雞肋頻段無人要!政府 2021 手機通訊頻譜拍賣結果,四大網絡商輸家係佢

Keith Yim 2021-11-02 10:36 | 網絡消息
auction01.jpg
香港政府公佈最近一輪流動通訊頻譜拍賣結果,分別為 600MHz、700MHz、850MHz、2600MHz 及 4.9GHz。部份為現時四大網絡商採用中的 4G 頻段,經過今次重新拍賣,呢部份會係 2024 年進行洗牌,簡單來講,到時會影響現時部份網絡商提供的服務。另外,大部份拍賣嘅頻譜為新加入嘅供應,有助手機網絡商加強覆蓋。不過,最攪笑嘅係,當中有一個頻段,四大網絡商都 Say No!點解咁攪笑?我哋一個一個跟大家講解,跟大家有乜關係。

4.9GHz : 5G 結界合用 數碼通、中移動用家最大得益

大家可能記得香港有所謂嘅「5G 結界」,但因為網絡商最後運用了 4G 頻段當 5G 用的頻譜 Refarm 重整方法,最後你喺「5G」結界如大埔、上水、科學園、馬鞍山一帶,你部 5G 手機一樣有 5G logo 顯示,但速度快定慢,又係另一個故事。之前,只有 csl 及中國移動香港,可以真正透過 4.9GHz 頻段 (或叫作 n79) 喺結界地方,提供真快速 5G 上網服務。今次政府額外批多共 80MHz 頻寬,並分為兩份拍賣,本來以為本來無嘅 SmarTone 與 3 香港平均分享,誰知中國移動香港加入了戰團,將當中的 40MHz 以最貴的二億多港元天價買下來。SmarTone 也用上這個二億多天價,投得本來無嘅 4.9GHz 頻段 (n79) 40MHz 頻段。

係所謂 5G 結界裡面,現在中國移動擁有 80MHz 的 4.9GHz 頻段。大家都知中國移動香港嘅廣告,一直都推他們 5G 網絡是全港最快。要快,最基本是要頻譜夠多,現在中國移動香港喺「5G 結界」裡面,真的變了一哥,只要你用 iPhone 12、13;或者三星手機,你喺「5G 結界」只有 CMHK 可以提供最快 5G 上網速度。與此同時,SmarTone 因為投得當中的 40MHz,「5G 結界」高速用 SmarTone,OK 了。呢兩個全新頻譜,網絡商 2021 年底就可以用到!「5G 結界」的人有福了。

4.9GHz 除咗「5G 結界」可用,其實全港都可以用。中國移動香港董事兼行政總裁李帆風表示佢哋家陣有連續 80MHz 的 4.9GHz 頻譜,已開始喺香港「黃金地段」提供服務。大家都知網絡商頻譜越多,可同一時間支援更多人上網,用中國移動香港,如果收到 5G 嘅話,應該會感受到較高速嘅上網感受。

2600MHz :4G 服務大洗牌,3HK 你唸緊乜

2600MHz  (或叫作 B7) 是 4G 服務的元祖頻段,4G服務無這段頻段,不能提供有速度、又可以應付大量用家同時上網嘅需求。今次拍賣是最早提供服務的其中 90MHz 容量。這段頻譜有段估,當年,即 2009 年,由 3 香港母公司和記電訊與香港電訊合營的 Genius Brand,共投得 30MHz 容量,由提供 4G 服務第一日開始,呢 30MHz 容量都是跟當年的 PCCW Mobile 一齊使用。而後嚟,PCCW 收購 csl,該 30MHz 容量 csl 也共同使用。當然,大家都會好記得,當年 SmarTone 嫌費,無加入競投,以 2G 嘅 1800Mhz 頻段改作 4G 服務,爆出 iPhone 5s 只支援  SmaTone 4G 嘅攪笑情況出現。

有趣嘅係,今次呢 90MHz 要全部再拍賣,3 香港幾乎要把當年 30MHz 與香港電訊共用頻譜嘔番晒出嚟,只餘下 10MHz,而 csl 一口氣拿得 50MHz 容量,雖然數量夠多,但無咗以前二合一效應,csl 及 3HK 可用頻譜都比以往少。中國移動香港在這部份投得 30MHz 跟以往一樣,力保不失。吓,3 香港攪乜,5G 不得了,4G 也可能晒事。不過,今次大洗牌,都要等到 2024 年才進行,仲有幾年時間,對現時 4G 服務嚟講,應該唔會有影響。

850MHz 數碼通最快推低頻 5G?

850MHz (Band 5 或 n5) 這段共 17.5MHz 頻段好特別,喺以往和記 CDMA 結朿後,被當年 PCCW 投得但香港人用唔到嘅 CDMA2000 服務。今次再拍賣,睇番數碼通投得 17.5MHz ,相信不會再用嚟提供 CDMA 服務,反之,相信會結合本來數碼通已有,供 3G 網絡服務的 10MHz 850 頻段,合拼轉為 20MHz。相信好大機會改為 5G 服務。由於是低頻,對信號入屋有好處,有助加強 5G 喺室內覆蓋。

850MHz 頻譜使用權,最快今年年底由電訊盈科交給數碼通,意味著數碼通好快會有網絡升級,若有留意 Samsung 最新兩部摺機 5G 頻段,加上 iPhone 12、13 系列,都支援 5G n5 頻段,相信,數碼通是可以最快推出低頻覆蓋廣又入到屋嘅 5G 服務。而 CDMA 2000 服務亦正正式式喺香港終結。

700MHz 至重要,但要等中國安排

今次拍賣頻譜,重點是這 700MHz(n28)全新頻段。由今年初關閉免費電視模擬信號得出嚟頻譜。700MHz 喺中國大陸都有用到 (中國移動及中國廣電),700MHz(n28)有發射覆蓋廣及更加「入屋」出名。網絡商用呢段頻譜射 5G 訊號,發射站可以唔駛咁近,你屋企好入都比其他頻譜更易收到 5G signal,而亦可以為郊野公園,提供 5G。不過,共 70MHz 容量嘅 n28,四間網絡商根本不能平分,用拍賣去投,錢多有著數。結果如何?csl、中國移動香港及 3 香港,各有 20MHz 容量。數碼通只有 10MHz,容量太少,比起數碼通加陣由 2100Mhz (n1) 提供的 5G 服務,速度會更慢,成段好頻變雞肋。不過,相信數碼通認為其 850MHz 容量,可以做到 700MHz 效果,所以影響未必嚴重。中國移動香港董事兼行政總裁李帆風喺一個記者會透露,700MHz (n28) 頻段,由於香港政府要跟中國大陸相關機構協調 (主要是深圳未完成更換免費電視信號),要係 2022 年第一季先可以正式指派,相信要稍後時間先感受到 700MHz 提供嘅 5G 服務。到時,大家望一望手機有無 5G FDD n28 700 頻段呀!
   
600MHz 無得戶外用無人吼
政府公告低調地處理,當中共 70MHz 容量的 600MHz (n71) 其實無網絡商參予,成為垃圾無人要。本來 600MHz 比起 700MHz有更加易入屋效果,美國 T-Mobile 亦用上類似頻段,作全美國 5G 覆蓋,明明係靚到爆嘅頻,綢絡商唔肯投,相信跟政府限制了 600MHz 只可以作室內使用。 點解咁樣撞?因為跟中國大陸某啲服務撞咗囉。室外用唔到,無網絡商表示有興趣,呢 70MHz 頻譜就係咁,倒咗落海。

邊嗰係最大輸家

呢篇文題目為邊間網絡商為最大輸家,直接開名,我會有難。我會咁講,中國移動香港好積極投資喺頻譜上面,並以高頻為主,成為香港手機網絡頻譜霸主。高頻容量大,可以創造出高速上網嘅 5G 效果,跟佢哋廣告好夾。但留意若果你好似我咁,住係偏遠地區,要好靠入屋訊號,中國移動香港未必有好效果。csl 是頻譜 No 2,力保 2600MHz 容量,可用 4G,可變 5G,但佢地客人太多,頻譜唔多唔得。數碼通有佢地嘅路,今次攞到頻譜好切合佢哋發展。3 香港攪攪下變成四個台裡面,頻譜最少,不過好采佢地月費客戶,應該都係最少,只要佢地唔貪心上太多客,未來質素應該唔會跟家陣相差太遠。下面張圖,有最新頻譜分配表,當給我自己一個參考。
 

最新新聞