滙豐+恒生提款卡即日支援 Apple Pay!呢個伏位,令我唔想用

Wilson Li 2020-06-25 00:04 | 科技新知
中銀+渣打銀行將提款卡掛上去 Apple Pay 唔係新鮮事,但似乎唔算多人用。就算是美資上Citi Bank,上個月亦將 Debit Card 掛上去 Apple Pay。今日,連 HSBC 滙豐跟恒生都加入埋一份,即日起呢間銀行嘅用家,就算你無信用卡,只要有提款卡,都可以掛上去 Apple Pay,用 Contactless 嘅方法付款,連碌卡用 EPS 都唔駛!但係咪真係咁方便?中間嘅伏位,我話俾大家知! 

hsbc-fb.jpg


多謝銀聯

今日恒生低調地公佈旗下嘅 ATM 提款卡可以掛上去 Apple Pay,連同早前 HSBC 滙豐 ATM 提款卡加入 Apple Pay,意味住滙豐銀行系列,ATM 提款卡再上一層樓,追上英國滙豐提款卡科技。

有別於英國用 Visa Plus 網絡,香港滙豐銀行系嘅提款卡,雖然用嘅係 ETC 提款機,其實也有跟「銀聯」系統連接。以往,香港提款卡嘅「銀聯」主要俾你於海外地方,有「銀聯」logo 嘅提款機提款,係香港,呢個跟「銀聯」嘅聯系,基本上係無乜作為。

但今時唔同往日, HSBC 滙豐跟恒生嘅提款卡,可以掛上 Apple Pay 系統,最主要原因是 Apple Pay 跟香港銀聯有合作關係,HSBC 滙豐跟恒生是透過「銀聯」掛上 Apple Pay。即係點呢?你張滙豐、恒生嘅提款卡掛上咗 Apple Pay,可以用佢係手機上支付,或者用 Apple Pay 用跟八達通增值。

但去到 7-11、OK 便利店、超市或其他有 Contectless 嘅讀卡機,你就要望下佢哋有無貼「銀聯」嘅 logo。支援「銀聯」就可以用掛上 Apple Pay 嘅提款卡畀錢。(HSBC Jade Mastercard Debit 用戶,用 mastercard 系統,情況不一樣) 。

提款卡 Apple Pay 無 Credit Card 咁方便

不過我發現到提款卡加入 Apple Pay,有一樣保安要求令到佢失去咗 Apple Pay 嘅快捷嘅原意,從恒生提款卡 Apply Pay 介紹(連結)講到明,當使用 Apple Pay 付款時,需要輸入提款卡密碼,滙豐提款卡 Apply Pay 介紹(連結)中就沒有提及此保安要求,但相信機制都係一樣。

如果付款時需要輸入提款卡密碼,似乎太過重保安要求。Apple 要求使用 Apple Pay 功能嘅手機需要密碼保護,避免手機落人他人之手引致盜用情況,目前只有執法機構同國家級嘅保安專家破解到手機密碼,普通人都係難以破解,多重保安要求似乎同 Apple Pay 原意背道而馳。

HSBCHSBC.jpg
▲ 提款卡加入 Apple Pay 後圖示,滙豐卡美學不錯,而恒生有待努力。

虛擬銀行用 Mastercard 系統仲方便

目前傳統銀行面對虛擬銀行嘅威脅,開設虛擬銀行戶口只需 10 分鐘,其後會收到張 Mastercard Debit 卡使用,喺海外嘅網絡,Mastercard 跟銀聯已經係天同地差別 (當然,係中國大陸就係 another story) ,Mastercard 喺歐洲嘅 coverage 已經係遍地開花,銀聯都係拍馬都追唔上,所以銀行應該好好咁審視提款卡網絡,考慮引入 Visa,Mastercard 卡回應市場需求。

最新新聞