地理位置相當方便，火車站一出 3 分鐘內即到
首先要講下，沙田新城市這間 Apple Store 所在的位置真係相當方便，其實就在新城市廣場的四樓，如果你係搭火車的話，在沙田站出閘，只需一直向前行至電梯位，再上一層，就會見到這間 Apple Store。
▲ 沙田站一出。
▲ 沿住這個方向一直向前行。
▲ 行到尾會有電梯位，行上一層，就會見到 Apple Store 在你的左手面。
「玻璃屋」設計？邊度玻璃？版主搶先睇過先！
未出發之前，版主就聽聞這間 Apple Store 會採用類似「玻璃屋」的設計，好似講到會好靚咁喎，但實情又係唔係呢? 對於版主來說，所謂的「玻璃屋」設計，應該係好似銅鑼灣 Apple Store 或者 IFC Apple Store 咁，一睇望落去好似好 Grand 咁，果種先稱得上是「玻璃屋」設計。然而，當我去到新城市 Apple Store，不知是否出發前我的期望太大，導致最終給我的感覺是：大失所望。從表面上看來，似乎都係好似又一城的 Apple Store 咁，純粹係商場入面，有道大大的玻璃門，就係咁，無乜特別。睇下圖啦！
▲ 其實，呢個已經係 Apple Store 的門口......Errrr....... 連 Apple 個 Logo 都無?
▲ 唔係！平時的 Apple Store，你會見到有個發光的 Apple Logo，好 sharp 好搶眼咁，但今次沙田 Apple Store 的 Apple Logo，就隱藏在店舖旁邊的牆壁處，做乜啫今次咁低調！
▲ 從門口的招牌所見，上面寫着 The Apple Store Grand Opening，表示會在明天 (30/6) 上午 10 點就開幕。
▲ 可以見到，雖然係開幕前一天，但成班 Apple 職員們已經在入面開會，似乎係處理緊明天的安排?
▲ 場內可見，有好多枱面上放置了不少 Apple 產品，如 iPad、iPhone 等等，而牆𤩹部份亦有 Apple 產品的宣傳 （圖中顯示為 MacBook)。
好失望？五樓平台有玄機！似乎沙田 Apple Store 仲有隱藏的秘密！
雖然暫時未入得去，不過都可以從表面看到，這間新城市 Apple Store 的外型。就咁望落去，似乎好似好普通咁，無乜特別，同又一城果間差不多咁。然而，新城市 Apple Store 似乎未必如四樓表面般那麼簡單...... 就在沙田新城市五樓的平台位置，可以見到正在進行裝修工程，聽聞都同這間全新的 Apple Store 有關喎！不過咁，工程目前尚未結束，預計會到七月底才會完成，想知道到底搞緊乜東東？版主試過向 Apple 職員查詢，但得出的結果係「不知道」，是真的「不知道」，還是「唔講得」？
▲ 五樓平台位置，可以見到正進行裝修工程，有一個三角型尖頂的建築物。雖然見到而家拉哂白布，不過既然之前傳得話係採用「玻璃屋」設計，版主初步估計，這個應該會係一個玻璃頂的物體，但就咁望唔似有門，可能只係玩一些花巧野，未必有用處吧？
▲ 而旁邊亦有另一個工程，寫住工程預計會在七月底前完成。
▲ 偷偷望下入面，暫時睇唔出想搞乜東東，但唔知點解有一種預感，五樓平台的工程係有玄機，好大機會會同 Apple Store 有關。