比拼 001 : 電視盒子 vs 電視盒子
之前 HKTV 跟香港政府爭論左好耐就係大氣電波免費電視牌照。最後 HKTV 開台，當然用唔到電視機條天線去接收，主要靠嘅，就係 App 加盒子。雖然 HKTV 低調咁跟細廠合作推出官方建議使用嘅盒子，但其實你去深水埗買任何一個樂視、小米或者千㝷盒子，都一定幫你裝埋 HKTV 盒子個 App。現時 HKTV 盒子 App 都可以睇到點播節目架啦。TVB 呢？今次發佈會講明會以盒子為主。版主問過 TVB 執行董事總經理鄭善強，佢話未來 TVB OTT 廣播平台，都會有手機、平板及智能電視 App，但佢地都係覺得盒子方案，係操作上最簡單，會係主打來。事實上，今次佢地拍埋和記電訊，以後可以利用 3 香港手機與 3 寬頻嘅 Sales 賣埋盒子服務。呢個合作，擺明係盒子為主嘅服務舖路。
▲ OTT 即係 Over The Top。仲係唔明 TVB 攪乜 OTT？咪就係好似 HKTV 咁，用不同上網模式及裝置，都睇到節目嘅廣播及點播模式啦。
比拼 002 : 720p vs 4K
HKTV 開台嗰陣，一直講過想提供 1080p Full HD 全高清畫質，但開始前因為伺服器問題，就降至 720p HD 高清畫質。今日 TVB 公佈未來 OTT 廣播，會支援 4K 畫質，除了樂視外，香港未有提供相關內容，好似好吸引。但問到內容部份， TVB 嘅鄭善強表示，TVB 暫時只會搜羅外地製作嘅 4K 節目，包括紀錄片或部份韓劇。TVB 本身未打算製作 4K 畫質劇集。鄭善強說，之前世界盃試播 4K 畫質嘅經驗，他們覺得 4K 內容係紀錄片方面會表現得更好。此外，未來 4K 內容亦會以下載觀看為主，未必一定有串流隨播隨睇方式提供。由此可見，TVB 嘅 4K 內容，似乎都唔會太多，佔不太多便宜。
▲ 4K 解像度電視機唔難買，但 4K 內容好難搵。
比拼 003 : 一個免費台 vs 免費 + 收費台
HKTV 開台只有一個頻道，簡單好記，全部節目都提供點播重溫。TVB 講明未來 OTT 廣播頻道包括免費及收費部份。免費部份就係家陣提供嘅大氣電波廣播嘅台，如 J2、明珠台等等。收費部份就係 TVB 自家製作嘅收費電視頻道。TVB OTT 廣播跟佢地收費電視最大不同係提供點播重溫。收費部份內容，收費會低於每月一百蚊。但記住，以 now 提供嘅 TVB 收費台為例，雖然過百月費，但當中已有不少外購頻道，所以低於一百蚊，係咪抵，睇下你睇唔睇外國台啦。
▲ TVB 未來會將收費電視頻道，用 OTT 電視盒子、手機、平板等方式廣播。
比拼 004 : 有台無網 vs 有寬頻商支持
記得 HKTV 開台嗰晚攪到網絡大塞車，因為 HKTV 沒有跟香港任何一間寬頻商合作。今次 TVB 找了和記電訊幫手。其實不是什麼新鮮事，旗下收費電視嘅高清版本，一直透過和記 3 香港寬頻嘅光纖網絡傳送。而和記 3 香港寬頻之前亦有推出專門給樂視電視嘅 4K 內容專線。有份出席 TVB 發佈會嘅和電香港營運總裁陳婉真亦表示，和記嘅光纖網絡已覆蓋香港 170 萬住戶。而 TVB 嘅鄭鄭善強亦表示，會跟不同寬頻商合作，似乎係網絡傳送穩定性上，TVB 會比 HKTV 佔優。比拼 005: 廣告、廣告、廣告
HKTV 開嗰陣，開宗名義就係要賣廣告，也包括購物資訊，無論你睇直播，定係點播，都有大量廣告。節目表上更有產品介紹嘅購物節目，基本上，維基就係想你用 HKTV 平台，Shopping 洗錢。TVB 亦講明，未來 OTT 部份，無論免費定收費內容部份，都一定會有廣告置入。鄭善強稱，收費內容部份，月費一百蚊有找係好大眾化，一定要有廣告才能營運得到。所以，無論你睇 HKTV 定係未來 TVB OTT 節目，一樣都係睇好多廣告。
▲ 王維基本身都認為電視平台係用來推廣佢嘅購物網站平台，所以節目中間會有大量叫你去買野嘅廣告。
總結：網民情意結 鬧爆一樣有收視
睇了網友對 TVB 都加入 OTT 盒子互聯網電視嘅反應，都係唔多正面。似乎網友對 TVB 呢個品牌都有負面情緒。但 HKTV 收視又唔見得好好，TVB 一樣獨大。到底明年一月，HKTV 仲係咪存在已經係一個好大問題。但以數據，資料去比拼，網友覺得 TVB 嘅 OTT 安排，又合你心意，或是繼續垃圾呢？齊齊討論吧。更多報導：HKTV 有難！TVB 都玩 OTT 免費互聯網電視