8 吋平板 + 四個指向喇叭
Predator 8 是第一款專為電競以及手遊玩家所推出的平板電腦，具有 Predator 系列金屬風格外殼設計以及特殊的手感，機身尺吋為 127 x 218 x 8.7 mm，採用了 8 吋 IPS 材質 1920 x 1200 解像度 100% NTSC 屏幕，內建獨家 Predator ColorBlast 技術，令影像更立體細膩。Predator 8 的四隻角設有不銹鋼指向喇叭，配合 Predator Quadio 技術以及環繞音效，Acer 聲稱當你打緊機嘅時候，啲聲音好似全部都向住你嘅方向咁，音效相當震撼，咁到底實質係咪真呢? 版主等陣就話你知。
▲ Predator 8 的正面，配備了 8 吋 100% NTSC FHD 高解像度顯示屏，內建 Predator ColorBlast 技術，令屏幕顏色更鮮豔。從正面來看，已經能夠明顯地看出佢同一般平板的外型有好大的分別，感覺上幾特別。
▲ 機的前面上方會見到有 200 萬像素的前置鏡頭。
▲ 機的背面正中部份，你可以見到有 Predator 的 Logo，銀色的金屬機背，令整體感覺更似專為打機而設的平板。
▲ 機的背面上方則有 500 萬像素的主鏡頭。
▲ 機的左側上方設有開放式的 microSD 卡槽。
▲ 而機的右側上方你會見到有開關鍵以及音量鍵。值得注意的是，當你直向的時候，按上方的音量鍵代表音量增強，下方則代表音量減低。但如果將部 Predator 8 橫向的話，就會剛剛相反。
▲ 機的頂部則有 microUSB 充電插槽以及 3.5mm 耳機孔。
▲ 值得一提的是，Predator 8 的四隻角各設有不銹鋼指向喇叭，配合 Predator Quadio 技術、環繞音效以及獨家 Predator MediaMaster 應用，能夠自行選擇不同影音情境設定，令影音娛樂體驗更出色。
▲ 版主拎上手試手感，覺得呢部 Predator 8 一啲都唔重，機背中間部份有少少凹落去咁，剛剛好 fit 到手指部份，令手感更舒服。
跑分驚喜不大，3D 性能尚算不錯
在規格配置方面，Acer Predator 8 配備了 Intel 新一代 Atom x7 處理器，最高可達 2.4GHz，是首款使用這種處理器的平板電腦。另外，Acer Predator 內置了 2GB LPDDR3L 記憶體以及 32GB eMMC 硬碟，其實對版主黎講，對於一部專為打機而設的平板電腦，2GB RAM 配 32GB ROM 實在太不夠用了。版主使用了安兔兔 v5.7.1 以及 Basemark ES 2.0 Taiji Free 來為呢部 Acer Predator 8 進行跑分測試，安兔兔結果顯示，Predator 8 的跑分為 51017 分，這個分數並沒有預期般高，不過睇番細分，GPU 3D 繪圖方面 Predator 8 有 15033 分，這個分數都還可以。至於 Basemark ES 2.0 Taiji Free 的跑分結果，Predator 8 的得分為 56.89 fps，有 60 fps 叫的話叫十分好，得出 56.89 fps 這個分數，代表玩 3D 遊戲時應該都會有不錯的表現。
▲ AnTuTu 的跑分為 51017，並不是特別突出，不過從細分中可以看到，在 3D 方面的分數有 15033 分，作為一部定位係打機的平板電腦來說，這個分數還算可以。從數字來看，Predator 8 的跑分比 LG G4 略高，僅次於 Meizu MX5 以及 Moto X Style。內存方面，Predator 8 採用了 2GB RAM 以及 32GB ROM，對於真係打機的用家來說，未必夠用。
▲ Basemark ES 2.0 Taiji Free 用來測試你的裝置運作 3D 遊戲時的效能，有 60 fps 代表十分好，你見到 Predator 8 的分數為 56.89 fps，仲差少少先去到十分好，但整體分數尚算不錯，相信玩 3D 遊戲時應該都會有不錯的表現。
版主試玩賽車遊戲 Asphalt
作為一部以打機為定位的平板電腦，咁當然唔能夠淨係靠 spec 就去判斷好定唔好啦，始終都係親身體驗下先得。不過同大家分享親身體驗之前，都係要俾大家知道佢嘅少少資料先! Acer Predator 8 採用了 Intel 第 8-LP 代 16EU 600MHz 圖像處理器，並且採用了 Predator Precision Plus 的技術，能夠提高其感應力，讓使用者在打機的時候能夠更準確的瞄準目標，降低失誤的機會，打機打得更盡興。除此之外，Predator 8 亦具有 Predator TacSence 技術，在機身左右各設置一顆震動摩打，當你打機的時候，呢兩個摩打會隨情景而震動，能夠增強逼真的感覺。另外，Acer 聲稱呢部 Predator 8 配有 4 個不銹鋼指向喇叭，當你開啟佢嘅音效時，你會感覺到啲聲音好似衝向你嘅方向咁，打機或者睇片的時候感覺更震撼。咁係咪真係做到咁逼真、感應力咁好呢? 版主就下載左 Asphalt 呢隻賽車遊戲，去親身體驗一下。
▲ 上手玩呢隻 Game，感覺相當流暢。由於平時少打機的關係，玩呢隻賽車 Game 覺得有點兒難操控。不過如果話玩果陣時的感覺，因為佢有震動摩打的關係，所以當架車撞的時候，就會震。咁版主係咁撞，所以就係咁震，都好合理，係咪真係更逼真呢? 版主覺得又未必，但確實就玩得更有 feel。至於因為佢嘅機背設計中間位置係有少少凹落去的關係，我覺得拎住黎打機個手感係唔錯的。音效方面，到底係咪好似 Acer 所講咁震撼呢? 由於版主當時的環境比較嘈雜的關係，儘管將部機的聲量開到最大，但果種震撼的感覺並不明顯。
小結
親身上手玩過呢部機之後，版主覺得，如果你純粹當佢係一部「遊戲機」的話，咁佢都算係一部唔錯的選擇，打機的體驗都相當流暢，而且佢配備左 2 個震動摩打，令到成個遊戲體驗更加有 feel。從外型上來看，佢同一般的平板電腦個樣唔同，顯得更有自己的特色，令人一望到部機，就能夠立即辨認到佢就係 Acer 的 Predator 8。版主個人對呢部機都有少少興趣，當然主要原因係佢個外型夠特別，但呢部機的價錢並不算便宜，在香港發佈的時候，建議零售價為 HK $2998。如果去細舖買會唔會話平啲呢? 咁其實我都覺呢條問題有點兒多餘，咁實係會平啲嘅，但平得唔係咁多，睇番深水埗黃金的售價，Predator 8 而家係賣緊 HK $2880，只係平得果一舊水，似乎係因為呢部機本身無咩人理，所以細舖都懶得減價。如果呢部機跌到二千五樓下，版主或者都會入番部玩下過下癮。你又對呢部 Acer 嘅 Predator 8 有咩睇法呢? 留言講下啦!
在文章刊登時，Acer Predator 8 的建議零售價為 HK $2998，按這裡有詳細規格及最新賣價。