BlackBerry Priv 主打滑蓋 Keyboard ，但造工⋯⋯
BlackBerry Priv 作為一部主攻商務人士的旗艦，係定價上高就預左啦，不過值唔值 $6488 呢就係另一個問題了。係外型上， BlackBerry Priv 用左外觀近似 Galaxy S6 Edge 的曲面屏幕，在加上 2K 解像度的 Amoled 屏幕，遠睇係相當靚仔的。版主係初步試玩過之後，覺得其推蓋設計用落都幾就手，要推鍵盤出來不會很費力。而其主要賣點實體鍵盤，版主除左自已試用之外，仲問左數個朋友的意見，跟 BlackBerry Classic 等傳統 BlackBerry 手機相比， Priv 的鍵盤受滑蓋式設計所影響，相較之下無咁突出，打字的感覺上無咁明顯，但同 BlackBerry Passport 相比，因為鍵盤較窄，使用 Priv 時大姆指的移動幅度無咁大，打字就會更準確。所以簡單來說鍵盤應該能夠令大家滿意，但對於傳統「BB 機」用家來講就未必會習慣。
講完鍵盤後就要講外型造工了，呢部份可能係今次版主初步試用體驗之中最失望的一環。手機造工好與壞版主個人認為係同價錢掛勾的，因為大家不會對平價千元機有好高的要求，但對於講緊幾千蚊的旗艦來講，造工就要有相應的水準了。好可惜， BlackBerry Priv 正面好吸引，機背卻完全係兩回事，要價六千多的手機用上薄膠背蓋都算，其質感卻是非一般的糟糕！ BlackBerry Priv 在機背上用上近似軟膠的材質，係未有長用的情況下手感還可，不過用左一陣手機有返咁上下溫度時，卻會有粘粘的感覺，個人覺得大陸千元膠機紅米 Note 2 或者魅族 Note 的手感都無咁差呢！除左塑膠材質手感不好之外，係機背的下半部如果大家輕輕敲一下會發現有不少虛位，令手機整體感覺相當唔扎實。作為一部主打商務人士的高階機， BlackBerry Priv 的造工實在好難稱得上合格呢！
▲正面看起來 Priv 的黑色機身能予人穩重的感覺，係型嘅！
▲ Keyboard 拉出來之後一隻手拎住都可以做到，單手打字都勉強可以。
▲ Priv 正面好睇，背面遠睇都可以的，不過手感就唔多好了。
▲相機方面 Priv 有 1800 萬像素主鏡頭，但時間關係，版主試唔切⋯⋯
▲呢三個按鍵也是 Priv 其中一個令人模不著頭腦的地方，中間按鍵大家不要以為係電源鍵，其實係一個音量快捷鍵來，個人覺得係有點多餘的。（電源鍵係另一邊也會令人有點不習慣)
▲ Sim 卡槽以及 Sd 卡槽位於機頂，而 Micro USB 插口同 3.5mm 插孔就係機底。
▲ Priv 係外型上值得一讚係推蓋時感覺相當暢快！
▲因為用上左曲面屏幕的關係，版主即時拎左 S6 Edge 來做個外型比一比。
▲可以見到 S6 edge 的曲面屏幕係弧度上比起 Priv 明顯。（但並不代表更好用，用左咁耐版主都覺得 S6 edge 個曲面屏幕得個樣但不好用
）
跟 G4 一樣用上 Qualcomm S808 處理器，效能表現合乎預期
係硬件上， BlackBerry Priv 跟 LG 上半年大熱旗艦 G4 相似，用上 Qualcomm S808 配 3GB RAM 以及 32GB 內置容量，支援最過 2TB 的 MicroSD 卡。一如 S808 手機的表現， BlackBerry Priv 一般使用的話流暢度相當好，但係如果開大量 apps 的話就會慢慢有少少卡頓的感覺。從安兔兔、 Vellamo 以及 Basemark 2.0 等跑分軟件來講， BlackBerry Priv 的成績都算乎合大家預期嘅。
▲在安兔兔上， Priv 的得分為 43941 ，當然不能跟五萬分以上的 S810 手機相比。
▲ 在 Vellamo 方面， Priv 的表現其實相當平均，亦反映出其效能已足夠一般用家使用。
▲ Basemark 2.0 上有 59.48 fps 的成績，同一般旗艦機表現差不多。
BlackBerry Priv 鍵盤算唔算好用？看用家的使用習慣
因為實際試用時間連一小時都唔知有無，所以係鍵盤試用體驗上版主都唔敢講太多，因為同大家一樣，版主甚少用有實體鍵盤的智能手機，適應一排可能使用感覺會不同都唔定。不過，初步看來， Priv 的鍵盤未必滿足到一般用家需求的。在硬件方面， Priv 抵讚的地方係同 BlackBerry Passport 一樣，實體鍵盤支援觸控手勢，用家可以當 TrackPad 咁用。不過 Priv 的缺點就係跟以往 BB OS 手機相比，打字反應較慢，曾經出現鍵艦跟唔上用家手指的速度。在軟件方面，如果大家一般來講只會打英文的話， Priv 內置的 BlackBerry 鍵盤應該會令你滿意的。但在中文打字的支援上 Priv 的表現只係令人失望。因為 BlackBerry 本身未有自家製的中文打字輸入 app 的關係（但預載左 Google 鍵盤，廣東話同拼音輸入法在使用上係沒有大問題的），大家只能在 Play Store 上安裝 Go Keyboard 或者「速成鍵盤」等主流中文打字 apps 。不過版主試過用 Google 輸入法打速成時，原來 Priv 的實體鍵盤是不支援的，尤如廢左武功。之後版主再試用個人最愛的速成鍵盤，雖然叫做用到，但兼容性都不太完善，標點乎號要用返虛擬鍵盤才可用。簡單來說，BlackBerry Priv 在打字上，版主暫時不覺得很好用呢！
▲ 打字部份其實需要用一般較長的時間才能有一個更全面的體驗，初步看來在軟件兼容上 BlackBerry 係可以做得更好的。
小結：Priv $6488 這個定價初步看來不太值啊！
版主一般好少有如此肯定的結語，但因為 BlackBerry Priv 定價要成 $6488 ，大家看完上文好壞參半的試玩體驗後，大家基本上都可以肯定部機定價同質素不太相乎了。確實， BlackBerry 願意在 Android 系統上作出大膽的嘗試係值得肯定的，而且其滑蓋式鍵盤設計也是 Android 平台上久違的東西，所以 Priv 一出實在比到大家耳目一新的感覺。不過，在造工以至軟件支援上，從 Priv 看來 BlackBerry 都仲有不少可以進步的空間，個人而言要用 $6488 入手呢部機就真係覺得唔多抵了。唔知大家又對呢部機有沒有甚麼期特呢？另外如果有疑問的話，不妨留言講講啊！在文章刊登時，BlackBerry Priv 的售價為 HK $6488，按這𥚃有詳細規格及最新賣價。