安裝零難度
話說版主住係村屋，仲要係上幾層嗰種。電視機送嚟時，我有想過，係咪要畀錢送貨人員，幫手枱上樓？點知貨一到，家陣 50 吋電視機，原來都係好輕身。連埋包裝，我一個人不算好花神都搬到上樓，感覺超爽。每次有新電視機到家，最慘都係安裝。我唔係第一次試 TCL 電視機，記得對上一次，安裝嗰陣都煩煩地。今次呢部 C725，再將安裝配件減少，真係上兩隻腳，幾粒鑼絲攪掂。我自命一直都係工藝十分差嘅人，都可以廿分鐘安裝攪掂，放上電視架上，著機即睇，堅快。
▲ 得兩個腳架要裝上電視上面，DIY 裝機，唔難。
▲ 好好采嘅係，呢部機嘅插線位都係放向左面，跟我本來電視機格局係一樣，所以攞位完全無投訴。再睇睇駁位，50 吋版本有標準 HDMI x 3、USB x 2、光纖音頻輸出、耳機接口。WiFi 部份，支援 2.4G / 5G WiFi。
窄邊框 4K 靚芒
TCL 電視機，以中國品牌電視嚟講，最出名係嗰芒靚。呢款 50 吋 TCL C725，用上比較護眼嘅 QLED 材質，達 4K 解像度。此外，呢個 QLED 屏幕，仲可以產生 10 億顏色。加上佢支援 HDR10 高動態範圍，做到 100% 色域同亮度，睇電影、煲劇當然靚，打機都足夠應付到。
▲ 安裝之後，就是呢個樣，金屬邊框機身，簡約有型。
▲ 官方圖片跟我試嗰陣嘅實機，相差唔大，一樣咁靚。
▲ TCL C725 電視機做到十分窄邊框，從呢角度....
▲ .... 定係呢嗰角度，都 feel 到呢部電視機，幾乎是無邊框。
▲ 講開色，我專登係 YouTube 搵到一條以香港夜色為主題嘅 4K 短片，睇到黑色與彩色之間的對比，十分明顯。
▲ 另一段 HBO Go 最新的飲食節目，有簡約嘅廚房，主持著住的衫色彩都算分明。
進步最多是音響
以前買電視，都知道內置嘅音響輸出好聲有限。要改善，加多一組 Soundbar 是常識。今次呢部 TCL C725 不一樣，除了一定有嘅 Dolby Atom 加持之外，更重要佢拍咗 Onkyo 調整音響效果，加上內置揚聲器。令到今次 C725 喺不需要 Soundbar 嘅補強下，都做夠晒響，夠靚聲嘅效果。
▲ 電視機下方內置了揚聲器，並得到 ONKYO 加持。
▲ 內置 ONKYO 音響系統，印上 ONKYO 的標誌以正視聽。
Android TV 系統好好用
香港有得賣嘅兩大韓國電視品牌，雖然叫做 SmartTV，但唔係採用 Android TV 系統。TCL 全線電視機都採用 Google Android TV 系統，當然包括呢部 C725。用 Android TV 系統好處係，有大量 TV App 用到，基本上，你要睇 Now E、HBO Go、Netflix 、YouTube、黃 Viu、 藍 Viu 甚至是開電視 (用講人話電視 App) 都有齊晒。你仲可以透過 Google Assistant 用廣東話去搵片，報天氣，搵地圖、仲可以下載遊戲，配合自家嘅手掣打下簡單嘅遊戲呀。
▲ 跟機有兩個遙控，我自己一向用細嘅一個，結合埋 Google 服務，有埋 Netflix 專鍵，非常好用。
▲ 支援 LAN 或 WIFI 連線上網，亦內置 Chromecast 功能，方便把手機畫面射上電視操作。
▲ 內置 Google Play Store Android TV 版本，有不同嘅 TV Apps，影視之外仲有 Tune In Radio、Spotify、Youtube Music、Spotify 等等，當佢係串流音樂電台裝置也未嘗不可。
小結：芒靚聲正，價錢合理
重新一次，小弟唔係 AV 產品編輯，電視機又唔係幾年換到一次，堅無乜點試其他品牌。但 TCL 嘅電視機，呢四年間試咗兩部，今次再試呢部 C725，升級程度很顯著，4K 畫質好好，窄邊框屏幕，輕身試機亦令人很滿意。今次升級最大驚喜是音效，內置嘅 Onkyo 2.1 系統，令我不用再加外置 Soundbar 也有出色嘅音效。點講都好，價錢最重要。原來 TCL 嘅電視機，喺特價之後，跟 LG、Samsung 等已係同 Grade 之作，50 吋 4K 屏幕嚟講，賣價相差無幾，比我揀，TCL 用 Android TV 系統，應係一大考慮的優點，始終 App 多啲，亦齊啲。Sony 都係用 Android TV，但同級數唔會七千有找囉。
TCL C725 賣價 （根據豐澤嘅建議定價，最近仲有三百蚊機價優惠，詳情可以自已去豐澤網站睇睇。若果想知官方網站及其他焦賣點，可以點呢到)
HK$9,980（65寸）
HK$7,980（55寸）
HK$6,580（50寸）