數碼通今日宣佈推出一個新優惠，平時如果上數碼通申請「超貼心智能手機計劃」，月費 $298 就有 6GB 全速數據，仲有得免費升級 FUP 無限數據嘅，而家又多咗一個新選擇：唔送 FUP 無限數據，送「六地數據共享」。亦即係月費 $298，就可以在香港、中國內地、澳門、台灣、日本、新加坡，都能夠共用數據，而且返大陸仲可以用到 WhatsApp、Facebook，但就得 6GB。
留意一下，其實你如果又想要六地數據共享，你都可以每月 + $168 升級至 FUP 無限數據，但 FUP 無限數據淨係可以在本地用。所以呢度係有個盲點，繼續睇落去再講。
分析：數碼通 6GB 六地共享數據 VS HKBN 5GB 漫遊數據，邊個好啲？
老實果句，無論是數碼通抑或是 HKBN，都係有佢哋嘅優點同缺點。就以 HKBN 為例，雖然佢係價格係相對低啲，而且分得好清楚，5GB 係 for 本地，5GB 係 for 漫遊，唔會好似數碼通咁撈埋一齊，假設你加咗 $168 升級至 FUP 無限數據喎，然後你月尾想去旅行，點知月頭已經用哂果 6GB，到你月尾去旅行時，就用唔到果六地數據共享。對於高用量的用家來說，呢個 Plan 就未必咁適合。但 HKBN 因為揀咗同 GlocalMe 合作，卻忽略了香港人的使用習慣，去到大陸無辦法使用 WhatsApp、Facebook，其實係一個好大的問題。至於數碼通又有乜好？無錯個 Plan 係貴啲，但唔好忘記 HKBN 果 5GB 本地數據，速度最高只有 21Mbps，但數碼通呢個係 4.5G 全速數據。同時，返大陸又可以用到 WhatsApp、Facebook，亦都係一個值得嘉許的事。然而，版主都係要俾個建議，就係應該要效法一下 HKBN，將漫遊數據同本地數據分返開，又或者索性出大絕，如果加咗錢升級 FUP 無限數據，就唔好淨係 for 本地用，應該係要六地都可以共享埋無限數據，咁就應該會有大吸引力一點。
最後版主都要順帶一提，其實中國移動 CMHK 的「飛常亞洲」服務計劃，雖然都係 $298 6GB，但除咗支持大中華數據之外，仲支持其他 17 個亞洲國家 / 地區。你又點睇呢？