第三次取消 2G 網絡
香港嘅手機台服務，由模擬通訊，升級至數碼通訊，即 2G，再升級至 3G、4G，到今日全港大部份地方都有 5G 訊號，你收唔到，可能係你部手機未升級。舊嘅唔去，新嘅唔嚟，2G 服務係時間講 Bye Bye。數番歷史，香港曾經有過嘅 2G 網絡包括當年香港電訊 1+1 嘅 TDMA (D-AMPS) 制式，仲有大家一定記得，由歌手黎明代言嘅和記新幹線 CDMA 網絡，但呢兩個 2G 技術及網絡，一早已被淘汰。今次政府決定 Fade out 嘅 2G，係講緊 GSM，包括埋早期講嘅 PCS 網絡，所以實際嚟講，係第三次取消 2G 網絡。陸續有嚟
要取消一個制式，尤其係 2G，需要政府批準，今次 3 香港搶先申請取消 2G 服務，最後負責手機網絡嘅通訊事務辦事處，批準相關申請。3 香港嘅 2G GSM 網絡，會喺 2021 年 9 月 30 日後正式關閉。香港四大網絡商，本身都有自己嘅 2G GSM 網絡，其實，大部份都將相關嘅頻譜資源轉為 3G WCDMA 或 4G LTE 網絡。呢幾年，網絡商大都改由 1800MHz 頻段上，一啲不能成為 4G LTE 嘅「碎」頻段提供 2G 服務。而今年 9月 30 日，嗰啲「碎」頻段會歸還俾政府。相信除咗 3 香港外，其他網絡商都會好快申請取消 2G 服務。
真正用得係 2G GSM 網絡嘅資源已極之少。加上，大把份用家採用嘅手機，都會同時支援2,3,4 甚至係 5G 網絡，要係好極端連 3G 訊號都無嘅情況下，先至會轉至 2G 嚟維持打電話嘅功能。所以，今次取消 2G 網絡，對大部份用家嚟講，影響好微。不過，若果你仲有一啲仲開到機嘅 2G 手機，相信最後插到 SIM 卡，喺香港收到訊號嘅日子，越嚟越短，大家儲手機一族，係時候把握機會，最後懷舊一番。
▲ Nokia 6310 (2021) 雖然是新發表的手機，但只因支援 2G GSM 網絡，都可以肯定香港不可能推出啦。
3G 機都好快無網好用
順帶一提，3 香港早前亦更改咗用喺早期 3G 手機嘅 2100 頻段，改為 5G 網絡。早期 3G 手機，也只有 2100 頻段及 2G 支援，呢批手機，亦會係 9 月 30 日，唔可以再用係 3 香港嘅網絡。最後一句，要變的都要變，2G 係香港變得好慢架啦，你睇下香港其他嘢？