Android + 實體鍵盤真係有人 buy?Blackberry KEYone 評測

EriChan 2017-07-10 16:16 | Blackberry
曾經係智能手機大大哥嘅 Blackberry 雖然話已經轉型軟體保安公司,但手機品牌仍然都係唔少人嘅集體回憶。所以由 TCL 舊年正式獲得使用 BB 品牌出手機嘅權利之後,就馬上利用黑莓機最標誌性嘅直板鍵盤機設計,推出名為 KEYone 嘅配搭實體鍵盤 Android 手機,仲用左當時 DxO 最高分嘅 Google Pixel XL 同級嘅相機 CMOS,實行打響頭炮!不過... 喺呢個人人都習慣喺虛擬鍵盤打字、甚至係錄音嘅時代,整部有實體鍵盤嘅手機真係仲會有人 buy?今次 Eric 就同大家分享一下自己嘅意見喇~

KEYone_big.jpg

外觀設計
一如直述,KEYone 係用左黑莓手機最標誌性嘅直板鍵盤設計,所以時下所謂嘅屏佔比就一定大打折扣,因為成部機正面有接近四分一都係俾實體鍵盤用左,更遑論三粒熱感鍵。不過又咁講,因為螢幕上移左成吋,所以平時好難單手㩒到嘅三天皇鍵或者放得比較低嘅部分,而家都好輕鬆咁接觸到。

成部手機係黑、銀配色,走住相當成熟、穩重嘅路線,當然都係因為配合返黑莓手機本來嘅商務人士市場。喺陽剛氣嘅鋁金屬機身嘅機背上面,用相對軟嘅黑色防滑膠材料,既可以增加防滑嘅實用性,亦有提升手感嘅作用。可惜就係防滑膠設計實在太似可拆式,令到有手賤嘅朋友喺部 KEYone 借到我手之前就強行拆出來... 而家摸上手就有少少鬆鬆地,奇奇怪怪咁。所以真.機主記住記住唔好手賤,你一定會後悔。

DSC01051_web.jpg

DSC01054_web.jpg

DSC01056_web.jpg

鍵盤 + 指紋辨識器

成部 KEYone 最主要嘅賣點之一,就係正面嘅實體鍵盤,幾乎可以話買家會買(或者唔會買)嘅原因都係佢!驟眼望,KEYone 嘅 QWERTY 鍵盤係同之前 Passport 同樣設計,喺每行黑色嘅字粒之間有銀色分隔線。不過空格鍵就因為同指紋辨識器「合體」,所以睇落會比較突出。好彩就係認指紋嘅速度非常快!例如想由枱面拎起部 KEYone 咁計,基本上手指公一掂住個空格鍵就可以自動解鎖著機!

講返個鍵盤本身,雖然話個樣似 Passport,但其實就冇左喺鍵粒上面嘅小斜角,手感上係同 Priv 一樣扁扁平平咁,所以唔算特別好㩒... 不過!始終個鍵盤位都比用滑動式嘅 Priv 厚一截,所以打字方便係有進步,係有改善嘅(以一樣行 Android 嘅黑莓比較)!

DSC01053_web.jpg

相機

話晒用到同 Google Pixel XL 同級嘅感光元件,KEYone 嘅相機喺呢部分上真係唔會有得輸!只不過相機嘅成像就唔止係感光元件,仲要其他軟、硬件配合,所以都係有圖有真相嘅。

咁喺睇相之前,都簡單講兩句 KEYone 影相嘅體驗啦。因為得益於大尺寸像素同大光圈嘅優點,相機進光量好足夠,成像好多都夠銳利、清晰,就算係暗少少都唔會有因光線唔夠而炒粉。空格鍵可以當係實體快門鍵咁用,但當然就冇得半按對焦,而喺鍵盤左、右滑動就可以週整畫面曝光度,方便你影唯美過曝風格。只係佢冇得再俾你自定左、右滑動嘅手勢為其他功能,例如更多人會常用嘅變焦功能,呢到就差少少咁啦。

IMG_20170703_1955237_web.jpg
▲巴士站夜景,可以見到成像都非常清晰、銳利。

IMG_20170703_1957169_web.jpg
▲廣角夜景,最邊緣位置有少少變形,遠處景物開始有少少雜訊。

IMG_20170703_2002531_web.jpg
▲鬧市夜景,成像仲係好清晰,燈光位置亦冇散開。

IMG_20170705_1436110_web.jpg
▲高對比對日景,光暗位調整恰當,唔會有過曝。

IMG_20170707_1536385_web.jpg
▲食物大頭相,最近對焦距離算係一般,做唔到好微距嘅拍攝,但都夠用

IMG_20170703_1909499_web.jpg
▲燈光複雜 + 昏暗 + 高光差對比度!其實都控制得唔錯,KEYone 個相機真係夠收貨有餘。

OS + UI
KEYone 預載由 Blackberry 客製化嘅 Android 7.1 Nougat,官方仲話會緊貼 Google 咁推出每月安全性更新,符合返會黑莓機用家嘅預期。講就咁講,但其實喺用家角度就唔覺有好深度嘅客製化,起碼唔係幾年前 Android 手機會見到嗰種改頭換面啦,最要都係預載 app 同埋幾有心思嘅小功能。

主頁面
主頁面,亦即係 Launcher 部分就其實同 Google Now Launcher 好似,不過你會見到有部分 app 圖示多左三粒白點,原來喺個圖示上面向上滑,就會彈出小工具(即係平時會放喺 launcher 上面嗰種),意想不到地有使用彈性。以日曆為例,咁樣做就可以節省擺放大大個日曆小工具嘅空格,但又可以好簡單咁預覽日曆事項。螢幕側邊亦有個好似某某 Edge 咁嘅捷徑,原來就係 Hubs 嘅小工具,掃出黎就可以一次過睇返日曆、訊息、聯絡人資料,係一個實而不華嘅頁面,但有冇用就睇你個人喜好喇。

自訂鍵盤快捷鍵
不過系統最特別嘅,應該算係自訂鍵盤快捷鍵嘅功能,話晒部電話多左咁多個實體鍵,當然要好好善用啦!基本上 26 個英文字母同埋手機右側嘅快捷鍵都可以各自設定成唔同嘅功能捷徑,而 Blackberry 亦可以俾你揀到手機上大部份嘅原生功能或者直接用到某個 app 嘅功能(喺 Google 試算表新增文件),都係非常實用嘅!

shotcut



輸入方式

一個功能唔止由硬件決定,軟件配合都係好重要嘅一環。想講嘅就係 KEYone,甚至係 Blackberry 手機嘅輸入法啦!因為黑莓機嘅好標誌性賣點,就係好好用嘅實體鍵盤,本來對我呢種經常會喺手機打字嘅人黎講,絕對係一個吸引之處。不過!以倉頡為主要中文輸入工具嘅我,就發現 Blackberry 嘅倉頡輸入法係廢!因為簡單如「黑」、「到」、「你」、「莓」呢幾個中文字,部機都係出唔到嘅!

好啦,咁你可能會話 Blackberry 都係鬼佬公司,中文輸入法有殘缺都有原因嘅... 如果真係咁,不如部手機又唔好喺華語地區賣啦,反正都係鬼佬先用 <3 當然,Android 系統嘅好處就係可以俾你揀第三方輸入法嘅,所以只要自己裝個 Google 出品嘅「粵語輸入法」,就可以解決問題啦~

keyboard.jpg



DTEK

講到黑莓手機,就不得不得講下喺 Blackberry KEYone 唯一展現新生代黑莓基因嘅 DTEK by Blackberry 手機安全工具。簡單黎講,DTEK 會監控住部手機嘅安全設定,只要有一樣野冇做足,例如冇設定手機密碼、冇開遠端管理,佢都會俾提示你去開返。而佢亦有個部份係俾你直接管理各個 app 可以存取到手機不同功能權限嘅頁面(其實其他 Android 7 以上手機都會有),喺現今應用程式要求過多權限,而好易造成個人資訊外洩嘅時代,其實真係好有用!

DTEK.jpg

總結

到最後就總結一下部 KEYone 嘅感覺啦,作為第一部為 TCL 以 Blackberry 品牌推出嘅產品黎講,其實都算保留到黑莓機嘅味道,包括實體鍵盤、沉穩低調嘅特質,不過奈何因為要 Android 化同埋生存於現今智能手機市場嘅妥協,所以用落都係有少少「得其形不得其神」嘅感覺。當然個垃圾倉頡係最破壞成個使用體驗嘅原罪喇... 但如果唔計個實體鍵盤,KEYone 就只係一部行得幾順、相機幾好嘅一部 Android 手機,真係「我絕不罕有,往街裡繞過一周,我便化烏有」。

BlackBerry KEYone 在文章發表時,大舖賣價為 $4988,按這裡有詳細規格及最新賣價

相關產品 (1)

相關報導 (4)

Android + 實體鍵盤真係有人 buy?Blackberry KEYone 評測

Android + 實體鍵盤真係有人 buy?Blackberry KEYone 評測

曾經係智能手機大大哥嘅Blackberry雖然話已經轉型軟體保安公司,但手機品牌仍然都係唔少人嘅集體回憶。所以由TCL舊年正式獲得使用BB品牌出手機嘅權利之後,就馬上利用黑莓機最標誌性嘅直板鍵盤機設計,推出名為KEYone嘅配搭實體鍵盤Android手機,仲用左當時DxO最高分嘅GooglePixelXL同級嘅相機CMOS,實行打響頭炮!

EriChan | 2017-07-11
情懷抑或實用?BlackBerry KEYone 開箱評測 + 上手後感

情懷抑或實用?BlackBerry KEYone 開箱評測 + 上手後感

一直以來,版主都對有實體鍵盤的手機很感興趣,可能是因為情懷的關係吧,所以當BlackBerry推出品牌首部有實體鍵盤的Android手機Priv,果陣其實都有少許吸引到版主。可惜,Priv造工實在是一般,加上借機時間太短,令我無法好好試玩這部手機。繼Priv之後再有一部鍵盤手機令我興奮,就是BlackBerry最新推出的KEYone,版主昨日向先達店舖借了KEYone一晚,上手試玩。有實體鍵盤的手機,到底是真的實用,還是純粹情懷?在這篇文章中,版主會跟大家做個開箱評測,並且分享個

左定坤 (Cho Ting Kwan) | 2017-06-14
真. 鍵盤!BlackBerry KEYone 上手實測

真. 鍵盤!BlackBerry KEYone 上手實測

黑莓Fans最想擁有的一部Android手機,相信是這部BlackBerryKEYone。有位Fans明明好抗佢用小米手機,但堅持BlackBerry只係給予TCL代工,依然心信KEYone。手機未正式推出,版主不會說BlackBerry等同小米,但用上Android有實際按鍵,加上鍵盤依然是黑莓Style,都係好吸引。

Keith Yim | 2017-03-05
親生仔待遇 + Pixel XL 相機:黑莓 KeyOne Android 機登場!

親生仔待遇 + Pixel XL 相機:黑莓 KeyOne Android 機登場!

不得了,Blackberry正式發布新一代Android手機KeyOne,除了必備的黑莓實體鍵盤外,今次最值得關注係呢部KeyOne竟然有號稱攝影最強的IMX378相機模組加持!而且黑莓官方更指出,呢部機將會有業內最緊貼親生仔的Android每月安全更新。咁究竟部KeyOne仲有咩賣點呢?一次過帶你睇嗮!

YKer | 2017-02-26

最新新聞