搭小巴,用 Wi-Fi,數據慳番?首推小巴免費 Wi-Fi 版主搶先試伏!
|
科技新知
目前 iFree Group 會在三條小巴路上提供服務,包括從九龍塘出發的 25M、25M (S) 以及新蒲崗出發的 85 號小巴,一共有 36 架車。使用方法好簡單,只要用你嘅手機掃描小巴上的 QR Code,或者直接連接車上的 Wi-Fi,並輸入電郵地址作登記,就可以開始享用無限 Wi-Fi 以及免費 10 分鐘國際長途電話服務。不過老老實實,版主個人就覺得,長途電話服務其實作用不大,理論上不會有人為左打長途電話而搭小巴,這是不設實際的做法,除非咁啱得咁橋,你搭小巴果陣需要打長途電話,就另作別論。
所以重點是 Wi-Fi,不過始終搭小巴的車程實在太短,有人同版主講,九龍塘去浸會大學都係一分鐘左右的路程,咁似乎有得俾你「無限」上網,又有點兒多餘,不過如果未來呢項服務真係擴至不同的交通工具,你又點睇呢? (其實部份飛機已經可以享有 Wi-Fi 上網服務,詳情可參考 Wilson 之前寫過的文章)
▲ iFree Group 集團今日在九龍塘小巴站進行剪綵儀式。
▲ 重點是 Wi-Fi,小巴司機座位旁,會設有路由器。
▲ 小巴內的座位背後,會有 qr code 可以掃描。
▲ 掃完 QR Code 會出現左圖,輸入你的電郵地址作登記,就能登記使用全球漫遊服務。不過因為毋須驗證,似乎就算你打 abcdef@gmail.com,都可以登記到。
▲ 唔講咁多,即刻實試,位置是九龍塘小巴總站。不試猶可,一試把鬼火。點解就連測網速都要咁耐呢?用兩個不同的測速 App 做比較,速度實在驚人,係慢得驚人,下載速度快嘅只有 0.41Mbps,慢嘅更低至 0.16Mbps,速度同網絡商限左速之後差不多,簡直是地獄 mode。
▲ 就連 load 480p 的 YouTube 影片,播左一陣都 load 空氣。係咪真係咁差?
▲ 其實未必真係咁差,點解頭先會試到咁差呢?版主估計係因為果陣未開車,在九龍塘小巴總站位置,有太多記者連住個 Wi-Fi,格硬拖慢左速度。版主問過,佢哋測試過最多可以 22 人連上 Wi-Fi,平均網速大約有 3Mbps 左右。可能太多人連,就出事。版主坐在小巴繞了一圈,當離開九龍塘小巴總站,網絡速度開始穩定番,勉強夠睇片,最快下載速度試過去到 7.48Mbps 架!呢個速度,你又覺得接唔接受到呢?