CMHK 銅鑼灣建 5G 基站!即衝先達買部三星 S10 5G 去試?

左定坤 (Cho Ting Kwan) 2019-04-17 21:56 | 網絡消息
CMHK 將 5G 聯合創新中心香港開放實驗室,由葵涌搬咗去科學園,今日版主就去到科學園,除咗聽 CMHK 講解 5G 的發展應用及示範,而 CMHK 亦宣佈,將會在本月底於銅鑼灣區完成安裝 5G 26/28G 頻段基站。不過,既然快有 5G 基站,係咪代表可以即刻衝去先達買部三星 S10 5G 去試下 5G 嘅威力呢?下文再講。

5G(Facebook).jpg

三星出咗部 Galaxy S10 5G 版,而水貨都在早排到咗旺角先達,賣價近萬元 (當時問價是 $9980)。你可能會問,買咗 S10 5G 版的網友,如果插住張 CMHK 卡,去到銅鑼灣,係咪就可以搶先體驗到 5G 網絡?

根據 CMHK 表示,如果你有留意 Samsung 個發佈會,你話留意到佢哋部 5G 手機個 specs 話支持毫米波 (mmWave, 即 26 / 28G 頻段),當然,本身粒 Chipset (S855) 的而且確係支持 mmWave,呢點係事實,但問題係因為韓國的 5G ,暫時來講,係無做到 mmWave 呢部份,所以本身無開放到 mmWave 即 26/28G 頻段畀部 S10 5G。

所以即使你拎住韓國水貨 S10 5G、插住 CMHK 卡去銅鑼灣,都唔會用到任何 5G 的服務,因為根本就唔 support。

而如果遲啲美國 Verizon 出果部 S10 5G? 因為 Verizon 5G 網絡會用上 mmWave 頻段,咁又打得通 CMHK 銅鑼灣 5G 嗎? 答案都係 NO!CMHK 表示,5G 手機需要跟香港的網絡商配合,佢哋話呢個階段,根本無廠家同佢哋講過,可以好快提供到支援 mmWave 5G 頻段嘅手機。所以,現階段 CMHK 喺銅鑼灣起基站,主要係 for 佢哋測試用途,為未來 5G 做準備,但暫時係無手機用得到。

最新新聞