二千幾蚊平玩「MBA」!2K 芒 + 6GB 筆電,馳為 Lapbook 12.3 評測

左定坤 (Cho Ting Kwan) 2017-07-04 19:30 | 電腦硬件
無可否認,Microsoft 推出的 Surface Pro 系列,確實帶起了二合一筆電的潮流,利用可拆式的鍵盤設計,讓一部平板電腦,慢慢能夠取代傳統筆電。版主曾經有段時間,都覺得: 嘩_!Surface Pro 呢種設計堅係正喎,難怪咁多廠商都相繼跟風啦!不過,當我用呢類型的二合一筆電愈耐,就愈覺得目前的二合一筆電,在使用體驗上依然無法取替傳統筆電的地位,於是乎開始留意返,近期有沒有一些平價抵玩的傳統筆電。有!馳為 Lapbook 12.3 吋已經抵港,外型靚靚仔仔之餘,二千幾蚊作為文書機,都是一個不錯選擇。立即分享一下版主的使用體驗吧!

Lapbook(Facebook).jpg

二合一筆電,有外型但實用性一般,暫時未能取替傳統筆電地位

點解版主用左一段時間二合一筆電,但最後都係頂唔順,決定要用回傳統筆電呢?首先就要追溯番二合一筆電出現的原意:希望可以讓平板能夠漸漸取代傳統筆電,出外工作時可以更輕便。然而最關鍵的,是現時大部份二合一筆電的設計,個個廠商都是跟隨 Surface Pro 系列那種鍵盤,雖然不是說不好用,但這種設計只適用於在桌上工作,如果沒有了桌子的支撐,就算有鍵盤,都是無補於事,就好像當你搭巴士的時候。

當然你會說,搭巴士有幾何會用電腦呢?所以關於這點,又要視乎個人的使用習慣,就好似版主,正正喜歡一邊坐巴士,一邊打文。真係可以搭巴士都打到文的二合一筆電,版主第一時間會想起 Alcatel Plus 10,因為它的鍵盤是硬身的,就算放在大腿上,都一樣能夠支撐得到。當時我都很喜歡這部二合一筆電,唯一遺憾是配置實在太差,如果唔係本身版主係好有興趣買的!

20170705_161555.jpg
▲ 可能上圖都未必清楚,其實而家部馳為 Lapbook 12.3 係放了在版主大腿上。

版主開箱!馳為 Lapbook 12.3 吋,成部 MacBook 咁!

好了!講完點解最後都係決定用回傳統筆電後,係時候要入正題,到底我對這部馳為 Lapbook 12.3 有甚麼感覺。一開箱拎出部筆電,第一感覺是: 嘩!成部 MacBook 咁嘅!係呀,機身所用的材質,又係跟 MacBook 差不多,就連設計都相當接近,最好笑的是,當版主正在用這部馳為 Lapbook 打這篇文章時,身邊有朋友突然驚覺,咦乜原來我不是在用 MacBook Air 的 XD?可想而知,這部馳為 Lapbook 12.3 跟 MacBook 有多相似。版主手上這部馳為 Lapbook,除了擁有 12.3 吋屏幕之外,解像度更有 2K,而且屏幕比例亦是罕見的 3:2,整體在外型以及造工上,版主認為相當不錯,即刻睇下以下版主開箱,順便一拼版主手上 13.3 吋的 MacBook Air 吧!

20170705_160843.jpg
▲ 以上為馳為 Lapbook 的包裝盒。

20170705_160900.jpg
▲ 頂部會見到有這部筆電的基本 specs,例如 Intel Apollo Lake N3450、6GB RAM、64GB ROM......。

20170705_161246.jpg
▲ 開箱!就咁望落去,真係會覺得好似 MacBook 咁,而隨機會有充電火牛、說明書、保用書等等。

20170705_161308.jpg
▲ 機身用上了全金屬材質。

20170705_161317.jpg
▲ 角落位置會見到有 CHUWI 的字樣。

20170705_161327.jpg
▲ 右側會有 1 個 USB 2.0 插槽、3.5mm 耳機孔以及 microSD 卡插槽。

20170705_161334.jpg
▲ 而左側則有充電插槽、1 個 USB 3.0 插槽以及 HDMI 插槽。

20170705_161538.jpg
▲ 配備了 12.3 吋不反光屏幕,屏幕不反光最大的好處是,即使在猛烈陽光下使用,亦都可以看得清楚。另外,屏幕解像度為 2736 x 1824 像素,是罕見用上 3: 2 屏幕的機型。

20170705_162239.jpg
▲ 屏幕上方會有個鏡頭。

20170705_161428.jpg
▲ 有張貼紙寫住用上 Intel Celeron 處理器。

20170705_161420.jpg
▲ TouchPad 的尺寸同 1 蚊硬幣比較。

20170705_161448.jpg
▲ 鍵盤字粒與字粒之間的間距亦都剛剛好,打字的時候可以更自然。

20170705_161644.jpg
▲ 拍埋落 13.3 吋 MacBook Air 度,可以見到外型上真的很相似,就像兩兄弟般,而馳為 Lapbook 12.3 機身表面顯得比 MacBook Air 更平滑。

20170705_161811.jpg
▲ Lapbook 12.3 相比 MacBook Air 略小。

20170705_161844.jpg
▲ 整體設計都同 MacBook Air 有異曲同工之妙,相當相似。不過一比之下,Lapbook 12.3 相比 MacBook Air 略厚一點。

20170705_162059.jpg
▲ 打開左兩部電腦,撇除界面不說,你能一眼看出邊部係 MacBook Air,邊部係馳為 Lapbook 12.3 呢?

20170705_162206.jpg
▲ 不過 Touchpad 部份相比 MacBook Air 細了一個碼,但算是正常尺碼,用落並沒有覺得特別不便。

2K 屏幕真係咁正?一套 YouTube 片試馳為 Lapbook 12.3 畫質 + 喇叭

馳為 Lapbook 12.3 其中一個賣點,就是用一個便宜的價錢,就有 2K 解像度的屏幕,為了想測試一下是不是真係咁靚,版主在 YouTube 上揀了一段有 2K 解像度的影片,同大家測試一下畫質之餘,順便試埋喇叭音效。結果顯示,畫質方面確實係幾不錯的,畫面在細緻度上表現出色,然而有一個問題,就是即使音量已調至最大,但都不是很大聲,如果平時間唔中要睇下片,未必有一個很好的體驗,可能需要借助外置喇叭才行。


▲ 可以見到,即使調到最大聲,但都依然係唔夠聲。但畫質顯示方面,算是令版主挺滿意的。

鍵盤打字感覺沒有 MacBook Air 咁舒服,但反應都相當快

馳為 Lapbook 12.3 配備了第七代 Apollo Lake Intel Cerelon N3450 處理器,用上這粒處理器,相信網友都不會期望...... 唔係,係不應該期望,玩遊戲可以有多迅速流暢,不過內置有 6GB RAM,開啟多個程式視窗,應該問題都不太大。一分錢一分貨,Lapbook 12.3 還是用來作文書機最為合適,而作為一部文書機,打字感覺最為重要,除左要有得啪啪啪,反應都是版主考慮的因素。以前用過好多低階的筆電,例如 Alcatel Plus 10,打字時鍵盤感應往往追不上我手指的速度,例如我打個「鍵」字,倉頡碼係「金弓大手」,但佢有時可能淨係 detect 到「金弓手」,打左其他字出來。不過初步使用 Lapbook 12.3,暫時就未見有這個問題出現。

正常使用無問題,然而一在瀏覽器開啟 Facebook,就好容易會出事,例如 Messenger 打字成日都會怪怪的,文字表達可能有點複雜,例如有時我打個「我」字,佢會變左「我我」,但當你發送訊息時,實際上其實都只係得一個「我」,但版主覺得這未必是馳為 Lapbook 12.3 的問題,有機會是 Windows 本身問題,亦有機會是 Facebook 的問題,都不出奇,畢竟 Facebook 經常有 bug,也是常識吧?再加上版主在家中的桌上電腦,都曾經出現過同樣事情,所以版主有理由相信,Lapbook 12.3 在使用上一切正常。


▲ 其實打字感覺都唔差,只係不及 MacBook Air 好而已。

內置 10000mAh 電池,續航能力真係咁勁?

版主並沒有好似平時做手機評測般,刻意利用一些跑分軟件,去為馳為 Lapbook 12.3 做測試,而是觀察一下正常使用時電池的消耗情況。版主平時通常會晏晝至黃昏左右,才會出去旺角 Starbucks 工作,就好像昨晚 6 時半左右,版主才開始到 Starbucks 使用這部馳為 Lapbook 12.3 (在家通常都會用桌上電腦 / MacBook),當時電量為 100%。在正常使用下,即主要使用瀏覽器來上 Facebook 以及打文,直到晚上 9 時 45 分離開,電量剩下 51%。簡單來說,即係 3 小時 15 分鐘就用左約一半電,粗略換算上來,內置 10000mAh 電池的馳為 Lapbook 12.3,大約可以進行接近 7 小時的文書工作。有這個成績,算是意料之內的續航時間,網友又滿意嗎?

19748112_461958170829661_1991238893_o.jpg
▲ 從上圖可以見到,時間係 18:31,即大約 6 點半的時候,電量為 100%。

19723813_461958387496306_1419920268_o.jpg
▲ 主要用來在瀏覽器上 Facebook + 打文,去到晚上 9:45,剩下 51% 電池,換算下來,即 10000mAh 的馳為 Lapbook 12.3,大約可以用到接近 7 小時。

小結

馳為 Lapbook 12.3 在深水埗黃金商場賣價為 $2998,呢部 Lapbook 12.3 值唔值呢個價錢呢?版主試用過之後,感覺係值的,可能版主平時比較少打機啦,所以如果作為一部文書機,在實際使用上不會 Lag 機,其實已經係相當滿意的了。最主要係有 6GB RAM,就算你開住多個視窗,或者上緊好多不同的網站,都可以保持着系統的流暢性,而佢嘅 2K 解像度屏幕,則俾到你在睇片時的視覺享受,問題是喇叭音量太少,聽覺享受就未必俾到你。睇完以上介紹,不知網友對這部馳為 Lapbook 12.3 有沒有興趣呢?留言講下你的感覺啦!

查詢及鳴謝: 訊達科技  27201177(產品由 Pengbo 鵬勃電子有限公司代理)
地址: ​黃金商場地庫63,67,69號鋪

最新新聞