就算只得 3 日假期,好多香港人都會想飛一轉東京,最近日本網站 SoraNews24 介紹一間位於東京千代田區嘅拉麵店,只需要 5000 yen(折合 HK$362)就可以任飲清酒,仲有任食日式餃子同大大件唐揚炸鷄,係咪好抵先!地址跳轉話你知。
[SEP]
呢間外表平凡嘅拉麵店叫 Arizuka / 蟻塚,位於千代田區,就喺神保町附近。店外有一部熟口熟面嘅拉麵購票機,不過仔細睇下個 Menu,就會見到任飲清酒。蟻塚並唔係只供應 1、2 款清酒,佢哋 2 樓嘅雪櫃內有超過 50 款來自日本各地嘅選擇任你試,而且無限時,任飲至 11pm 打烊為止。
只要顧客選擇飲飲清酒,蟻塚就會送上半份招牌拉麵,而且有即叫即煎嘅脆卜卜日式餃子,有紫蘇等蒜頭味選擇,又有大大件嘅唐揚炸雞都係任食。有酒飲有拉麵炸雞同餃子,就算唔係任飲任食 5,000 yen 都已經抵到爛,何況有咁多清酒可以試,呢個價真係無敵!
Arizuka / 蟻塚
地址:東京都千代田区西神田2-1-11 ミサワビル1F(Google 地圖)營業時間:11am - 午夜
資料來源:soranews24