相信入黎睇呢篇文既網友，都應該係睇過之前發布既 A7R II 開賣情報文。你覺得兩萬幾既定價好貴？ 但客觀 D 講，功能上既升級好大，幾乎完善左上一代好多的缺點：像素提高至 4240 萬像素，更高既感光度達到 ISO 102400，加上 399 點自動對焦點，配合五軸機身防震同 4K 拍片，可以話同其他旗艦級別全片幅有得一戰！整個試玩過程中我印象最深既係，A7R II 對焦更快，而且手感更好，畫質？ 當然更好！ 我今日為大家帶黎 A7R II 既簡單初體驗，GOGOGO！
外觀無大變 細節有調整
其實論規格，Sony 係無反全片幅可以話仍然獨霸市場。無反機身勝在輕巧，但 A7R II 規格無因此而縮水，反而提供近乎單反全幅機水準既規格，甚至部分功能更有過之而無不及，所以都吸引一班忠實用家支持。
▲ 外觀上同 A7R 無咩大分別，一般人望落都以為係一代機。
▲ 但其實 A7R II 手把位置做得更深，更能夠穩固地掌握機身；至於機身厚度上變化不明顯，仍然是大約兩張標準 SD 卡，基本上支鏡頭仲厚過機身。
▲ Sony 官方話，聽到用戶既意見後，將轉盤選單修改左少少，對於 ISO 操控會更方便；手把位置側面有 NFC 連接，對應 WiFi 同智能手機作出互動。
▲ 究竟點樣分別到一同二代 A7R 呢？ 答案就係機背屏幕上方會有刻字 A7R II；而我最欣賞有一個設計，連電子觀景器結構都用上 T* 鍍膜，呢個細節真心好重要，完全係邁向「睇到咩等於影到咩」呢個概念。
▲ 大家放大會見到機頂位置寫住 4K SteadyShot Inside，呢個係 A7R II 吸引我既內置 4K 錄影功能？ 呢個 4K 同手機既 4K 錄影完全係兩個世界，單頻數據流量已經天差地之遠！望上少少白色果一個魚蛋圖示，其實係為專業級別拍片人而設既對焦尺。機身亦會見到有獨立錄影按鈕，下方位置是單記憶卡插槽，支援 SD 卡系列和 Sony 自家的 MS 卡系列。買記憶卡時必須留意是否支援高流量既 4K 拍攝。
▲ 機頂轉盤操作加入機械按鈕鎖，防止操作過程中唔小心碰到個轉盤。
▲ 心水清既網友都知道，A7R II 續航能力真係差左少少，得 290 張左右。Sony 都知道呢個尷尬位，所以跟機器都會有兩粒電，比你影夠 500 張有多，都算叫做貼心架啦；另外，發布會現場亦刻意提及有呢兩個轉接環，Canon 款仲出到第四代，睇黎 Sony 真係好有野心撬人轉會
。手感提升 對焦爽快
呢度必須先講一句：今次發布會並無安排攞走自己拍既相片，原因係 Sony 方面指軟件仍然在作最後調整，看來是不想影響網友們對這部 A7R II 畫質的判斷。那我只好跟大家分享一下，我現場上手試玩既體驗。首先必須要說， A7R II 雖然數字上比 A7R 重和大，但對於使用其他品牌旗艦單反既我黎講，已經叫做非常輕巧，而且好鬼細，你望下下面張圖就知道：
▲ 市面上應該無咩邊部全片幅無反、單反可以比我一手掌握掛？ 小弟我係正常男人手掌大小。
值得一提係，A7R II 個電子觀景器係我用過咁多部裡面最好既一部，更多像素既 OLED 加上 T* 鏡片鍍膜，清晰、明亮之餘，也沒有明顯既遲滯感。另一樣要講既係對焦速度，過往 A7R 對焦仲會令我覺得有少少唔爽，但今次 A7R II 399 相位對焦點覆蓋左 4 成幾畫面，上代只係對比式，有玩開相機既網友都知道呢度對焦表現已經差幾皮。我現場燈光不足既環境下，都一定做到「秒焦」，姐係一秒內完成對焦切換。唯一讓我不習慣係快門鍵太軟了，半下對焦觸感不太明顯，好容易想對焦但其實就已經影左。
▲ Sony 自己都整左個對比表，同熱門既 Canon 5D3、Nikon D810 甚至旗艦型號 1DX 和 D4S 正面交鋒！基本上除左連拍速度和低光對焦同對手打成平手，或者稍輸一些外，不論在對焦點數目，對焦點覆蓋範圍，甚至拍片自動對焦等，都比對手優勝。小弟我未有機會接觸 1DX 和 D4S，但 A7R II 對比我熟悉既 5D3 和 D810，對焦速度上都是秒焦，也就是分別不大，都是很爽快就完成對焦！
拍片設計貼合度高
A7R II 呢部野最大賣點當然係內置拍到 4K，無須外加儲存裝置！雖然我係現場無辦法測試到個 4K 拍攝表現，但 Sony 就整左個內部用既對比圖，同幾個熱門對手鬥一番，基本上囊括左業界常用既幾款機 ( 微電影神機 5D3 呢？ 不過有更好既 1DC )！大家可以見到規格上既分別，A7R II 最大特點係多左個 Super 35mm，完全模擬到傳統菲林電影的景深，姐係大家成日講既電影感！呢樣野係真電影界廣為採納既制式，唔係微電影呀！
▲ 在拍片的制式上，A7R II 明顯比對手有彈性。
送上官方試相
我係 Sony 官方站度搵左兩張 ( 全部都係得兩張咋 )，轉載過黎比大家參考。點擊就可以放大查看細節位。
A7R II 上手總結：
有人覺得呢部機貴，但如果客觀一點從規格和性能表現，完全匹敵他廠全片幅之餘，輕巧度大大加分，我認為值得賣到兩萬幾呢個價位！ 數字上，上面有圖有真相比大家睇到對比圖；實際上，機身小巧卻不失操作性，加上高速準確對焦令我頗為滿意。另一個加分位置是，如果你跟我一樣有拍片需求，又想一雞兩味影埋相，A7R II 可以話係兩者都完全兼顧。最後送上一張靚女圖，你見到佢揸住部 A7R II 都唔覺得好大部。
Sony A7R II 於文章發表時，香港定價為港幣 23490 元，詳細規格和售價請參考這裡。