iPhone 13 發佈會前必睇!傳聞大集合 + 幾時出 + 價錢

左定坤 (Cho Ting Kwan) 2021-09-07 19:43 | Apple
如果目前嘅消息沒錯,Apple 將會喺香港時間下個星期三凌晨時間,正式發表新一代嘅 iPhone 13 系列新機。版主自己就用緊 iPhone 11 Pro,最近都有想升 iPhone 13 系列的想法,始終隔咗一代,相信喺相機、續航,各方面應該都會有所提升。唔知大家有無同我一樣想法,都想換新機?但重點係,到底新 iPhone 13,值唔值得我去換?首先我哋就要知道,iPhone 13 到底個餡係點。而我就有睇過好多關於 iPhone 13 嘅傳聞,都想同大家分享一下。



FB.jpg

外觀

今次 iPhone 13 系列如無意外都係有四款手機,分別為 iPhone 13 mini、iPhone 13、iPhone 13 Pro 同埋 iPhone 13 Pro Max,代表咗唔同尺寸,iPhone 13 mini 同 iPhone 13 就分別有 5.4 吋芒同埋 6.2 吋芒,呢兩部手機都係有雙鏡頭。而 iPhone 13 Pro 同埋 iPhone 13 Pro Max 則分別有 6.1 吋芒同埋 6.7 吋芒,用上三鏡頭嘅設計。

大體上嚟睇,設計同 iPhone 12 系列接近,只係 iPhone 13 mini 同 iPhone 13 嘅雙鏡頭,會變咗打斜擺。同埋今代個瀏海,即係由 iPhone X 開始頭頂個 M 字額,都會變細咗。

同埋,你又可能會問,咁我用緊 iPhone 12 系列嘅,又可唔可以用返佢哋嘅保護殼呢?相信呢個都係有唔少人有疑惑。而早前版主虎仔就分享過,傳聞講到係用唔到嘅,因為如果先前傳出的 iPhone 13 系列保護殼資料無錯,iPhone 13 系列嘅相機模組,會比起 iPhone 12 系列大啲。

WhatsApp Image 2021-09-07 at 7.33.56 PM (1).jpeg

顏色

外觀上我就覺得變化唔太大,不過驚喜更多在於傳聞 iPhone 13 會有好多新色,分別係黑色、白色、紅色、珊瑚色、綠色、藍色同埋玫瑰金色,而有外媒亦話可能會有埋 iPhone 12 系列嘅紫色,即加埋有 8 隻色。當中嘅玫瑰金望落去都幾有高級嘅味道。至於 iPhone 13 Pro 系列就會相對少色一啲,有消光黑、玫瑰金、日落金同埋銀白色。

WhatsApp Image 2021-09-07 at 7.33.56 PM.jpeg

WhatsApp Image 2021-09-07 at 7.33.56 PM (2).jpeg

屏幕

另外,有一個消息,對於平時鍾意打機嘅,可能會啱哂你。就係 iPhone 13 亦會加入 120Hz 屏幕刷新率,代表啲咩?即係個畫面會比以前更加 smooth,除咗打機之外,簡單啲嚟講就算你平時碌 Facebook,都會快咗。咁無論你係打機定係唔打機,其實都係一件唔錯嘅功能嚟嘅。

相機

傳聞本身 iPhone 12 Pro Max 主鏡頭先有嘅 Sensor-Shift 位移式光學影像穩定系統,都會普及到所有 iPhone 13 系列嘅主鏡頭以及超廣角鏡頭,意味住影相拍片都可以提升穩定度,防震效果更佳。另外,傳聞中最頂級果部 iPhone 13 Pro Max 主鏡頭亦會有 F1.5 光圈,光圈大除咗可以景深更明顯,而且低光拍攝亦都會效果更好。

另外,唔知大家有無影開星星嘅習慣呢?聽聞 iPhone 13 有機會有星空攝影功能,並且可以自動調整曝光值𠻹。而拍片方面,原本淨係支持影相用嘅人像模式,亦有機會會喺拍片時都用到。

其他規格及賣價

最後講下其他規格部分,簡單嚟講就係有 5G、電大咗、支持 25W 快充、會用新一代 A15 處理器等等,並且 iPhone 13 Pro 系列可能直接無咗 256GB,但容量加大到 1TB 版本。至於價錢方面,先前有消息傳出就話 iPhone 13 mini 由 699 美金起 (折合港幣約 $5433 起),iPhone 13 為 799 美金起 (折合港幣約 $6210 起),13 Pro 為 999 美金起 (折合港幣約 $7766 起),而 13 Pro Max 則由 1099 美金起 (折合港幣約 $8543 起),同上代 iPhone 12 系列賣價差唔多。至於幾時賣,預計今年都會回復正常,喺 9 月中至尾左右開賣。

如果以上傳聞消息係真嘅,你又會唔會考慮換機呢?
 

最新新聞