力抗政府!再打 Uber!試用 Cetah 全新 call 車 App

Wilson Li 2016-03-11 17:45 | 科技新知
如果講 Call 車 App,應該大家會聯想起 Uber,Uber 係咪係香港最好用就見仁見智,但勝在 Uber 全世界都有,一個 App 係香港用得,係曼谷用得,係中國大陸一樣咁用,只有香港政府口裡說支持,行動卻拘捕。但 Idea 得,又好用,就會有競爭者。最近就有新 Call 車 App 「Cetah」正式運作,亮點佢地唔係收信用卡,係以用代幣方式找數,但佢地把代幣改稱「雞髀」,「雞髀」當錢用,我就搭過了。

//timgm.eprice.com.hk/hk/nb/img/2016-03/11/24618/keithyim_1_1141_75dcbef6d2be3c5488ab49ee08253d81.jpg

低調地在 Facebook 宣傳

Call 車 App 「Cetah」比起外來者 Uber,或者有紅底資金嘅貨 Van App 「GoGo Van」相比,推出得比較低調,亦可能因為都係法例問題,令佢地不能太高調。「Cetah」都係 Call 車 App,叫嘅唔係的士、唔係貨 Van,係私家車接送服務,但佢地表明會相對 Uber 更加合法, 標榜收費相對 Uber 透明,而使用「雞髀」代替當中嘅交易,避免左即時錢銀交易構成法例問題。雖然聲稱合法,但小弟不是法官,唔可以判斷到到底係咪真係違法,不過香港家陣香港政府都係「龍門任佢擺」,所以喺講法律問題前,先講使用體驗,若果大家怕死,或者怕有意外有無賠錢等等,我就建議大家試都唔駛試,繼續捱的士嘅拒載(我試過 5 分鐘俾 3 架的士拒載),你可以關閉瀏覽器,下文唔駛再睇。

司機二㨂一,車資可加可減

有人會問到底 「Cetah」同 Uber 分別喺邊,除左「Cetah」 係用「雞髀」交易外,做法與收費標準都跟 Uber 唔同,例如乘客可以有權選擇,喺 Call 車嗰陣會顯示兩個肯接單嘅司機,顯示兩位司機嘅評分、車輛的新舊、不同的收費,等乘客可以選擇,此外還支援上叫車返中國大陸功能,即係接送你返大陸。

而車資上,「Cetah」同 Uber 嘅分別,就在上車嘅時候已經同司機議定好收費,即使司機點行都好,都係一個收費,當然如果你覺得司機表現好,駕駛夠安全、服務禮貌也周到嘅話,係可以落車決定俾更多 D 錢,但相反,禮貌差過某些劣質的士佬,你可以選擇俾少 D 錢。至於基本嘅收費,跟唔 Uber 收費模式都有 D 唔同,大家見下圖,分別如下:
 
  Uber Cetah
貨 Van $6/公里+$1/分鐘 $8/公里
經濟轎車 $6/公里+$1/分鐘 $8/公里
高級轎車 $8/公里+$1.5/分鐘 $12/公里
跑車 不適用 $16/公里

備注:以上只是官方在平時建議價,Uber在繁忙時間是加成時段應該會更貴,同時 Cetah司機也可能會在繁忙時間自行調高。
 

其實 Cetah 收費係點

有網友可能會問我到底 Cetah 收費係點,其實你當 Cetah 用另一個國家嘅貨幣黎去收費,變相去坐 Cetah係 要用佢地「國家」嘅貨幣,即是雞脾,但雞脾喺每次搭車嗰陣唔洗一個整數咁用,可以存在0.1個雞脾,所以即使坐左60蚊嘅車都係用你 7.5個雞脾,大家可以理解嘅係用緊另一個貨幣交易。另外,當你唔夠雞脾點算呢 ? 其實可以即時用信用卡去「唱錢」返黎,但一次至少10隻雞脾,淨低嘅會儲存喺帳號到,供下次使用。對我黎講都係唔滿意呢樣野,講真一次增值至少用 80 蚊,然後我都唔知下一次會唔會用到 Cetah 嘅車,某程度上都係迫住我自己去坐 Cetah,但到底 Cetah 喺我趕時間時又幫到幾多呢 ? 

親身試玩


//timgm.eprice.com.hk/hk/nb/img/2016-03/11/24618/wilsonhms_3_1141_fc5c9b9e7c77774eb8f52119d18a5a5c.jpg
▲ 首先你就開左個 apps,輸入邊到上車同落車,之後選擇要坐咩車,Cetah就有 4 類車可以揀嘅,有跑車、高級轎車、經濟轎車同貨車,除左跑車外,其他以 Uber 嘅分類,可以理解為 UberBlack、UberX 同 UberVan,當選擇後就會估算價錢,然後可以即時 Call 車。

//timgm.eprice.com.hk/hk/nb/img/2016-03/11/24618/wilsonhms_3_1141_a1720a759ecb75f9e209e99a875333d5.jpg
▲ 即時 call 車時,首先就會向 2 公里內嘅司機接單,然後到 5 公里內嘅司機,不過我首先想試下坐跑車,但好明顯去到 8 公里內得一架跑車,仲要得個吉。

//timgm.eprice.com.hk/hk/nb/img/2016-03/11/24618/wilsonhms_3_1141_b7e940076f7add10ec97770d83975342.jpg
只好選擇高級轎車,因為無得試跑車有小小失望,但可能嗰日係星期六下午,「Cetah」 嘅高級轎車都唔係好多,要去到 5 公里範圍先有司機接我單,而呢個時今次接我單嘅係一架 BMW 730LI,價值近百萬嘅車,當然我要禁入去個選擇到,司機先會黎接我。

//timgm.eprice.com.hk/hk/nb/img/2016-03/11/24618/wilsonhms_3_1141_f30987d3109792ecce22254bd387d97f.jpg
唔同 Uber 嘅係當我接單後,我係唔知道個司機喺邊到黎,只能依賴嘅嘅司機估算個時間,相反 Uber 則會在地圖上顯示到司機會幾時到。

//timgm.eprice.com.hk/hk/nb/img/2016-03/11/24618/wilsonhms_3_1141_0b4a60502b1eee030fdeeede9bac290c.jpg
▲ 當完成左段旅程後,落車就可以為司機嘅態度及車輛黎評分,同時也可以就整體服務決定應該俾幾多隻「雞髀」俾個司機,覺得可以俾多 D 嘅就禁多 D,覺得司機係惡劣嘅係可以俾少 D,直接影響到司機嘅生計,當然作為香港人要從司機角度諗,司機都係人,有小小錯誤都應該要體諒下,至少呢類型 Call 車 App 嘅司機都有質素嘅保證,而當打賞後司機也可以選擇接受與否(未試過唔接受會點)。
 

點樣坐先係最抵 ?

其實 Cetah 整體價錢都係貴過 Uber,雖然首次 Promotion 係送我 70 蚊去坐,但坐完真係未必會坐下一次,要坐嘅真係去坐 Uber仲好,因為平過 Cetah ,對我而言我諗佢除左多一個選擇外,仲有佢嘅預約功能。此外我真係諗唔到有咩理由會將 Cetah 列為首選 call車apps 黎用。

總結:Uber同 Cetah 各有好處

你問我 Uber 與「Cetah」邊個好 D 我都好難去答到你,兩者所提供嘅車種類相差不大,但如果你即時又要趕時間嘅應該係 Call Uber 為佳,但你係知道嗰個時間未必有車嘅但想用車可以選擇 「Cetah」,收費實際上相差不大,可以按自己嘅需求去決定,都唔洗只裝一個 Apps,我認為有競爭下就會有進步,當然我唔知政府遲下會唔會強行打擊呢類型 App,但香港人有選擇係必須嘅,當直接可以用到評分影響到司機表現,而「Cetah」甚至可以用扣錢嘅方式去對表現不佳嘅司機,的確可以確保到質素。不過,小弟都希望大家都唔好有一個「有錢就係皇帝」嘅心態,司機都係人,有小小錯都係好正常嘅事情黎,如果個司機真係唔得嘅可以選擇俾個溫馨嘅提醒。


App 下載資訊
◎ App 名稱:Cetah
◎ 系統需求:Android 2.3 以上 / iOS 6.0 或以上
◎ 下載方式:
免費 Google Play / iTunes

最新新聞