六種顔色!Fans 必敗!三星 S20 FE 香港賣價 + 上市日期預告

左定坤 (Cho Ting Kwan) 2020-09-23 22:22 | Samsung
最近有唔少傳聞流出,連上手影片都出埋嘅三星 Galaxy S20 FE (Fan Edition),就喺啱啱終於正式喺網上發佈。睇過傳聞嘅相同片,畀我感覺有少少似係平價版嘅 Galaxy S20,但又唔係 Lite 果種 Level,適合 Fans 可以用更親民價錢買到嘅一部旗艦手機。版主話你知,呢部 Galaxy S20 FE 香港係會賣,部機係咩料子,賣幾錢,幾時賣,內文再講。

FB.jpg

六種顏色,好多選擇

先講外觀部分,三星 Galaxy S20 FE 採用咗 6.5 吋 FHD+ 平面芒,屏幕材質為 Super AMOLED,Size 介乎喺 Galaxy S20 (6.2 吋) 與 Galaxy S20+ (6.7 吋) 之間,同樣用上 Infinity-O 穿窿芒設計,並支持 120Hz 屏幕更新率。而 Galaxy S20 FE 機殼係用上咗塑膠製造,搭配鋁金屬嘅邊框,除咗成本可以降低之餘,並且霧面磨砂質感應該會更受 Fans 歡迎。另外,S20 FE 支持屏下指紋技術,並具有 IP68 防塵防水標準,不過就無 3.5mm 耳機孔。

Image 077.png
▲ 一共有六種顏色,分別為綠、藍、紫、紅、橙和白。

S865 旗艦級處理器,支持 25W 快充

其他硬件規格方面,Galaxy S20 FE 配備咗 Qualcomm Snapdragon 865 處理器,都係同返成個 Galaxy S20 系列一樣,有 6GB + 128GB、8GB + 128GB / 256GB 三個版本,電池容量有 4500mAh,並支持 25W 有線充電,並支持無線閃充 2.0 以及 15W 無線電力分享功能。


三個主鏡頭,支持最高 30X Zoom

相機部分,Galaxy S20 FE 跟 Galaxy S20 一樣,都係有三個主鏡頭,而且鏡頭位置嘅設計都差不多,都係方塊般嘅形狀,三鏡頭分別係 12MP 標準 + 12MP 超廣角 + 8MP 長焦嘅組合,當中嘅標準同長焦鏡頭都支持 OIS 光學防震,而長焦鏡頭比起 S20 果個像素低咗好多 (S20 係有 64MP),不過同樣支持 3 倍混合光學變焦 + 30 倍 AI 超高解像度變焦,而前置鏡頭則有 32MP。

其他功能

Galaxy S20 FE 亦有支持 5G 連接嘅版本,雖然發佈會上未有逐一列出其頻段,但估計 Galaxy S20 FE 會同其他 Galaxy S20 系列一樣,香港用嘅 n1 / n78 / n79 都有支援。另外,Galaxy S20 FE 亦會支援 Galaxy Note20 上嘅無線 DeX 功能,可以唔使駁線,直接射上有支持 miracast 嘅電視,並化身成電腦。

賣價係點,香港又會唔會賣?

三星喺發佈會上都公佈咗 Galaxy S20 FE 嘅賣價,5G 版本賣價為 US$699 起,將於 10 月 2 日正式在全球陸續發售。

咁香港方面又點?版主收到風就話會賣 5G 版,暫定 10 月 21 日賣,香港如無意外會賣 8GB + 128GB 版本,實際賣價幾多未知,預計會係五千中,咁話喎。

Image 078.png


 

最新新聞