偽開箱
為何叫做「偽開箱」，因為 Day One 收到 ONYX STUDIO 6 後，我就沉醉於日日聽歌的狀態，基本上唔得閒寫開箱文，而且個個上黎本 YK 屋企的朋友都話：「嘩，呢個小喇叭咁正，幾多錢？ 幾吸引，原來都唔係好貴~」 快活不知時日過，我都係聽左幾個星期，先再翻黎寫偽開箱文。
▲ Harman Kardon ONYX STUDIO 6 外形好似名牌手提袋咁，有藍色、灰色、黑色選擇；個人喜歡灰色的低調，能輕易融入屋企環境。
▲ 驗明正身的港行標籤，列明一年保養。
▲ 盒身都寫明佢係藍牙喇叭，你可以拎住佢四圍走。
▲ 盒頂都暗示四大特點：藍牙 4.2 制式、八小時播放、雙喇叭模式、IPX7 防水。
▲ ONYX STUDIO 6 最大可承受 50W 輸出功率。
▲ 盒手提帶都刻上「harman / kardon」，好喇好喇知道喇 ~
▲ 說明書和保養書，再送多一條兩腳插電源線，可能留比你跨國外遊使用。
▲ 值得留意的是，本 YK 非常遺憾沒有機會試玩「雙無線喇叭」的功能，因為前提是需要有兩個 ONYX STUDIO 6 配對，才能享受左右雙喇叭 ~
▲ 分離式火牛亦寫上「harman / kardon」的標示，內置 3283mAh 的鋰電池能提供最多 8 小時的播放時間；當然，實際的播放時間取決於音量和播放內容，也可以選擇插住 AC 電源播放。
▲ 圓潤的火牛設計頗有特色。
▲ 電源是 19V/2A 輸出，需要充 5 小時就可以完全充滿小喇叭。
小喇叭真身登場
▲ 圓形造型的 ONYX STUDIO 6 跟上代一致，同樣採用類亞麻布面料，一體式手柄是冰冷的金銅色鋁合金，高貴感覺出晒黎。
▲ 對比上一代，ONYX STUDIO 6 最大特色是加入 IPX7 防水級別，真正可以安心帶入廁所跟住本 YK 沖涼了；不過我唔敢試倒水落去，畢竟個喇叭咁靚都唔捨得 ~
▲ 手柄弧度適中、磨砂鋁合金觸感舒適，即使機身重量接近 3 公斤，也不會拎得唔舒服。
▲ ONYX STUDIO 6 搭載一個 25mm 高音單元和一個 120mm 低音單元；低音播放效果確實有保證，每一下聲波都係狠狠地向著我心臟施壓。
▲ 側面睇又真係好似手袋，其實我當佢係輕量版啞鈴，得閒就一路聽歌一路舉重。
▲ 操控界面都係一樣清晰易懂：藍牙連接、音量減少、電源鍵、音量增加、播放/暫停。
▲ 背後有一個防水膠條，主要給你充電和有線連接音源之用；插線音質自然高，但會犧牲防水保護。
▲ 底部是防滑膠，同樣也起了避震作用。
試聽播歌
本 YK 手上的 HTC U12+ 雙喇叭號稱是手機喇叭皇者之一，推到最大的 BoomSound 喇叭對比 ONYX STUDIO 6 藍牙模式下的最大音量播放，到底效果如何呢？ 兩者同樣距離收音裝置達兩米之距，先後播放同一首 Youtube 歌曲 Stand By Me（Ben E King / 1961 版）。
這是一首節奏感分明的老歌，多年來亦有大量名歌手翻唱，而這個版本有明確的低音樂器演繹部分，也有歌手 Ben E. King 高音扯聲線的部分，亦只有這個元祖版本最能夠演繹出令我滿足的聽感：灑脫卻又期待、滄桑帶著躍動、一種空靈的心境。
▲ 上述測試以體驗音量和整體播放效果為目的；更精細的音質其實受到你的播放裝置和本 YK 的收音裝置所影響。
結論： 愛不釋手的沖涼喇叭
小喇叭 ONYX STUDIO 6 前後有超過 10 個朋友上門試聽，本 YK 一律先播放後介紹，當講出香港行貨定價 1599 元時（其實推廣期送緊 JBL DUET Mini 2 耳機），大家都係一副「仲以為要兩三千蚊 」的回應，大家都興致勃勃表示想放一個係自己屋企廁所，因為呢代有 IPX7 防水規格。只有一位朋友表示毫無興趣，原因係佢已經有 STUDIO 5 了。。。
音響絕對是苦海無涯，但若果你只想在暴風雨中找到一個小屋，短暫逃避讓你心煩的世界，ONYX STUDIO 6 能讓低音震撼你的心靈、高音貫穿渾渾的思緒，最緊要係可以讓音樂充滿廁所！ 所以，本 YK 強烈建議有興趣的網友要落街試聽。
查詢：Brightstar 2980 8073 / www.eloyal.hk