主題:今日最爆!高登仔有專用手機!仲要好平,好靚好鬼正!

ePrice HK
  • 發表時間:2018-08-14 19:49 收錄檢舉
    一般嚟講,只要你係高登討論區會員,你就可以自稱為「高登仔」。不過,你有無上高登,其實無人知,但而家只要有「佢」,你就可以 show 埋俾人知,我係高登仔....

    原來,高登即日做埋手機代理加網絡商!推出全港首部有高登仔 Logo 嘅手機,仲要賣二千蚊左右包手機上網兩年月費!買咗佢,簡直更能突顯你高登仔嘅身份象徵!你係咪好想搶番部?

    今日最爆!高登仔有專用手機!仲要好平,好靚好鬼正!

    今日高登突然出咗條片,公佈佢地會出部高登手機!無論你買定唔買呢部高登手機,睇咗介紹,真係未有機都好開心,包你笑到碌地!

    今日最爆!高登仔有專用手機!仲要好平,好靚好鬼正!
    ▲ 登登登登!呢部就係「高!登!手!機!」

    001:高登手機係乜?實際型號係 NUU M18!NUU 好架勢,幾年前已有科技大網大力推介,係傳奇香港品牌!用呢部手機,仲可以享受到最「新」嘅手機規格!例如 MTK 四核 CPU,2GB RAM 同八百萬像素鏡頭!iPhone 都要行埋一邊。

    002:行全宇宙最新手機作業系統:Anroid 7.0係 Anroid 7.0 唔係 Android 喎!

    003:抵到想死啦!Video 裡面講明,呢部機只係賣 HK$2352。呢個價錢,仲大送 4.5G 上網,兩年上網加通話連全套增值服務,每月首 5GB 全速,過咗 5GB 限速 384kbps 無限上網。版主計過,平均計返每月都係 $98 (連行政費),正啦喂!

    004:「網絡由中移動網絡提供」,版主唔知香港有間網絡商叫「中移動」,大部份呢 D 推銷文都用正名,咁我當佢用「中國移動香港」啦!by the way,中國移動喎,乜唔係高登仔最怕嘅中國網絡商?咁可能佢其實用數碼通你唔知呢,反正寫到唔清唔楚。

    005:用得高登手機,就唔會再用 iPhone 架啦,所以佢有一個好貼心嘅功能:只能收,不能發短訊 SMS,即係九月你要抽 iPhone,就唔可以用呢個號碼去做造 iPhone 排隊嘅認證,你個心想買 iPhone 都唔比你買,你話幾貼心呢!

    今日最爆!高登仔有專用手機!仲要好平,好靚好鬼正!

    有興趣睇完條片自己揾點買點俾錢!


    最後提一提大家:其實買高登手機,等同簽咗廿四個月網絡商合約,買手機之前,係要先俾一千蚊預繳,要去到合約前最後十一個月,每月退少少先收得番!提早解約仲要罰錢!做高登仔,用高登手機有代價架!
     

    立即加入Facebook 專頁,新聞/消息/優惠,最快知。

    01樓 ▲TOP 回列表頁