開箱！黑莓 KEYone 造工不錯，4.5 吋屏幕剛剛好
講到外型設計，今次 BlackBerry KEYone 確係抵讚，設計靚仔之餘，造工相比之前 Priv 好得多，見到有網友關心 KEYone 屏幕係唔係真係咁唔穩陣，一跌即甩，這裡版主要說聲抱歉，有關這個問題，我無法為大家進行實測
，只能說任何手機跌落地都會有損毀風險。另外，雖然屏幕只有 4.5 吋，不過也許是因為用上實體鍵盤的關係，我又覺得這個尺寸剛剛好，並不會覺得特別細。
▲ 一如以往 BlackBerry 給人的感覺，包裝盒都是黑沉沉的。
▲ 包裝盒底部會有這部 KEYone 的基本配置資料，例如 CPU、相機、儲存空間、電池容量等等。
▲ 開箱！包裝盒內會有充電火牛、耳機、USB Type-C 線、SIM 卡針以及說明書。
▲ KEYone 配備了 4.5 吋顯示屏幕，雖然尺寸上相比現今的 Android 手機都要細小，但因為有實體鍵盤的關係，版主覺得這個尺寸剛剛好。
▲ 屏幕上方會見到有 800 萬像素的前置鏡頭、Sensor 以及聽筒。
▲ 實體鍵盤中的空格鍵，同時可作指紋辨識之用。
▲ 機背其實幾有復古的味道，中間位置印有 BlackBerry 的 logo。
▲ 左上方是 1200 萬像素的主鏡頭以及閃光燈，而 KEYone 所用的 IMX378 鏡頭模組，是跟 Google Pixel 所用的一樣，所以在影相方面，都會相當不錯。
▲ 機身右側會有 SIM 卡槽、音量鍵以及便利鍵。
▲ 開關鍵則設於機身左側，版主成日都會將佢同便利鍵撈亂，因為今時今日大部份的 Android 手機，開關鍵都是在右側位置。
▲ 機底會有 USB Type-C 插槽以及喇叭。
▲ 機頂則有 3.5mm 耳機孔。
▲ 雖然屏幕只有 4.5 吋，不過因為加埋實體鍵盤，所以拎上手感覺同一般 5.5 吋手機差不多大小。
實體鍵盤是賣點！是情懷，還是實用？
有實體鍵盤是 KEYone 一大特色，不過用後感覺又如何呢？版主使用後結論是，啲掣算係好撳的，如果你打英文，實體鍵盤確係幾好用，但打中文就會稍嫌不方便，特別是用開倉頡 / 速成的網友，實體鍵盤上沒有印着倉頡字碼，導致打字的時候成日都要估估下，令打字速度大幅下降。當然，如果你是用拼音輸入，就未必會有這個問題。除此之外，當你要轉輸入法或者打數字，用唔慣會覺得好唔 user-friendly，例如一般 Android 手機轉輸入法只需按一下地球就可以，但 KEYone 需要長按空格鍵，或者按「alt + Enter」進行切換。總括來說，我會覺得有實體鍵盤，其實可能只是一個情懷，但已沒有了以前 feature phone 年代果種感覺，實用性並不高。網友又是否同意呢？▲ 指紋辨識已跟空格鍵融為一體，所以版主順便展示俾大家睇下，到底 KEYone 指紋解鎖速度快唔快以及準唔準。而解鎖之後，版主打開了備註嘗試用這部 KEYone 的實體鍵盤打字，因為沒有倉頡字碼的關係，導致用開倉頡的版主，打字的準確度大幅下降。另外，在輸入法上亦有一些問題，例如當你想打個「日」字，佢只有「曰」給你選擇，而不是「日」。而轉輸入法的時候，亦有點兒麻煩。
跑分軟件測試 KEYone 效能
BlackBerry KEYone 配備了 S625 處理器，根據版主對呢粒處理器的了解，在 3D 性能方面應該會不太理想，但勝在夠慳電，令一部只有 3505mAh 電池的手機，可以滿足到一天使用。另外，KEYone 內置 3GB RAM 以及 32GB ROM，並支持最多 2TB 的 microSD 卡。正常來說，S625 處理器的安兔兔跑分結果，應該大約有 6 萬多分左右，不過版主發現，這部 KEYone 只得出 56811 的分數，相比正常分數低。
▲ 根據安兔兔跑分的結果顯示，BlackBerry KEYone 的成績為 56811 分，相比正常 S625 手機的分數略低，而相對較好的是 UX 性能，當中以 UX 數據安全以及 UX 圖像處理方面比較出色，兩者都有五千多分的成績。
▲ 意料之內的事，3D Mark Sling Shot Extreme 只有 462 分，代表在運行 3D 遊戲時，體驗會相當不順暢。
Pixel 級數鏡頭！黑莓 KEYone 相機實拍！
在相機部份，BlackBerry KEYone 用上了 IMX378 感光元件，呢粒感光元件曾經用在 Google Pixel 上，在 HTC U11 未出現之前，Pixel 的 DxOMark 成績是最高分的，達到 89 分。而家 KEYone 用上同一粒感光元件，在相機方面是否會有可媲美 Pixel 的表現呢？唔講咁多，睇下試相，自然就會知道。主相機日拍表現
▲ 放大相片來看，會覺得成像細緻度一般，有少許鬆散的感覺。
▲ 在右圖背光環境下，主體顏色仍然能夠突出。
▲ 配備 F2.0 大光圈，從左圖中可以見到，在景深方面表現不錯。
▲ 整體來說，版主會覺得 KEYone 相機係有點味精，飽和度偏高，唔知你又鍾唔鍾意呢？
主相機室內表現
主相機夜拍表現
▲ 同日拍情況相似，放大來看會見到細緻位比較鬆散。
小結
整體來說，用 BlackBerry KEYone 玩左一晚之後，覺得感覺尚算不錯，不過雖然版主鍾意實體鍵盤，但其實用性並不太高，說到底賣的還是情懷。至於值唔值 $4988 呢個價，我就覺得要視乎你點睇佢相機的表現，如果五千蚊買 Google Pixel 的相機，你又覺得諗唔諗得過呢？試完影相之後，版主覺得在屏幕上看非常靚，放在電腦看表現一般，缺點是細緻度稍嫌不足，有點鬆散的感覺，但顏色鮮豔度又確係幾唔錯，網友同唔同意呢？BlackBerry KEYone 在文章發表時，建議零售價為 $4988，按這裡有詳細規格及最新賣價。
鳴謝及查詢：三禾電氣 23740618 （旺角） 23740718 （銅鑼灣）
