鴨記小店搶 Lenovo 手機代理權狂推新機!原代理 D1  力數對手「魚目混珠」

Keith Yim 2018-12-07 22:33 | Lenovo
香港有唔少中國大陸品牌手機,好似小米、Vivo 等等,佢地喺香港有 Office,會直接處理香港賣嘅手機。但係 Lenovo 就比較奇怪,雖然有聯想香港辦公室,但似乎只照顧 PC、筆記簿電腦,手機部份,一直由代理主導。本來一直相安無事,但最近有一間來自鴨寮街手機店,聲稱攞了聯想 LENOVO 手機香港代理權,本來代理開嘅 Disturbution One (D1) 力數佢哋唔係真代理,係「混水摸魚」。到底誰是誰非,版主了解過。

lenovo-Fb02.jpg

鴨記小店搶 Lenovo 手機代理權

去開深水埗鴨寮街港鐵站出口,都會見到有兩間用類似直銷方式賣手機嘅舖頭,一間叫鴨記電訊,一間叫永揚數碼,呢兩間手機舖,其實同一個老闆。最近佢地力推 Lenovo 手機。以為佢地賣水貨?唔係喎,佢哋掛晒貼紙,寫明自己係聯想手機嘅香港代理。更有趣嘅係,佢哋主動聯絡版主,想借機畀我哋做評測,更講明自己係 Lenovo 手機新代理。

原代理 D1 反應強烈

香港 Lenovo 手機代理,一直都係 Distribution One (D1),呢單 News,我哋係 2016 年都有分享過。難度 Lenovo 香港,又轉代理?版主立即跟 D1 要員聯絡,原來佢哋早已知道呢件事,並強調

呢間新來者:「不是香港 Lenovo 手機代理、亦不是 D1 分銷商」,佢哋仲用好重嘅語氣,形容呢間公司:「魚目混珠」

我哋主動跟 D1 對手查詢。聲稱簽了 Lenovo 手機代理嘅公司叫「康帕斯電子科技有限公司」,而上面提過兩間鴨寮街小店,就係佢哋旗下。康帕斯負責人跟版主展示了由「联想移动通信进出口(武汉)有限公司」發出嘅品牌標識使用確認書,寫明可以使用聯想及 Lenovo 字樣,作為銷售業務之用,授權範圍包括了聯想智能手機及智能手表,適用地點為香港及澳門,而有效日期為 2018 年 10 月 29 日至 2019 年 10 月  31 日。事實上,康帕斯亦在深水埗開設 Lenovo 手機維修中心,提供佢地賣嘅手機一年保修。我哋亦得知佢地賣嘅 Lenovo 手機,不是中國大陸版本,是行香港 ROM,並附有英式三腳充電器。版主亦有問佢哋賣嘅手機有無 OFCA 手機幅射認可標籤,他們則說已在申請中 (這不是法例要求,只是一個手機幅射認証,代理賣行貨多數會申請埋嘅。)

我哋有跟佢地講,有關 D1 對佢地睇法,康帕斯負責人展示了 D1 跟聯想香港跟 D1簽定代理合約,版主留意到有兩點,首先協議上,沒有寫明「獨家」兩個字,另外,該份合約在 2018 年 2 月已完。當然,之後有無續約,不得而知,但查閱記錄,對上次 D1 在香港推出的行貨 Lenovo 手機,是 2018 年 1 月之事,之後,佢哋再無引進任何新 Lenovo 手機,去到十二月,又會推出兩款千元手機,但這兩款 S5 與 K5 Play,其實康帕斯同樣賣緊。

IMG_9812.JPG
▲ 在深水埗鴨寮街的手機店,最近力谷 Lenovo 手機,其中一款 S5,是原有代理 D1 在下星期先係香港宣佈開賣詳情。

IMG_9811.JPG
▲ 以為佢地賣水貨機,點知佢地話自己係 Lenovo 手機港澳經銷商,仲係有十二個月保養及係正貨。

IMG_9810.JPG
▲ 仲出埋介紹,教人點分行貨、水貨。

lenovo02.jpg
▲ 這個代理康帕斯電子科技的卡片,亦有 Lenovo 的 Logo,並寫上是香港及澳門總代理。

新代理引入更多款式

康帕斯負責人聲稱,聯想在上年開始改變不同代理嘅方法,改為由「联想移动通信进出口(武汉)有限公司」統一負責,所以佢哋會向呢間公司取得銷售證明。另外,他們亦強調

康帕斯不是香港唯一 Lenovo 手機代理,佢哋亦知道 D1 已傾了兩款 Lenovo 手機作銷售。佢哋跟 D1 不同嘅係,會引入更多 Lenovo 手機於香港發售,由十月起已有五款型號,比以往 D1 一年嘅種類都要多。

不過,佢哋亦講咗,康帕斯代理權,不包括聯想旗下嘅 Motorola 手機。我哋再向 D1 了解進一步睇法,不過,他們堅稱要在 12 月 20 日新機發佈會當天才有更詳細說明。而據知發佈會當日,會有聯想北京代表出席。

IMG_20181207_170200.jpg
▲ 康帕斯在深水埗已有維修中心,收費亦貼晒出來。

Screenshot 2018-12-10 at 10.39.00 PM.png
▲ 原有代理 D1,係佢哋網站,推上一部行貨 Lenovo 手機是 K8 Note,是今年一月的事了。但下週會公佈佢哋會代理多兩款入門手機。

香港聯想睇法

至於,聯想香港又點睇。版主亦有問過,

聯想香港稱香港 Lenovo 手機代理就是 Distribution One (D1)沒有提及康帕斯呢個名。

版主亦問過幾個熟香港手機代理嘅朋友,他們會覺得,似乎似「聯想內部內訌」;亦有朋友說,聯想不是第一次係手機代理上,在同一個地方,製造兩個代理,等佢哋「鬼打鬼」,最重要出到貨,有錢收就得。

站在消費者立場,有更多新機選擇,有信得個客戶服務是最重要。唔知網友點睇 Lenovo 手機,點睇今次代理事件呢?

 

最新新聞