呢部手機叫 Infinix Zero 8，查過呢個品牌嘅資料，其實呢個品牌都係 from China 嘅，來自深圳傳音控股公司，呢間公司三年前已經講緊，話喺非洲超越咗三星，佔有率相當高，但當然喺香港呢啲地方，就好少會特別留意呢個大陸品牌啦。
而可以喺非洲成為大熱，相信最大原因就係性價比夠高，夠平。呢部 Infinix Zero 8 今年八月尾正式推出，但喺香港就只可以由水貨入手，睇某格價網有網店 $1900 買到，價錢唔算貴，睇 specs 都過得去：6.85 吋 FHD+ 90Hz 大芒、MTK Helio G90T、8+128、4500mAh 大電、33W 快速充電、四主鏡頭 (64MP + 8MP + 2MP + 2MP) + 前置雙鏡頭 (48MP + 8MP) 等等，硬件上嚟講都算見得下人。
不過最令我深刻係佢鏡頭個設計，菱形狀再配合機背嘅眩光，香港有賣嘅行貨手機之中，咁嘅設計算係少有。你又覺得靚唔靚呢？