Asia Miles 六月改制!分析賺里數、換免費機票易咗,定難咗

Wilson Li 2018-05-24 13:17 | 科技新知
來自香港嘅航空公司,國泰航空宣佈會在 2018 年 6 月22 日,更新其飛行里數計劃 Asia Miles 亞洲萬里通制式! Asia Miles 嘅儲里數,獎勵機票都有改制,當中包括不少大改動,例如機票兌換里數、賺取里數等等,而我大約睇過 Asia Miles 網站嘅解說,到底今次改動,對大家來講,係賺咗定蝕咗?換免費機票係易咗定難咗,留意小弟嘅分析。

asia-fb.jpg
 

001:修改單程獎勵機票兌換

有時換機票未必係來回咁換,想去幾個地方嘅時候,喺 Asia Miles 舊制係需要更多里數,但喺新制之下,單程所需要的里數係來回的一半(好似廢話,但舊制係來回嘅六成左右)。你未必換一張單程機票 (除非你著左草),但唔少朋友,都可能因為掛住係當地 Shopping,或者交通擠塞,唔小心 miss 咗外地返香港回程嘅飛機,個陣就係你可以出動 Asia Miles 換張單程機票返香港嘅時間。在新制下,用嘅里數會更少。


002:兌換機票短加長減

螢幕快照 2018-05-24 下午1.02.59.png
(舊嘅兌換表)
螢幕快照 2018-05-24 下午1.03.45.png
(新嘅兌換表,呢個係單程,但新制兌換來回機票只需要單程所需里數嘅兩倍)

大家可以直接睇到新舊嘅兌換表差別,明顯地睇到 Asia Miles 可以喺短途上用得更少里數就可以兌換到機票,不過最平最熱門嘅地點,即係飛香港飛去台北,依然都係 15000 miles 無變過。最大分別應該係大約4-5小時航程所到的地方,例如東京、札幌、新加坡等等,過往需要 30000 miles,家陣只係 20000 miles 就可以兌換到,同另一個新大熱門英國航空飛行里數計劃 Avios 一樣嘅兌換率;而大約 8-10 小時的航程兌換,都係由過往 45000miles 來回小減到 44000miles。可是再上去長途,雖然只係喺超長途經濟艙需要多10000miles,但喺長途嘅商務上,已經加左所需要嘅里數,其中一個熱門換嘅 5001-7500miles 嘅區域,來回商務艙已經需要多 10000 miles。

到底 10000miles 得出黎咩概念 ? 大約一個來回香港與哥本哈根直航 Full Fare 所得到嘅里數、喺香港用本地信用卡於本地消費 6 萬蚊或外幣消費 4 萬蚊。
 

003:增加了國泰航空及國泰港龍航空所賺取里數

過往坐國泰嘅經濟客位 Q Class (特價咗嘅經濟客位)  有時可能得嗰 25% miles 比例,都唔知坐幾多次先可以換到張機票。呢個問題終於喺今次改制解決咗。在新制式下,由過往來回倫敦嘅 Q Class 只可以賺到 2992 Miles,喺 6月 22 號後一個來回已經有 6660 miles,只係飛 3 次,就算係 Q Class 特價機票,再補返 20 miles就可以換到一張來回東京嘅機票,到底黎緊會多左幾多里數賺,可以上去呢到睇下嘅。

總結:更多人有 Miles 機票更難換

睇完小弟嘅講解,大家有無覺得 Asia Miles 比以前易儲 Miles 咗呢?尤其大家無乜 Budget,成日都係坐經濟位嘅窮旅人。Miles 多咗,換免費機票又易咗,真係想跳起 Yeah。

不過,留意國泰航空 Asia Miles 換免費機票制式,其實係分三個級別:「標準賞」、「靈活賞」及「隨心賞」。「標準賞」先係用最少 Miles 換機票。的確,用最少里數換機票嘅「標準賞」係短途航班部份,係容易咗,而國泰航空 Asia Miles 有講到會增加 20% 獎勵機位用於「標準賞」,可能未來國泰用緊 777K 黎飛,更多位所以有更多位俾你換。

現今要賺取 Aisa Miles 何其容易,只會令到更多人兌換機票,大家都會想用最少嘅里數換免費機票,可見「標準賞」嘅免費機票,會比以前爭得更加激烈。最後,可能迫你用相對容易換嘅「靈活賞」或「隨心賞」去換免費機票。咁呢個情況,有可能變咗「變相加價」。

祝大家旅途愉快,go to travel by Airbus。

資料來源:Asia Miles

最新新聞