主題:VPN 被封、用 Shadowsocks 得救? 亂裝翻牆 App 或致資料外洩!

  • 發表時間:2017-08-07 22:10 收錄檢舉
    事先聲明:呢篇文章係分享給電腦小白們睇,如果你係電腦高手請關閉此網頁。開始之前,就等本 YK 長篇大論講個故事比大家聽:曾幾何時大陸網民都好慘,受到世界互聯網不良資訊毒害,但偉大的領導們於心不忍,所以研發出「萬里防火牆」將一切地獄之火隔絕於牆外,「內聯網」得以潔淨和和諧。但香港人真係好邪惡,雖然不論中國移動香港和中國聯通香港,都已經有專線比你入牆時候解解「毒癮」,代價就係比錢就搞掂。但我知道好多人好似本 YK 咁唔想比錢,又要有「跳出跳入」的能力,所以不符合國家安全、毒害世人的「穿越技術」就因而熱門起來。 

    VPN 被封、用 Shadowsocks 得救? 亂裝翻牆 App 或致資料外洩



    好啦,唔講廢話喇,本來我都唔想出文寫標題所關聯的內容,但由於見到越來越多媒體亂吹亂教人用坊間免費「翻牆App」(其實係有好多網友日日 Inbox 打擾本人),用大機構出品的翻牆 App 都尚算良好,最痴線係呢堆翻牆 App 絕大部分都係大陸 App 黎,唔少愚蠢的藍星人一路 Accept 直到永遠阿門,無幾多間媒體會清楚話比大家知道:唔識技術就千奇唔好用,因為你個人資料包括密碼、珍藏資料隨時外洩! 所以,本 YK 在此告知各位電腦小白用免費 / 收費翻牆 App 的問題係乜!

    VPN 被封、用 Shadowsocks 得救? 亂裝翻牆 App 或致資料外洩
    ▲ 不論係 Play Store 或 Apple Store,都係充斥住一大堆強國翻牆 App,號稱免費使用,或者係極低收費使用翻牆服務。


    第一問題:翻牆原理引發安全隱憂
    這裡說的免費翻牆 App,不是說免費開源的 Client 和 Server 軟件,而是說網絡上免費提供的 Server 服務。我提供一個超級簡陋的原理描述:不管是 VPN 還是新興的 Shadowsocks (包括 R 版)係點對點傳送技術,你用免費翻牆 App 就是你的手機(Client),先將資料傳送到不知名第三方伺服器(Server),然後再出公海。問題就是在於第三方伺服器,伺服器擁有者能夠檢測到你的流量、瀏覽資訊、甚至獲取你的個人記錄。因為你裝置使用它的服務,與它建立了互信的通道。所以,見到個 App 係中文名、又有大陸背景、或者無清楚的註冊資料就打醒十二分精神。

    某個 IT 界朋友曾經同我講笑話:對於強國企業黎講,有咩野好過整一個超多人用的翻牆 App,號稱永不被封殺,然後讀取嗮每一個用戶的資料。如果想了解詳細的翻牆技術原理,請參考這個淺白易懂的強國網站,本 YK 已經幫大家轉化為正體中文。所以如果你建立好私家的 Client 和 Server,就可以較為放心地「跳出跳入」。否則,你只能真誠地相信不知名第三方 Server 不會讀取你的瀏覽資料。

    結論:
    任何免費翻牆 App,你所有數據資料都會先經過別人的 Server,大大增加個人資料洩露風險。道理好似你部電腦放係客廳,屋企內任何人行過都會知道你上乜網,睇乜資料一樣,除非你屋企得你一個住,姐係你有私人 Server!


    第二問題:翻牆 App 不可靠、隨時死亡!
    有人利用免費技術,不外乎使用 VPN 或 Shadowsocks 等代理機制製作翻牆 App 圖利。而 VPN 服務時常發生間歇性阻隔的問題,你比錢都未必一定用到。翻牆 App 質素普遍差,經常「一雞死一雞鳴」,用用下倒閉係時有發生的事情。

    有人問:咁 Shadowsocks /(R) 呢? 其實一樣! 圈內人士早就知悉 Shadowsocks 已經玩 X 完,開發者「Clowwindy」公告自己被政府人員帶走請飲咖啡,及後宣布終止項目並刪除所有資料,當然網民大把 backup 啦! 而目前最新的方案 Shadowsocks(R) 由(偽?)女開發者「破娃醬」繼續開發,加入更完善的混淆機制,詳細資料我就不再說落去。

    但正所謂「道高一尺魔高一丈」,穿越技術升級,但祖國淨化能力都會升級,Shadowsocks 在部分城市已經有網友報告出現失效的情況,亦無人知道幾時 Shadowsocks(R) 會死埋,作者早幾個月前已經自爆其機制弱點。所以,翻牆 App 分分鐘係你上大陸果段時間死左,咁你就被困牆內嚕~ (本 YK 去年都試過一次,突然幾日無得做「佛跳牆」,完全無辦法同外界正常聯絡)。

    結論:
    市面上翻牆 App 普遍質素差,收費亦不代表好,會隨時被封死。而且越多人使用同一款翻牆 App 就越容易被封殺。萬一在你進入強國的日子被封,真係叫 YK 都幫唔到你喇!


    溫馨提示:拒絕任何第三方載點
    我提醒有意自行建立 Server 的小白,千萬唔好貪圖方便走去第三方載點下載任何軟件(最好就 check 埋 MD5 啦),你望下早前踢爆大量第三方強國 App Store 提供的獨家 App 都被「強化」就知道。

    VPN 被封、用 Shadowsocks 得救? 亂裝翻牆 App 或致資料外洩
    ▲ 年中都有唔少人幫襯呢類「優質軟件」載點,我代表佢地多謝嗮大家。

    而且,千萬不要話比人知道自己有私家 Server,亦唔好同人分享 Server(From 某網友:如果你係靚女可能會考慮分享 Server),因為多一個人知道 Server 的位置,就多一分被封殺的機會,流量一大就爆煲! 而且人在大陸翻牆係犯法,被人知道會出事拉走的。本 YK 堅決反對任何違法國家安全網絡的行為!!


    全文總結
    請問,有無唔用腦的翻牆方案? 如果閣下無時間、無技術去搞私伙野,咁最佳方案係比錢網絡商買卡、買臨時 Plan,真正快捷又可靠的方案,斷估你都係上去個零星期掛? 不過,曾經有網友話自己連網絡商都信唔過,怕會讀取佢資料。咁你都係做翻個堅決保衛國家網絡安全的良好黨員,或者唔好上強國喇!

    關於翻牆卡資料,版主其實之前都分享過好多,下面列出其中幾個熱門方案:
    無限 4G 中港翻牆上網 + 中港 通話!中國聯通跨境王 3 日及 5 日卡​
    Apple SIM 大敵! 日本上網實測 AIRSim 首張百變 Cloud SIM 旅遊數據卡​
    漫遊數據收費比拼! 中國移動香港「數據漫遊自由圈」澳門/台灣用幾多、俾幾多​


    呃 YK 大大,請問邊度可以找到技術人員討論下?
    其實我想講,Telegram 群組上面就有本人(低手)以及不少 IT 專家(高手)駐場。Link 係呢度.

    立即加入Facebook 專頁,新聞/消息/優惠,最快知。

    01樓 ▲TOP 回列表頁