iPhone X 都用到！支持 7.5W 輸出，小米無線充電器 平價抵港！

左定坤 (Cho Ting Kwan) 2018-04-26 14:26 | 手機配件

相信有不少網友都知道，版主而家主機係用緊 iPhone X，而 iPhone X 有咩好？其中一個賣點，就係支持 Qi 無線充電。而版主最近都有興趣用佢無線充電功能，但如果要我買原廠？大佬成四舊幾水，真係哪有錢.jpg 囉！事實上，版主有一日在深水埗，買咗塊 $25 的無線充電板，雖然暫時用落無問題，但始終是雜到唔雜的雜嘜牌子，總是會有一定的風險。上個月小米在上海發表的無線充電器，就大大吸引到我目光，人民幣 99 元，就可以買得到，點都好過買 Apple 原廠吧？香港賣價又幾多呢？下文話你知！



根據發佈會所示，小米無線充電器的香港建議零售價為 $149，當然你話比起大陸建議零售價的 99 人民幣 (折合港幣約 $123)，香港價貴咗廿幾蚊左右，但如果比較返 Apple、三星果啲原廠無線充電器，呢個價似乎還是可以接受。不知你又點睇呢？

小米無線充電器外觀簡約，厚度只有 12.44mm，都算是纖薄嘅，就算帶埋出街用，都不會好吃力。當然，無線充電器對我來說，都是主要 for 家用，我就比較少會帶出街用，通常一返到屋企就丟低部 iPhone X 落無線充電器度，你又係唔係同我一樣呢？另外，小米無線充電器支持最高 7.5W 快速充電。呢件配件，你覺得會唔會比起小米 MIX 2s / 紅米 Note 5 更吸引呢？