網友如果有留意的話我大約喺一個星期前坐了國泰首批 A350 客機去台北，仲試埋空中 WiFi。係台北我抽了時間 Competex 玩 HTC VIVE。今年 Competex 其中一個主題就係講 VR， Competex 展覽中有唔少嘅廠均有 VR 玩（包括傳統電腦硬件廠），不過見得最多嘅 VR 都係 HTC VIVE。到底 HTC VIVE 有幾勁，咁多個廠都會用佢地研發嘅 VR 技術呢 ?
首先，HTC VIVE 在上個星期奪得左 2016 European Hardware Awards 中嘅 PRODUCT OF THE YEAR 2016 同埋 BEST VR PRODUCT 兩個獎項，而呢個獎項由歐洲電腦硬體協會擔任評審，當中包括歐洲主流科技與評測媒體以及獨立網站作評審，意味住呢個獎項係極具權威性。
事實上，經過小弟親身體驗左 HTC VIVE，我覺得 HTC VIVE 係值得拎呢個獎項，因為體驗嘅 HTC VIVE 真係好好玩，令到我返到香港都想再玩多幾次，甚至有衝動去買番部。當中我喺 Competex 嘅 HTC 攤位玩左 4 個遊戲，包括射擊遊戲 Jeeboman、玩槍玩炮嘅 Front Defense、運動健身嘅 Ruckus Ridge 同埋體驗飛行嘅 Birdly，玩完呢 4個遊戲真係好攰，因為遊戲內容真係可以令到我好投入去玩，尤其 Front Defense，真係可以玩到訓低左喺到，想知點解 ? 等我詳細介紹下啦。
試玩體驗 001 : Jeeboman
首先，我玩嘅係 Jeeboman，呢個遊戲就模擬左一個人喺到阻止外星人入侵，而場地只係一個綠幕（唔知著綠色衫係咩會隱形喺遊戲當中），都係俾我呢 D 未玩過 HTC VIVE 嘅人做一個熱身，去適應下跟住落黎嘅遊戲。
▲ 如果你屋企有 HTC VIVE都可以 Download 落黎玩喎
▲ 呢個就係我玩嘅場地嘅，真係一片綠幕
▲ 呢個就係成個 HTC VIVE 嘅裝備，2 個手掣、VR 眼罩裝置。耳機可以自己配備的。
▲ 以前睇人地玩 VR，都只會見到真人係現實環境下係咁郁。今次 HTC 安排了一個新技術：大會攝影姐姐，除左有支鏡去做攝影之外，仲有個 HTC VIVE 手掣喺上面，影出黎嘅影像係會虛擬同實境融合，你會見到我入去虛擬世界裡面，感覺就係拍緊科幻電影。
▲外面嘅人可以透過電視即時地睇到我打機嘅戰況。我係咪拍緊戲呢？
▲ 呢個就係我玩 Jeeboman 嘅片段。
試玩體驗 002 : Front Defense
玩完輕鬆就玩大野啦， 另一個射擊遊戲係 Front Defense，個故事背景係同二戰有關，你要守護一個陣地，而四方八面有唔同嘅敵人攻擊你，你要負責將佢地一一掃低。據了解， Front Defense 喺 Competex 上首次亮相，由 HTC 支持嘅一間 Startup 公司自行開發，最後真係整成左一隻 Game，而內容都係好迫真，用嘅武器有衝鋒槍、機器槍、火箭炮等。
▲武器：手掣 2 支。係玩戲裡面，可以變為不同嘅武器。
▲我上陣啦，哈哈，希望唔好俾人射死。
▲其實喺眼中睇野好迫真，打到跪左喺到都好正常（企喺到真係好易中槍）
▲外面嘅人都可以透過電視去睇下個人戰況。
▲ 呢個係我玩 Front Defense片段
最後想講呢隻 Game 真係好正，真係可以當 War game 咁樣玩，雖然只係初始嘅版本，但我絕對期待未來嘅版本，用嘅武器又可以多元片，喺換彈、入彈、上火箭炮、du手榴彈都好迫真，真係要好似真實咁做個動作，而唔係喺個 keyboard 上禁個「 R」就算。
試玩體驗 003 : Ruckus Ridge
接著落黎就係需要下體力去玩，就係 Ruckus Ridge，當中配合左室內划艇機黎玩，利用 VR 模擬左自己喺條河到划艇，拎黎訓練都幾有用，配合埋多人連線就可以直接睇到對手同埋自己嘅距離，唔係幾個數字就交代了，而係用畫面去演示左自己嘅情況。
▲ 好簡單，只係一個 HTC VIVE 眼罩同埋一部室內划艇機就得，令我諗起中學曾經加入過室內划艇隊訓練嘅畫面，如果有呢個 VR 就唔會咁沉悶睇屏幕上嘅數字。
▲ 呢個係我玩 Ruckus Ridge 嘅片段
呢部野拎黎做訓練係唔錯嘅，但我想像唔會拉完幾千米然後成個人訓住跌落機會唔會整爛左部 HTC VIVE 眼罩，無可否認嘅係呢個眼罩可以令到自己入左體育嘅畫面，唔知會唔會有打羽毛球呢 D 對打嘅遊戲玩呢 ?
試玩體驗 004 : Birdly
玩完 Ruckus Ridge 就可以去玩 Birdly， Birdly 就係一個模擬鳥兒飛行嘅場景，一玩自己就好似雀仔咁喺城市到有得飛黎飛去，不過成個器材拎返屋企係無咩可能，只可以喺現場玩。
▲我就好似雀仔咁喺上面用鳥瞰嘅角度去望呢個城市。當我向下衝嘅陣，前面個風扇都因為我嘅速度加快而吹更大嘅風，模擬下氣阻嘅感受。
▲以上係我玩 Birdly 嘅片段
咁多個 HTC VIVE VR game 當中，Birdly 應該個感覺係最接近真實去玩，除左用一個鳥瞰嘅角度去睇之外，另外我可以拍打對翼去加速，同時當我轉方向嘅時候都會成部機向我轉嘅方向去傾斜，有一個好似就向嗰個方向跌嘅感覺，我覺得可以改下，然後整成一個模擬嘅私人飛機，等機師可以透過呢個模擬訓練加強技能。
小結：
玩完 HTC VIVE，一個字：正！好多野嘅設計都有就住人體工學黎去做，過往玩 VR 往往我呢D「四眼仔」係好唔舒服，因為往往個裝置會頂住我副眼鏡，不過 HTC VIVE 就有就住我呢 D「四眼仔」黎設計，我點玩都好都無頂住我副眼鏡，而且玩完係唔會暈架！呢個真係好重要，好多 VR 玩完真係會暈暈地，但我連玩四個 HTC VIVE 遊戲我唔會暈嘅。遊戲迫真得黎又多元，如果我有錢的話應該會敗一個返黎，可惜嘅係要敗 HTC VIVE 嘅成本都幾高下。
HTC VIVE 對電腦硬件最低要求為 Intel Core i5 Qual Core 及 Nvidia Gefore GTX 970 ，而如果想有更好嘅體驗就應該係一部 i7 及 Nvidia Gefore GTX 980 配置嘅電腦，而 HTC VIVE 就賣 $8199 。HTC VIVE 唔止得 4種遊戲咁少啦，如果你家陣上 Steam 去搵下有咩支援 HTC VIVE 嘅遊戲，足足有成 134 種遊戲，當中包括動作、冒險、策略等等唔同種類嘅遊戲。 其實 Steam 嘅遊戲，全部也可以係 HTC VIVE 裡面玩到，若果不支援 VIVE 嘅操控，就會變成一個超大屏幕係你眼前一樣！
特別嗚謝 HTC HK 嘅 Toma 幫小弟進行拍攝及紀錄