話說版主 Keith 行去亞博展覽場，發現一部早前係 INDIEGOGO 眾籌網站出現過的三防機竟然現身香港。呢部 Ulefone Armor 3T 其實都係一部 Android 智能電話，但特別之處是有天線配對講機功能（1W-2W 發射功率），可以調頻同市面上其他對講機通訊。結合頂級 IP68/IP69K 雙防護認證、軍規級 MIL-STD-810G，以及 10300mAh 超大電池，完全為上山下海戶外之友而生！
▲ 採用 MTK Helio P23 核心處理器，配合 4GB RAM + 64GB ROM，運行 Android 8.1 系統。Armor 3T 屏幕 5.7 吋 1080p 解像度，擁有 Gorilla 5 大猩猩加持。
▲Armor 3T 重量達 374g，防水、防塵、防撞，再用上 TPU 塑膠 + 鋁合金機身，確實睇落好強悍。
▲ 其實最正係支持真三卡，兩張 nano sim + micro-sd 插爆佢都得。官方講明有 NFC 支持 Google Pay，唔知係咪抽堆國產機水無 NFC 呢？
▲ 主鏡頭 2100 萬像素 f/1.8 大光圈，前鏡頭 800 像素 F/2.0 大光圈。
▲ 無 3.5mm 耳機孔，因為多個 hole 就多個入水風險。
本 YK 立刻問官方最緊要的資料：有無打算賣黎香港？結果係「有」！ 大約11月初就會正式到港，賣價方面預計 300 美金左右，折合港幣約 2400元。
▲ 其實現場仲見到有另外兩部機，一部叫 Ulefone T2，另一部係 Armor 6 （上圖），但官方話未確定係咪賣香港行貨，目前預計上市時間係聖誕左右，未確定我都唔多講。
結論
如果你同本 YK 一樣係戶外之友，又或者係「忽然戶外之友」，市面上確實無幾多款三防機，而且又要價錢吸引，Ulefone Armor 3T 都係一部做戶外活動專機考慮之選。網友們，你地又有無其他三防機推薦？