皆因呢期旗艦手機飽受 S810 發熱困擾，有手機因為發熱而頻頻出現相機 Force Close，更離譜係有版主用過一部旗艦連收 Facebook Message 都會死機需要重啟！而主打性價比既手機，往往又因為成本問題係用料同造工上有所取捨，導致好多用落先有問題、批次質量問題等情況。 就等幾位版主同小弟分享下，我地用過云云眾多手機，各自認為最伏既位置係邊度啦！
版主 Lawrence : HTC One M9
要講今年最失望的旗艦機豪無疑問我係會投 HTC One M9 一票的，主要原因係實際使用同本身期望落差太大了。小弟 YK : Zenfone 2
小弟我覺得呢期最伏既應該係性價比機皇 Zenfone 2：因為身邊好多朋友成日同我講，呢部機係性價比極高，性能同旗艦手機有得 Fight！ 但事實上買電子野真係一分錢一分貨，而且注意到 Intel X86 既方案到目前仍然未做到原生 ARM 既表現，部分批次既 Zenfone 2 曾經出現 App 無法兼容、安裝後無法運行等問題，我亦試過呢類軟件寫得唔好既問題，所以我都唔再 Keep 住部 ZF2 啦！ 未知 ASUS 解決左呢 D 問題未呢？ 伏既地方係，買平野要預左佢既表現，又唔係比唔起錢的話，都係選擇中高階、旗艦手機比較好～ 所以我好同意一位手機店達人講，買電話唔係買功能，係買穩定既 ROM，如果唔係日日發熱 Force Close App 就真係頭痛啦！
版主 Keith : .......
係我呢個位，要我講一部最伏嘅 2015 年手機？好難喎，講正友好品牌，我即晚收投訴電話，講正好黑人憎個 d 品牌，佢地班友仔又話強行話 ePrice 無人睇，抽起晒 D....若果講某品牌仲死！熊貓先生又出動.....咁點好呢？我唯有寫成咁，大家自己對號入座，我都話，我唔方便開名囉。手機 A : 好靚，我覺得好靚，但最失敗係第一次接觸，明明軟件未 Tune 好，就要我去名勝影試相。今日出幾個 Firmware 都無得救，壞印像已深入民心。
手機 B : 廣告正! 要靚就得! 真係靚就得？可能廣告主角靚女，係大熱天時部機要 Force Close 都唔介意，因為佢地要靚就得，唔理性能。
手機 C : 我問朋友點解我用呢部機，用唔到 Instagram。佢話，佢個部好正常。但另一個朋友話呢部機用唔到 Facebook Messenger 嘅 Video Chat，但我又有到喎。呢部機其實係每一部 Bug 都唔同，買機同抽獎無分別。怪不得差唔多一個星期一個更新一次 Firmware 啦。
手機 D : Sorry 呢個品牌我零興趣，佢 D 工作人員，請改下態度先。
手機 E, F, G... : 其實呢 D 品牌明唔明白，你要衝入宇宙生存，就要明白宇宙人用機嘅習慣，可唔可以唔好改到 Android 咁似 iPhone 得唔得。
手機 Z : 借又借唔到，要我買我又窮，我用緊上兩代咋。
大家點睇？
得我地三個講無咩意思，最重要我想聽網友們既分享！ 相信唔少網友都有買到 2015 上半年推出既旗艦手機，或者你無買到只係道聽途說手機災情，甚至你本身就係某廠既義工代言人！ 通通都唔緊要，一齊係下面留言同大家分享下你認為心中「 2015上半年最伏機皇？」，到底係邊部機呢？同埋最重要係伏係邊度，攞翻個理由出黎，唔係剩係學某網友放低個名就走人
。但我係呢度必須提醒大家，為保持討論既良好氣氛，請勿作出人身攻擊，多謝合作～