$180 csl. 無限數據玩完！CMHK 傳會跟風加價，上台要趁早？

左定坤 (Cho Ting Kwan) 2018-07-18 19:31 | Csl

$200 唔使玩到全速真無限數據 Plan，其實係普羅網友嘅福音。然而，最近 csl. $180 無限數據 Plan 玩完，加返價至「正常」價位，變相百幾蚊可以玩到全速無限數據嘅，得返中國移動香港 CMHK，無對手。講到現時最抵，一定係 CMHK $168 Plan，玩到無限上網仲要有 1GB 大灣區數據，就算是版主都猶豫緊想轉去。不過，唔可以猶豫太耐，要上台就需趁早，因為 CMHK 隨時跟風 csl.，將無限數據 Plan 加返價。



csl. 當初推出 $180 真無限數據 Plan 時，其實講到明係去到 7 月 15 日，不過果陣版主以為，csl. 會順勢「真減價」，就算過咗 7 月 15 日都會繼續 keep 住 $180。點知，過咗 7 月 15 日之後，csl. 真係加返價，變回正常的價位，街站會重現 $220 / $238 無限數據的易拉架。



現時最抵玩無限數據嘅，應該係 CMHK，$168 就玩到仲要每月送 1GB 大灣區數據，啱哂版主呢啲不時要返大陸嘅人。CMHK 呢個優惠做到 7 月 31 日，問及一個相熟嘅 sales，7 月 31 日之後會唔會好似 csl. 咁加返價呢？sales 表示因為 csl. 加價的關係，CMHK 有 9 成機會會跟。亦即係話，如果想用平價無限上網，穩陣起見就要月尾之前上台，如果唔係隨時會走寶。對於 csl. 加返價，網友有咩意見呢？你又想唔想 CMHK 繼續 keep 住 $168 無限上網呢？留言講兩句啦~