平鬥自由鳥!csl. Club SIM 攜號轉台 $58 起 免合約 送三重優惠

左定坤 (Cho Ting Kwan) 2019-11-20 21:47 | Csl
上台,仲簽約?不了!而家唔興簽約,免合約先係王道!無論係 csl.、數碼通抑或 3HK,都各自有免合約服務,不過就另起品牌做,csl. 就 Club SIM,數碼通就自由鳥,而 3HK 就 MO SIM。三張 SIM 都有得攜號轉台,但當中就以 csl. Club SIM 最麻煩,要去門市填三張 Form 處理,而自由鳥同 MO SIM 就簡單網上申請搞掂。不過,而家 Club SIM 終於推出咗自助攜號轉台服務,月費 $58 起,免合約,仲有好多嘢送,網友又會唔會用呢?睇下文啦!

FB.jpg

不過都係有一個麻煩地方,就係首先你要有 Club SIM 號碼,如果你本身無 Club SIM 號碼,你會發現無一個地方可以畀你攜號轉台。就即係咁,本身版主我自己都想試下轉過嚟 Club SIM 一個月,但點知因為我未有 Club SIM,原來就無得畀我直接轉,唯有借版主 Keith 電話去望一望下攜號轉台個畫面 (如下圖)。

WhatsApp Image 2019-11-20 at 9.27.18 PM.jpegWhatsApp Image 2019-11-20 at 9.27.19 PM.jpeg

所以話,如果你想攜號轉台去 Club SIM,但你本身無用 Club SIM 的話,首先你要申請咗張 Club SIM 號碼先,最低消費係 $50。然後唔想浪廢咗張 Club SIM,你起碼要先用哂你買咗嘅數據,唔係就嘥哂!之後你就係 Club SIM App 個人檔案果頁,選擇「攜號轉台」,然後依着指示,選擇你想選擇的 Plan,並填返啲資料,再確認資料,付款,之後就完成。

其實呢樣係麻煩嘅,好似我由其他台想轉去自由鳥或者 MO SIM,我都唔需要本身要用緊自由鳥 / MO SIM,然後先再覆蓋個號碼去你個賬戶,但 Club SIM 就要你本身有 Club SIM 號碼,先至可以攜號轉台到,對於新客戶嚟講,並不是太方便。

Club SIM 自助攜號轉台 Plan 平過自由鳥

不過,撇除麻煩不說,其實 Club SIM 自助攜號轉台嘅 Plan,又唔算貴。最平 $58 起,包 2GB 42Mbps 本地數據 + 無限通話分鐘。佢地幾個 Plan 都係用爆咗,都會提供 128kbps 速度,無限任用,等你不會斷網。而且而家轉台仲有三大「至激優惠」,除咗包 90 日額外 5GB (即係平均每個月多 1.6GB 左右),新 Club SIM 客戶仲可享港幣 $900 體驗組合,再送 Clubox 50GB 90 日雲端儲存體驗服務。

聽落比起對手自由鳥抵玩,畢竟自由鳥雖然係 $48 起,但 $48 淨係得 500MB 數據,而計返最貴個 Plan,Club SIM $148 有 15GB 數據,平均約 $9.9 / GB;而自由鳥就 $140 得 12GB,平均約 $11.7 / GB。講平,似乎 Club SIM 平得多。網友又會唔會選擇攜號轉台去 Club SIM 呢?

螢幕截圖 2019-11-21 下午3.31.52.png
 

最新新聞