跟一般 Notebook 相比。但係價錢上卻很有吸引力。今次版主介紹的 Asus Chromebook 價錢一千有找，講緊嘅就係 Lenovo 100s 。呢部 11.6 吋 HD 解像度的 Chromebook 配置上有 Intel Celeron N2840 2.16 GHz 處理器配 2GB RAM 以及 16GB 容量，價錢就由本來的 179 美金減到 129 ，計返港紙一千唔使！（當然運費另計啦）。另外， Samsung XE500C12-K01US 也是一個一以考慮的選擇。係配置上呢部 Samsung Chromebook 一樣係 11.6 吋 HD 芒，處理器係 Intel Celeron 2.16GHz 配 2GB RAM 以及 16GB 容量。雖然唔似得 100s 咁平，但係 XE500C12-K01US 由原價 249 美金直減 100 ，而家只係 149 美金，計返港紙都係 $1154 左右。
▲ 之前仲係講緊兩千有找有 Chrombook ，而家一千有找都做到了。
▲ Samsung 呢部 Chromebook 即減一百美金，都好值得考慮。
參考網址：Amazon （ Lenovo 100s）、 Bestbuy （ Samsung XE500C12-K01US ）
優惠日期：已開始
入手 Kindle 好機會？
Amazon 的 Kindle 係香港算係比較小眾的產品，不過支持者都有唔少。 係 Black Friday 期間 Amazon 一樣有為自家產品提供優惠。以定價比較高但較新的 Kindle Paperwhite 來講，價錢由 120 美金減到 100 ，大約係港紙 $775 左右。而較為便宜的 6 吋芒 Touchscrenn 版本就減更多，由 80 美金減至 50 ，計返港幣係四百蚊都唔使呢！
▲ Kindle 的優惠其實唔算話「跳樓價」，如果計埋運費未必會比係香港買水貨平，呢點大家入手前可以計下先。
參考網址：Amazon （Kindle 6 Touchscreen）、Amazon （Paperwhite）
優惠日期：已開始
參考網址：美國 Microsoft Store 、香港 Microsoft Store
以上就係 Black Friday 部份抵玩的產品，版主仍然有不少選擇都未寫好的，如果大家有心水都不妨分享啊！